અમદાવાદ જિલ્લાની તમામ 21 બેઠકો પર ત્રિપાંખીયો જંગ જામશે. ચાલો જાણીએ આ બેઠકો પર કોની સામે કોનો જંગ જામશે....
ગુજરાત વિધાનસભાની સામાન્ય ચૂંટણી બે તબક્કામાં યોજાશે
અમદાવાદની 21 બેઠકો પર 5 ડિસેમ્બરના રોજ થશે મતદાન
5599 મતદાન મથકો પરથી 59.93 લાખ મતદારો કરશે મતદાન
21 બેઠકો પર ભાજપ, કોંગ્રેસ અને આપ વચ્ચે કાંટાની ટક્કર
ગુજરાતની ચૂંટણીમાં એકબીજાને પછાડવા તમામ પાર્ટીઓએ જોર લગાવી દીધું છે. ગુજરાતની આ વખતની ચૂંટણીમાં ત્રિપાંખીયો જંગ ખેલાઈ રહ્યો છે. ભાજપ અને કોંગ્રેસ ઉપરાંત આ વખતે આમ આદમી પાર્ટી મેદાનમાં છે. આમ આદમી પાર્ટી ગુજરાતમાં આ વખતે સરકાર બનાવવાનો દાવો પણ કરી રહી છે. તમામ રાજકીય પાર્ટીઓએ ઉમેદવારોના નામ જાહેર કરી દીધા છે. અમદાવાદની વાત કરીએ તો અમદાવાદ જિલ્લાની તમામ 21 બેઠકો પર ત્રિપાંખીયો જંગ જામશે. ચાલો જાણીએ આ બેઠકો પર કોણ કોને ટક્કર આપશે...
5599 મતદાન મથકો પર મતદાન
ગુજરાત વિધાનસભાની ચૂંટણી બે તબક્કામાં યોજાવા જઈ રહી છે. અમદાવાદની 21 બેઠકો પર 5 ડિસેમ્બરના રોજ મતદાન થશે. આ બેઠકો માટે 5599 મતદાન મથકો પરથી 59.93 લાખ મતદારો મતદાન કરશે.
ગત ચૂંટણીમાં ભાજપને મળી હતી 15 બેઠક
અમદાવાદ જિલ્લાની બેઠકો પર 1990થી વિધાનસભાની કુલ 7 ચૂંટણી યોજાઇ છે, દરેકમાં ભાજપે કોંગ્રેસ કે અન્ય હરીફ કરતાં અમદાવાદ જિલ્લામાં વધુ બેઠક પર વિજય મેળવ્યો છે. ગત વિધાનસભાની ચૂંટણીની વાત કરીએ તો ભાજપે અમદાવાદની 21માંથી 15 બેઠક પર વિજય મેળવ્યો હતો. જ્યારે કોંગ્રેસ 6 બેઠકથી સંતોષ માણવો પડ્યો હતો. અમદાવાદની કુલ 21 બેઠકો પૈકી શહેરી વિસ્તારની 16 અને ગ્રામ્ય વિસ્તારની 5 બેઠકો છે.