ઉમેદવારી ફોર્મ ભરવા જતાં પહેલાં ગાંધીનગરમાં અલ્પેશ ઠાકોરની જાહેર સભા યોજાઈ હતી. જેમાં ગુજરાતના મુખ્યમંત્રી ભૂપેન્દ્ર પટેલેએ લોકોને અલ્પેશ ઠાકોરને જંગી બહુમતીથી વિજય બનાવવાની વિનંતી કરી હતી.
ગાંધીનગરમાં અલ્પેશ ઠાકોરની જાહેર સભા યોજાઈ
તમારા દિલમાં જગ્યા કરવાની એક તક આપો: અલ્પેશ ઠાકોર
મારું વર્તન આ વિસ્તારમાં વિકાસ કરવાનું હશેઃ ઠાકોર
ગુજરાત વિધાનસભાની ચૂંટણી માટે તમામ રાજકીય પક્ષોએ મોટાભાગની બેઠકો પર ઉમેદવારોના નામ જાહેર કરી દીધા છે. બીજા તબક્કાનું ફોર્મ ભરવા માટેનો આજે અંતિમ દિવસ છે. ત્યારે આજે અલ્પેશ ઠાકોરે ઉમેદવારી ફોર્મ ભરવા જતાં પહેલાં રાયસણ ખાતે પંચેશ્વર મહાદેવના આશીર્વાદ લીધા હતા. ફોર્મ ભરતા પહેલા અલ્પેશ ઠાકોરની ગાંધીનગર ખાતે જાહેર સભા યોજાઈ હતી. જેમાં ગુજરાતના મુખ્યમંત્રી ભૂપેન્દ્ર પટેલ પણ હાજર રહ્યા હતા.
અલ્પેશભાઈને જંગી બહુમતીથી વિજય બનાવોઃ સીએમ
ભાજપના ગાંધીનગર દક્ષિણ બેઠકના ઉમેદવાર અલ્પેશ ઠાકોરની સભામાં મુખ્યમંત્રી ભૂપેન્દ્ર પટેલે કહ્યું હતું કે, અલ્પેશભાઈને ખૂબ મોટી લીડથી આપણે સૌ સાથે મળીને વિજય બનાવીએ. જ્યાં-જ્યાં તમારા સગા-સબંધીઓ રહે છે તેઓને કહો કે ભારતીય જનતા પાર્ટીને કમળને વોટ આપે અને રેકોડબ્રેક જીત અપાવે.
ગાંધીનગરમાં યોજાઈ અલ્પેશ ઠાકોરની સભા
તો અલ્પેશ ઠાકોરે કહ્યું હતું કે, 'ગાંધીનગરમાં તમામ જગ્યાએ વિકાસ પહોંચડવાનું કામ ભારતીય જનતા પાર્ટીએ કર્યું છે. ગાંધીનગરના એક-એક ઘર સુધી વિકાસ પહોંચાડવાનું કામ ભાજપે કર્યું છે. ત્યારે હું તમને વિનંતી કરુ છું કે ભારતીય જનતા પાર્ટીના એક ઉમેદવાર તરીકે મને એક સેવા કરવાની તક આપો.'
કાર્યકર્તાઓને કરી આ વિનંતી
અલ્પેશ ઠાકોરે કાર્યકર્તાઓને વિનંતી કરતા કહ્યું કે, 'મને તમારી સેવા કરવા, તમારા દિલમાં જગ્યા કરવાની એક તક આપો. હું તમને ખાતરી પૂર્વક કહું છું આજે પ્રદીપભાઈએ મારી ખાતરી લીધી છે, ભારતીય જનતા પાર્ટીએ મારી ખાતરી લીધી છે અને હું પણ આપને કહું છું કે મારો વ્યવહાર અને મારું વર્તન એ હંમેશા આપના દિલમાં જગ્યા કરવા માટેનું હશે. મારો વ્યવહાર મારું વર્તન આ વિસ્તારમાં વિકાસ કરવાનું હશે. હું પણ તમારામાંથી આવેલો એક નાનો કાર્યકર્તા છું. હું તમને વિનંતી કરું છું કે અહીંથી કમળને જીતાડો.'
આપને જણાવી દઈએ કે, અલ્પેશ ઠાકોરને ભારતીય જનતા પાર્ટીએ ગાંધીનગર દક્ષિણ બેઠક પરથી ટિકિટ આપી છે. તો કોંગ્રેસે હિંમાંશુ પટેલને ચૂંટણીના મેદાનમાં ઉતાર્યા છે. ત્યારે હવે એ જોવાનું રહેશે કે મતદારોના દિલ જીતવા માટે કોણ સફળ થશે.