અમદાવાદ / વર્ષો જૂના બાકી પ્રોપર્ટી ટેક્સમાં એકસાથે માત્ર મુદ્દલ ભરવાથી સંપૂર્ણ વ્યાજમાફી, આ તારીખથી શરૂ થશે વન- ટાઈમ સેટલમેન્ટ સ્કીમ

• પ્રોપર્ટી ટેક્સધારક માત્ર મુદ્દલ ભરીને વ્યાજમાંથી પૂરેપૂરી મુક્તિ મેળવી શકશે
• બાકી પ્રોપર્ટી ટેક્સમાં એકસાથે માત્ર મુદ્દલ ભરવાથી સંપૂર્ણ વ્યાજમાફી અપાશે
• એન્વાયરન્મેન્ટ ટેક્સમાં પણ 50 ટકા કાપ મૂકી લોકોને રાહત આપી

તાજેતરમાં શહેરના ભાજપના શાસકો દ્વારા આગામી નાણાકીય વર્ષ 2023-24 માટેના મ્યુનિ. કમિશનરના રૂ. 8400 કરોડના ડ્રાફ્ટ બજેટમાં રૂ. 1,082 કરોડના વધારા સાથે રૂ. 9482 કરોડનું સુધારિત બજેટ રજૂ કરાયું છે. આ સુધારિત બજેટ પર આગામી રવિવાર તા. 19 ફેબ્રુઆરીએ યોજાનારી બજેટ બેઠકમાં ચર્ચા-વિચારણા કરાશે અને તેને શાસક પક્ષ બહુમતીના આધારે મંજૂર કરીને રાજ્ય સરકાર સમક્ષ પાઠવશે. જ્યારે આજે બપોરે મ્યુનિ. વિપક્ષ કોંગ્રેસ દ્વારા બજેટ પર પક્ષના સુધારા રજૂ કરાયા હતા. આમ, બજેટની પ્રક્રિયા વચ્ચે તા. 15 ફેબ્રુઆરીથી વર્ષોથી બાકી રહેલા પ્રોપર્ટી ટેક્સ માટે ભાજપના શાસકોએ વન-ટાઈમસેટલમેન્ટ યોજનાની અમલવારી જાહેર કરી છે, જેમાં વર્ષોથી બાકી ખેંચાતી પ્રોપર્ટી ટેક્સની રકમમાં પ્રોપર્ટી ટેક્સધારક માત્ર મુદ્દલ ભરીને વ્યાજમાંથી પૂરેપૂરી મુક્તિ મેળવી શકશે.

એન્વાયરન્મેન્ટ ટેક્સમાં પણ 50 ટકા કાપ મૂકી
ગત તા. 10 ફેબ્રુઆરીએ શહેરના શાસક પક્ષ દ્વારા નાગરિકો સમક્ષ સુધારિત બજેટ રજૂ કરાયું હતું, જેમાં ત્રણ વર્ષ સુધી નવી જંત્રીનો અમલ મોકૂફ રાખવાની જાહેરાત કરાઈ હતી, જેના કારણે પ્રોપર્ટી ટેક્સના બિલમાંનો વધારો ટળ્યો છે, ઉપરાંત પ્રોપર્ટી ટેક્સના દરમાં શાસકોએ માત્ર આંશિક વધારો કર્યો છે તેમજ એન્વાયરન્મેન્ટ ટેક્સમાં પણ 50 ટકા કાપ મૂકી લોકોને રાહત આપી છે. બીજી તરફ ડોર ટુ ડોરના ચાર્જમાં વધારાની તંત્રની દરખાસ્તને શાસકોએ ફગાવી દીધી છે. આની સાથે પ્રોપર્ટી ટેક્સમાં દર વર્ષે પાંચ ટકાના બદલે ફકત બે ટકાનો વધારો સ્ટેન્ડિંગ કમિટીના ચેરમેન હિતેશ બારોટે મંજૂર કર્યો છે. 

કોર્પોરેશનના ટેક્સ ઇતિહાસમાં પહેલી વખત 15 ટકા રિબેટ અપાશે
સ્ટેન્ડિંગ કમિટીના ચેરમેન હિતેશ બારોટ દ્વારા ટેક્સમાં રૂ. 256 કરોડથી વધુની રાહત લોકોને આપવામાં આવી છે. ઉપરાંત એડ્વાન્સ પ્રોપર્ટી ટેક્સ ભરનારા કરદાઓને પણ તેમણે રાજીના રેડ કરી દીધા છે. સળંગ ત્રણ વર્ષ ઓનલાઈન ટેક્સ ભરનારને મ્યુનિ. કોર્પોરેશનના ટેક્સ ઇતિહાસમાં પહેલી વખત 15 ટકા રિબેટ અપાશે. આની સાથે તે દિવસે મળેલી સ્ટેન્ડિંગ કમિટીની બેઠકમાં ચેરમેન હિતેશ બારોટે પ્રોપર્ટી ટેક્સના બાકી કરદાતાઓ માટે અભૂતપૂર્વ યોજના મંજૂર કરી છે. સ્ટે‌ન્ડિંગ કમિટીની બેઠકમાં આ યોજના માટે તાકીદની દરખાસ્ત રજૂ કરાઈ હતી, જેને ચેરમેન બારોટે લીલી ઝંડી આપી હતી, જેના કારણે પ્રોપર્ટી ટેક્સના કરદાતાઓને વધુ એક ઐતિહાસિક યોજનાનો લાભ મળવા જઈ રહ્યો છે.

45 દિવસ સુધી વન-ટાઈમસેટલમેન્ટ યોજનાનો લાભ મેળવી શકશે
આગામી તા. 15 ફેબ્રુઆરીથી પ્રોપર્ટી ટેક્સના બાકી કરદાતાઓ માટે વન-ટાઈમસેટલમેન્ટ યોજના અમલમાં મુકાશે તેમ સ્ટેન્ડિંગ કમિટીના ચેરમેન હિતેશ બારોટ જણાવે છે. આ યોજના હેઠળ જે કરદાતા તેમની વર્ષોથી બાકી ખેંચાતી પ્રોપર્ટી ટેક્સની રકમ પૈકી માત્ર મુદ્દલ ભરશે તો પણ તેમને વ્યાજમાંથી સંપૂર્ણ માફી અપાશે. આ યોજનાની મુદત આગામી 31 માર્ચ સુધીની છે એટલે કે બાકી કરદાતાઓ 45 દિવસ સુધી વન-ટાઈમસેટલમેન્ટ યોજનાનો લાભ મેળવી શકશે.

રૂ. ત્રણ હજારથી વધુનો પ્રોપર્ટી ટેક્સ બાકી બોલે છે
મ્યુનિસિપલ પ્રોપર્ટી ટેક્સના ચોપડે અત્યાર સુધીમાં રૂ. ત્રણ હજારથી વધુનો પ્રોપર્ટી ટેક્સ બાકી બોલે છે, જેમાં અધધ એટલે કે રૂ. 1400 કરોડ માત્ર વ્યાજની રકમ છે. જો સઘળા કરદાતાઓ એકસાથે બાકી પ્રોપર્ટી ટેક્સની ભરપાઈ કરશે તો આ કરદાતાઓને રૂ.1400 કરોડની રાહત મળશે. જૂની ફોર્મ્યુલાની વાત કરીએ તો તેમાં કુલ 400 કરોડ પ્રોપર્ટી ટેક્સના ચોપડે ઉધાર બોલે છે. આમાં રૂ.330 કરોડ તો માત્ર અને માત્ર વ્યાજના છે. એટલે વન-ટાઈમ સેટલમેન્ટ યોજના હેઠળ જો બાકી પ્રોપર્ટી ટેક્સધારક એકસાથે વેરો ભરશે તો તેને માત્ર મૂડી જ ભરવાની રહેશે અને વ્યાજ પેટે એક પણ રૂપિયો નહીં લેવાય. આના કારણે કરદાતાઓને તો ફાયદો થશે જ સાથે સાથે મ્યુનિસિપલ તિજોરોમાં પણ વર્ષોથી બાકી ખેંચાતો કરોડો રૂપિયાનો પ્રોપર્ટી ટેક્સ પણ જમા થશે.

મ્યુનિસિપલ તિજોરીમાં પ્રોપર્ટી ટેક્સની આવકપેટે રૂ.946 કરોડથી વધુ ઠલવાયા
તંત્રના સત્તાવાર રિપોર્ટ મુજબ, ચાલુ નાણાકીય વર્ષ 2022-23માં ગત તા.1 એપ્રિલ, 2022થી તા.3 ફેબ્રુઆરી, 2023 સુધીમાં પ્રોપર્ટી ટેક્સમાં કુલ રૂ.946.85 કરોડની આવક થઈ છે. જ્યારે પ્રોફેશનલ ટેક્સમાં રૂ.173.04 કરોડ, વ્હિલક ટેક્સમાં રૂ.157.58 કરોડ મળીને કુલ ટેક્સ આવક રૂ.1,277.47 કરોડની થઈ છે.