આરોગ્યનો પ્રભાર / 23 હજાર કરોડ રૂપિયાનું પેકેજ કોરોનાની સંભવિત ત્રીજી લહેર માટે જાહેર કરી દેવાયુંઃ મનસુખ માંડવિયા

• કોરોનાની સંભવિત ત્રીજી લહેર અંગે સરકારની તૈયારી
• કેન્દ્રીય મંત્રી મનસુખ માંડવિયાએ ખોડલધામમાં આપી માહિતી
• 23 હજાર કરોડ રૂપિયાની ફાળવણીનો નિર્ણય કરાયો

કોરોનાના કેસ ભલે હાલમાં ઘટી રહ્યા છે. પરંતુ કોરોના ફરીથી ઉથલો મારે તો આરોગ્ય વ્યવસ્થા ન ખોરવાય તે માટે કેન્દ્ર સરકારે તૈયારીઓ કરી લીધી છે. કેન્દ્રીય આરોગ્ય મંત્રી મનસુખ માંડવિયાએ જણાવ્યું કે, આરોગ્ય મંત્રાલયની કમાન સંભાળ્યાના 3 દિવસમાં જ 23 હજાર કરોડ રૂપિયાની ફાળવણી કરવાનો નિર્ણય લેવામાં આવ્યો હતો, જેના ભાગરૂપે દેશના તમામ જિલ્લાઓમાં 1 કરોડ રૂપિયાની કોરોના સંબંધીત દવાઓનો સ્ટોક રાખવામાં આવશે.

આ ઉપરાંત એક ક્રાયોજેનિટ ઓક્સિનજ ટેન્ક તેમજ તમામ તાલુકાઓમાં એક એમ્બ્યુલન્સ રાખવામાં આવશે. આ ઉપરાંત જિલ્લા સ્તરે કોવિડ બેડ સુરક્ષિત કરવાનો પણ નિર્ણય લેવામાં આવ્યો છે. જેમાંથી 20 ટકા બેડ બાળકો માટે અનામત રાખવામાં આવશે. કેન્દ્રીય મંત્રીએ વધુમાં કહ્યું કે, 23 હજાર કરોડ રૂપિયા 9 મહિનામાં ખર્ચવામાં આવશે. જેમાંથી 50 ટકા રકમ રાજ્યોને આપી દેવામાં આવી છે અને આગામી સમયમાં રાજ્યોની માગ મુજબ વધુ નાણા ફાળવાશે.

ખોડલધામ ખાતે 75 કિલો ચાંદીથી મનસુખ માંડવિયાની કરાઈ રજત તુલા

કેન્દ્રીય મંત્રી મનસુખ માંડવિયા ખોડલધામ પહોંચ્યા હતા. જ્યાં ખોડલધામમાં મનસુખ માંડવિયાની રજત તુલા કરવામાં આવી હતી. 75 કિલો ચાંદીથી મનસુખ માંડવિયાની રજત તુલા કરાઈ હતી. તુલાના 75 કિલો રજત ખોડલધામને અર્પણ કરાશે.

ગુજરાતમાં વિધાનસભાની ચૂંટણી પહેલા ભાજપ સક્રીય થઈ છે. કેન્દ્રીય આરોગ્ય મંત્રી મનસુખ માંડવિયા સૌરાષ્ટ્રની મુલાકાતે પહોંચ્યા. જ્યાં તેમણે વજુભાઈ વાળા બાદ પાટીદારો સમાજના આગેવાનો સાથે મુલાકાત કરી હતી. માંડવિયા સાથેની બેઠકમાં લેઉવા અને કડવા પાટીદાર એકસાથે હોવાથી રાજકીય દ્રષ્ટીકોણની આ બેઠક ખૂબ મહત્વની માનવામાં આવી રહી છે. કારણકે પરેશ ગજેરા, જેરામ પટેલ, મૌલેશ પટેલ હાજર રહ્યાં હતા. જેમાં તેમને પાટીદાર સમાજ વિશે મહત્વનું નિવેદન કર્યું હતું.

પાટીદાર એટલે ભાજપ જ: મનસુખ માંડવિયા

ભાજપનો પ્રયાસ છે કે ચૂંટણી પહેલા પાટીદારોની નારાજગી દૂર કરવામાં આવે, આટલું જ નહીં પાટીદારોના આંતરિક પ્રશ્નો મામલે પણ ભાજપે રસ દાખવ્યો છે. માંડવિયાએ એક મોટું નિવેદન આપતા કહ્યું કે પાટીદાર એટલે ભાજપ જ છે, સાથે જ તેમને કહ્યું, પ્રધાનમંત્રી નરેન્દ્ર મોદીએ પાટીદાર સમાજને મહત્વ આપ્યું છે. આપને જણાવી દઈએ કે કેટલાક સમય પહેલા જ પાટીદાર સમાજમાંથી મુખ્યમંત્રી બનાવવાની માગ ઉઠી ચુકી છે.  બીજી તરફ આ તકનો રાજકીય રીતે લાભ લેવાના પ્રયાસમાં કોંગ્રેસ અને આમ આદમી પાર્ટી પણ લાગી ગઈ છે.

મનસુખ માંડવિયાનું અંગત નિવેદન: નરેશ પટેલ

મનસુખ માંડવિયાએ પાટીદારો સાથેની બેઠકમાં પાટીદાર એટલે ભાજપ હોવાનો મત રજૂ કર્યો હતો. આ મામલે પત્રકારોએ નરેશ પટેલને સવાલ કરતા તેમણે જણાવ્યું કે પાટીદાર એટલે ભાજપ એ મનસુખ માંડવિયાનો અંગત નિવેદન હોઈ શકે. આમ, નરેશ પટેલે માંડવિયાના નિવેદનને સમર્થન ન આપ્યું. અને તેમણે કહ્યું કે પાટીદાર સમાજના કેટલાક લોકો કોંગ્રેસ અને AAPમાં પણ છે.  જો કે તેમણે કેન્દ્રીય કેબિનેટમાં આરોગ્ય મંત્રી તરીકે માંડવિયાને સ્થાન મળવા બાબતે ખુશી પણ વ્યક્ત કરી હતી.