અપહરણ / અમદાવાદમાં પાડોશી મહિલા 1 વર્ષની દીકરીને ઉઠાવી ગઇ, કારણ જાણી પોલીસ સ્તબ્ધ થઈ ગઈ

• પડોશમાં રહેલી ભાડુઆત મહિલા સાથે દોસ્તીકરવી ભારે પડી
• એક રાતનો આશ્રય લેનાર મહિલા મિત્ર મહિલાની 1 વર્ષની દીકરીને ઉઠાવી ગઈ
• પોલીસે 4 દિવસમાં જ બાળકીને શોધી કાઢી

આરોપી મહિલા પડોશીની પૂર્વ ભાડુઆત હતી

વટવા સદભાવનાં નગરમાં રહેતાં 35 વર્ષીય પવનબેન માંગીલાલ સમાધીએ તેમની 1 વર્ષની દિકરી અંજલીનું 14 ઓક્ટોબરનાં રોજ અપહરણ થયાંની ફરીયાદ નોંધાવી હતી. જેમાં તેણે જણાવ્યું હતું કે તેની પૂજા(53) પહેલાં પવનનાં બાજુનાં મકાનમાં 7 મહિનાથીભાડે રહેતી હતી. ભાડુઆત પૂજા થોડા સમય પહેલાં ઘર બદલી નાંખ્યું હતું. આ દરમિયાન પૂજા અને પવન વચ્ચે દોસ્તી થઈ હતી. 

સવારે કંઈક આવું દ્રશ્ય સામે આવતાં માતા ચોંકી ગઈ

પૂજા 14 ઓક્ટૉબરનાં રોજ પવનને સદભાવના ચાર રસ્તા પવનને મળી હતી. તે દરમિયાન પૂજાએ પવનને કહ્યું હતું કે મને એક રાત માટે રહેવાની વ્યવસ્થા તમારા ઘરે કરી આપશો? તો પવને તેની દયા ખાઈને પૂજાને પોતાનાં ઘરે આશ્રય આપ્યો હતો. 15 ઓક્ટૉબરની સવારે 6 વાગે ઉઠીને જોયું તો પૂજા અને તેની 1 વર્ષની દીકરી અંજલી બન્ને ગુમ હતાં. જેને પગલે પવને પૂજા સામે દીકરીનાં અપહરણની ફરિયાદ નોંધાવી હતી.

પોલીસને આરોપીનાં પિયરીયા સુધી પહોંચી પણ નિરાશા મળી

વટવા પોલીસ સ્ટેશનની ટીમે રોડ પરનાં તમામ સીસીટીવી તથા હ્યુમન સોર્સથી અલગ અલગ દિશામાં તપાસ હાથ ધરી હતી. જેનાં આઘારે તેઓને પૂજાનાં અમદાવાદ રહેતાં ભાઈ- બહેન સુધી પહોંચી હતી. જોકે પૂજાનાં ભાઈ બહેને પૂજાએ મઘ્ય પ્રદેશનાં યુવક સાથે પરિવારની મરજી વિરુદ્ધ લગ્ન કર્યાં હોઈ તેનો કોઈ સંપર્ક નથી એમ જણાવ્યું હતું. જોકે પુજાનું આખુ નાંમ પૂજા ઉર્ફે ભારતી કાંતિલાલ પુરાણી (મૂળ- હળવદ જી. સુરેન્દ્રનગર)નાં હોવાનું જાણવા મળ્યું હતું.

આરોપીની બહેનપણીથી મળ્યો સુરાગ

એ બાદ પૂજાનો ભુતકાળ તપાસતા જાણવા મળ્યું હતું કે તે તેની બહેનપણી સબનમબાનુની સાથે રહેતી હતી. તપાસ કરતાં જાણવા મળ્યું હતું કે પૂજા રાજસ્થાનનાં રાજુ નામનાં યુવક સાથે બીજા લગ્ન કર્યાં છે અને તે તેની સાથે રહે છે. રાજુનો મોબાઈલ નંબર શોધતા પોલીસને રાજુનું આખું નામ રાજુ વિજ્યસિંગ જાટ(23) (રહે. ગામ ઉટારડા, તા-નદવઈ, જિલ્લો-ભરતપુર રાજસ્થાન) જાણવા મળ્યું હતું.

મહિલા નિ: સંતાન હોવાથી બાળકીનું અપહરણ કર્યું હતું

રાજુનાં ઘરનું સરનામું મળતાં વટવા પોલીસે તેમનાં બાતમીદારોના માધ્યમથી પૂજા અને બાળકી રાજસ્થાનમાં જ છે કે કેમ એ વાતની ખરાઈ કરી હતી. એ બાદ પોલીસની ટીમ ત્યાં જઈને 1 વર્ષની અંજલી અને આરોપી પૂજાને અમદાવાદ લઈ આવી હતી. પ્રાથમિક તપાસમાં પૂજાએ જણાવ્યું હતું કે તેને બાળક થતાં ન હોઈ પહેલા પતિએ છોડી દીધી હતી. જેથી તેણે બીજો પતિ તેને છોડી ન દે તે માટે તેણે બાળકીનું અપહરણ કર્યું હતું. નિસંતાન હોવાથી તેણે બાળકીનું અપહરણ કરી રાજુને આ બાળકી મારી છે એમ જણાવ્યું હતું. જોકે પોલીસે આજ કારણ છે કે અન્ય કોઈ કારણ છે તે માટે પૂછપરછ હાથ ધરી છે.