ક્રાઈમ / સુરતના કરોડોના સટ્ટા કૌભાંડમાં મોટી કાર્યવાહી, મુખ્ય સૂત્રધાર દિનેશ ભરવાડની ધરપકડ

• ડિંડોલીમાંથી ઝડપાયુ કરોડોનું સટ્ટા કૌભાંડ
• પોલીસે મુખ્ય સૂત્રધારને ઝડપી પાડ્યો
• દિલ્લી એરપોર્ટથી દિનેશ ભરવાડની ધરપકડ

સુરતના ડિંડોલી વિસ્તારમાંથી આંતરરાષ્ટ્રીય કક્ષાના રૂા.7800 કરોડના સટ્ટા કૌભાંડમાં ઇકો સેલની ટીમે લંડનમાં રહેતા મુખ્ય સૂત્રધારને દિલ્હી એરપોર્ટથી પકડી પાડ્યો છે. મૂળ આણંદનો વતની દિનેશ ભરવાડ સટ્ટાબેટિંગના ટ્રાન્જેક્શનોનું નેટવર્ક ઓપરેટ કરતો હતો.

ડિંડોલીમાંથી ઝડપાયુ કરોડોનું સટ્ટા કૌભાંડ
ડિંડોલીમાં રાજમહલ મોલ શિવ એન્ટરપ્રાઇઝ નામની ઓનલાઇન કાપડની ઓફિસની આડમાં ધમધમતા ઓનલાઇન સટ્ટાના કૌભાંડનો ઇકો સેલ અને એસઓજીની ટીમે પર્દાફાશ કર્યો હતો. અગાઉ આ રેકેટમાં પોલીસે વ્યવહારો માટે ડમી ડોક્યુમેન્ટને આધારે 55 બેન્ક એકાઉન્ટની સુવિધા પૂરી પાડનારા હરીશ ઉર્ફે કમલેશ જરીવાલા સુનિલ ચૌધરી અને ઋષિકેશ અધિકાર શિંદે, હુઝેફા કૌશર મકાસરવાળા વગેરેને ઝડપી લીધા હતા.

પોલીસે મુખ્ય સૂત્રધારને ઝડપી પાડ્યો
આરોપીઓ ખોટા ભાડા કરારો બનાવટી પેઢી નામના બોર્ડ, અલગ-અલગ બેંકની પાસબુક, ચેકબુક, 75 સીમકાર્ડ, 30 આધારકાર્ડ, વગેરે કબજે લીધા હતા. ગેરકાયદે નાણાંકીય વ્યવહારો માટે બોગસ દસ્તાવેજોના આધારે ખોલેલા 260 ડમી બેંક એકાઉન્ટ મળી આવ્યા હતા. પોલીસ તપાસમાં 7800 કરોડના ટ્રાન્જેક્શનો મળી આવ્યા હતા. પોલીસે અત્યાર સુધીમાં બેંકમાં 3.03 કરોડની રકમ બેંક એકાઉન્ટમાં ફ્રીજ કરી છે. પોલીસે આ રેકેટમાં ચાર્જશીટ પણ મુકી દીધી છે. તપાસ દરમિયાન યુક્રેન અને દુબઇથી આ નેટવર્ક ચલાવતા દિનેશ પાર્થ જોષી, અમિત મજેઠીયા. હરેશ ચૌધરી, નવીન ચૌધરી, અજય વાઘેલા,હાર્દિક મહેતા, હુસેન કૌશર, ચેતન ચૌધરી, ચિરાગ પટેલ વગેરેને વોન્ટેડ જાહેર કરાયા. દરમિયાન દિનેશ ખંભાતી ઉર્ફે દિનેશ રત્નાભાઇ ભરવાડ લંડન ખાતે રહેતો હોવાની અને તે ઇન્ડિયા આવ્યો હોવાની માહિતી મળી હતી. પોલીસે લૂક આઉટ નોટિસ પણ જારી કરી હતી. જે અંતર્ગત દિલ્હી એરપોર્ટથી દિનેશને પકડી લેવાયો હતો. ઇકો સેલે દિનેશના 10મી સુધીના રિમાન્ડ મેળવી પૂછપરછ શરૂ કરી છે.

દિલ્લી એરપોર્ટથી દિનેશ ભરવાડની ધરપકડ
રેકેટનો માસ્ટર માઇન્ડ દિનેશ ભરવાડ વિદેશ રહેતો હતો અને તે રિપબ્લિક ઓફ વાનઅતુ દેશનો પાસપોર્ટ ધરાવતો હોવાની માહિતી મળી હતી. દિનેશ વારંવાર ઇન્ડિયા આવતો હોવાની પણ માહિતી મળતા લૂક આઇટ નોટિસ જારી કરાઇ હતી. જેને પગલે તેને દિલ્હી એરપોર્ટથી દબોચી લેવાયો હતો. પોલીસ તપાસમાં તેની પાસેથી મળી આવેલો વાનઅતુ દેશનો પાસપોર્ટ દુબઇ ખાતેથી એજન્ટ મારફતે 1 કરોડથી વધુની રકમમાં કઢાવ્યો હોવાનું બહાર આવ્યું હતુ. તે આ સિવાય દુબઇ, યુક્રેન, યુકે, પુકેત ખાતે અવર-જવર કરતો હતો અને વર્ષ 2015થી લંડન ખાતે રહેતો હતો. ગુજરાતમાં ખંભાત ખાતે રહેતા પરિવારને મળવા તે દિલ્હી એરપોર્ટ પર આવતા ઇકો સેલે તેને ઝડપી પાડી છે