કેન્દ્રીય ગૃહમંત્રી અમિત શાહ સહિત ઘણા મોટા નેતાઓ રહ્યા હાજર
મંત્રી મંડળમાં કોને કોને સમાવવા તે અંગ કરાઇ બેઠકમાં ચર્ચા
ગુજરાતમાં સરકારની રચના અને સંભવિત મંત્રીઓના નામ મુદ્દે શનિવારે સાંજે વડાપ્રધાન નરેન્દ્ર મોદીના નિવાસસ્થાને બેઠક યોજાઈ હતી. સાંજે 5:30 કલાકે શરૂ થયેલી આ બેઠકમાં ગુજરાતની આગામી સરકારને લગતા તમામ મુદ્દાઓ પર ચર્ચા કરવામાં આવી હતી. આ બેઠકમાં વડાપ્રધાન નરેન્દ્ર મોદીની સાથે કેન્દ્રીય ગૃહમંત્રી અમિત શાહ, ભૂપેન્દ્ર પટેલ અને ગુજરાત ભાજપના અધ્યક્ષ સી.આર. પાટીલ સહિત ઘણા મોટા નેતાઓ ઉપસ્થિત રહ્યા હતા. તમને જણાવી દઈએ કે, ગુજરાતમાં તાજેતરમાં યોજાયેલી વિધાનસભા ચૂંટણીમાં ભારતીય જનતા પાર્ટીએ રેકોર્ડબ્રેક બહુમતી સાથે વાપસી કરી છે.
ગુજરાતમાં સોમવારે યોજાશે શપથગ્રહણ સમારોહ
જણાવી દઈએ કે, ભારતીય જનતા પાર્ટીના ધારાસભ્ય દળે શનિવારે ધારાસભ્ય દળના નેતા તરીકે ભૂપેન્દ્ર પટેલની પસંદગી કરી હતી. ધારાસભ્ય દળની બેઠક બાદ ભૂપેન્દ્ર પટેલે રાજભવન ખાતે રાજ્યપાલ આચાર્ય દેવવ્રત સાથે મુલાકાત કરી હતી અને સરકાર રચવાનો દાવો કર્યો હતો. ભૂપેન્દ્ર પટેલે વિધાનસભાની ચૂંટણીના પરિણામો જાહેર થયાના બે દિવસ બાદ સરકાર રચવાનો દાવો કર્યો હતો. રાજ્યપાલે ભૂપેન્દ્ર પટેલને આગામી સોમવારે બપોરે 2 વાગ્યે શપથ ગ્રહણ માટે આમંત્રણ આપ્યું છે.
અનેક સંભવિત મંત્રીઓના નામ ચર્ચામાં
ભૂપેન્દ્ર પટેલ 12 ડિસેમ્બરે ગાંધીનગરમાં નવા સચિવાલય પાસેના હેલિપેડ ગ્રાઉન્ડમાં રાજ્યના 18માં મુખ્યમંત્રી તરીકે શપથ લેશે. આ સમારોહમાં વડાપ્રધાન નરેન્દ્ર મોદી, કેન્દ્રીય ગૃહમંત્રી અમિત શાહ, ભાજપ શાસિત રાજ્યોના મુખ્યમંત્રીઓ, કેન્દ્રિય મંત્રીઓ સહિત અનેક દિગ્ગજ નેતાઓ હાજર રહેશે. આ ઉપરાંત કનુ દેસાઈ, રાઘવજી પટેલ, ઋષિકેશ પટેલ, હર્ષ સંઘવી, શંકર ચૌધરી, પૂર્ણેશ મોદી, મનીષાબેન વકીલ અને રમણ પાટકરને મંત્રીમંડળમાં સ્થાન મળી શકે છે.