બેઠકમાં પ્રોટેમ સ્પીકર અને MLAના શપથ ગ્રહણ અંગે ચર્ચા કરવામાં આવશે
ગુજરાત વિધાનસભાનું આવતીકાલે એક દિવસીય સત્ર મળવા જઈ રહ્યું છે. જેને લઈ હવે વિધાનસભા સત્ર પહેલા આજે ભાજપના ધારાસભ્ય દળની બેઠક મળશે. વિગતો મુજબ આ બેઠકમાં મુખ્યમંત્રી સહિતના ભાજપનાં 156 ધારાસભ્યો હાજર રહેશે. આ સાથે આજે ગુજરાત વિધાનસભામાં તમામ 182 ધારાસભ્યો શપથગ્રહણ કરવાના છે.
સત્ર પહેલા ભાજપની બેઠક
ગુજરાતમાં પ્રચંડ જીત બાદ ભાજપે સરકાર બનાવ્યા બાદ હવે આજે ધારાસભ્ય દળની બેઠક યોજાનાર છે. વાત જાણે એમ છે કે, આવતીકાલે ગુજરાત વિધાનસભાનું એક દિવસીય સત્ર મળનાર છે. જોકે એ પહેલા આજે ભાજપના તમામ 156 ધારાસભ્યોની બેઠક યોજાશે. આ બેઠકમાં પ્રોટેમ સ્પીકર અને MLAના શપથ ગ્રહણ અંગે ચર્ચા કરવામાં આવશે.
મુખ્યમંત્રી-મંત્રીમંડળ બાદ હવે તમામ ધારાસભ્યોની શપથવિધિ
ગુજરાતના 18માં મુખ્યમંત્રી તરીકે ભૂપેન્દ્ર પટેલે શપથગ્રહણ કર્યા બાદ ભૂપેન્દ્ર પટેલ સરકાર 2.0 ના નવા મંત્રીમંડળે પણ શપથ ગ્રહણ કર્યા હતા. જે બાદમાં હવે આજે ગાંધીનગર સ્થિત ગુજરાત વિધાનસસભામાં તમામ ધારાસભ્યો શપથ ગ્રહણ કરશે. એટલે કે, આજે ભાજપ, કોંગ્રેસ, આપ અને અન્ય પક્ષોના ધારાસભ્યો શપથ ગ્રહણ કરશે.
આવતીકાલે વિધાનસભાનું એક દિવસીય સત્ર
આ તરફ આજે ગુજરાત વિધાનસભામાં તમામ ધારાસભ્યોની શપથવિધિ બાદ હવે આવતીકાલે એક દિવસીય વિધાનસભાનું સત્ર મળશે. આ એક દિવસીય સત્રમાં રાજ્યપાલ આચાર્ય દેવવ્રત સંબોધન કરશે. આ સાથે આવતીકાલે મળનારા એક દિવસીય સત્રમાં વિધાનસભાના અધ્યક્ષ-ઉપાધ્યક્ષની નિમણૂક કરવામાં આવશે.