અદાણી 'પાવર' / એલોન મસ્કથી માત્ર એક ડગલું દૂર ગૌતમ અદાણી, નંબર-2ની ખુરશી માટે છેડાયો જંગ!

• ગૌતમ અદાણીના નામે ટૂંક સમયમાં જોડાઈ શકે છે એક મોટી ઉપલબ્ધિ 
• ફરી એકવાર વિશ્વના બીજા સૌથી ધનિક વ્યક્તિ બની શકે છે ગૌતમ અદાણી
• ટેસ્લાના CEO એલોન મસ્ક અને અદાણીની સંપત્તિ વચ્ચે 5 અરબ ડોલરનું અંતર

વિશ્વના ટોપ-10 અરબપતિઓમાં ભારતનો ડંકો વાગી રહ્યો છે. યાદીમાં સામેલ ભારતીય ઉદ્યોગપતિ ગૌતમ અદાણીના નામે ટૂંક સમયમાં એક મોટી ઉપલબ્ધિ જોડાઈ શકે છે. વાસ્તવમાં તેઓ ટેસ્લાના સીઇઓ એલોન મસ્ક  (Elon Musk)ને પાછળ છોડીને ગમે ત્યારે વિશ્વના બીજા સૌથી અમીર વ્યક્તિ બની શકે છે. વાસ્તવમાં, મસ્ક અને અદાણીની નેટવર્થ વચ્ચેનું અંતર હવે ખૂબ જ ઓછું થઈ ગયું છે. ચાલો જાણીએ નંબર-2ની ખુરશીથી કેટલા પાછળ છે ગૌતમ અદાણી...

અદાણીને ફાયદો, મસ્કને નુકસાન 
એક તરફ અરબપતિ એલોન મસ્ક માટે વર્ષ 2022 ખરાબ સાબિત થયું, તો નવું વર્ષ 2023 પણ તેમના માટે ખાસ સારું સાબિત થાય તેવું દેખાઈ રહ્યું નથી. ગયા વર્ષના અંતે ફ્રાન્સના અરબપતિ બર્નાર્ડ આર્નોલ્ટે વિશ્વા નંબર વન અમીર વ્યક્તિનો તાજ મસ્કના માથા પરથી છીનવી લીધો હતો અને જેથી મસ્ક બીજા સ્થાને સરકી ગયા હતા. તો હવે તેમની નંબર-2ની ખુરશી પણ જોખમમાં છે, કારણ કે ભારતીય ઉદ્યોગપતિ ગૌતમ અદાણી મસ્કની ખૂબ નજીક પહોંચી ગયા છે.

બંને વચ્ચે 5 અરબ ડોલરનો તફાવત
બ્લૂમબર્ગ બિલિયોનેર્સ ઈન્ડેક્સ અનુસાર, ગૌતમ અદાણી અને એલોન મસ્કની સંપત્તિમાં તફાવત સતત ઘટી રહ્યો છે અને શુક્રવારે 6 જાન્યુઆરી, 2023ના રોજ સમાચાર લખાયા ત્યાં સુધીમાં નેટવર્થમાં માત્ર 5 અરબ ડોલરનો જ તફાવત હતો. એલોન મસ્ક 124 અરબ ડોલરની સંપત્તિની સાથે ટોપ-10 ધનિકોની યાદીમાં બીજા નંબર પર હચા. જ્યારે ગૌતમ અદાણી 119 અરબ ડોલરની નેટવર્થ સાથે ત્રીજા નંબરે હાજર હતા. જે ઝડપે અદાણીની સંપત્તિ વધી રહી છે તે જોઈને કહી શકાય કે ગમે ત્યારે તેઓ મસ્કને પાછળ છોડીને વિશ્વના બીજા સૌથી અમીર વ્યક્તિ બની શકે છે.

બીજી વખત બનશે નંબર-2 ધનવાન 
આપને જણાવી દઈએ કે, આવું પ્રથવ વખત નથી, જ્યારે ભારતીય ઉદ્યોગપતિ ગૌતમ અદાણીના નામ સાથે આ સિદ્ધિ ઉમેરાશે. આ પહેલા ગત વર્ષ 2022માં પણ તેમણે આ સિદ્ધિ મેળવી હતી, પરંતુ બહુ ઓછા સમય માટે. નોંધપાત્ર રીતે વિશ્વના અમીરોમાં ગૌતમ અદાણી એકમાત્ર એવા ઉદ્યોગપતિ છે જેમની નેટવર્થમાં જંગી વધારો જોવા મળ્યો છે. માત્ર એક વર્ષમાં તેમની સંપત્તિમાં 33.80 અરબ ડોલરનો વધારો થયો છે. તેનાથી વિપરિત 2021થી સતત નંબર-1 ધનિક રહેલા એલોન મસ્કને ગયા વર્ષે 200 અરબ ડોલરથી વધુની સંપત્તિનું નુકસાન થયું છે.

જેફ બેઝોસને મોટો ઝટકો લાગ્યો 
બ્લૂમબર્ગ અનુસાર, ટોપ-10 અમીરોની યાદીમાં વધુ એક મોટો ફેરફાર જોવા મળ્યો છે. એમેઝોનના જેફ બેઝોસની નેટવર્થમાં થયેલા ઘટાડાને કારણે તેઓ ચોથા સ્થાનેથી છઠ્ઠા સ્થાને આવી ગયા છે. તેમની સંપત્તિ ઘટીને 106 અરબ ડોલર થઈ ગઈ છે. જ્યારે દિગ્ગજ રોકાણકારો વોરેન બફેટ અને માઇક્રોસોફ્ટના બિલ ગેટ્સ તેમનાથી આગળ નીકળી ગયા છે. વોરેન બફેટ 109 અરબ ડોલર સાથે આ યાદીમાં ચોથા સ્થાને અને 107 અરબ ડોલરની નેટવર્થ સાથે બિલ ગેટ્સ પાંચમા સ્થાને પહોંચી ગયા છે.