કેન્યા દેશની એક મહિલા વાડજની હોટલ રેડ એપલમાં છેલ્લા ઘણા સમયથી ડુપ્લીકેટ વિઝાના આધારે અમદાવાદમાં રહેતી ઝડપાઈ
અમદાવાદ ક્રાઈમબ્રાન્ચે નકલી વિઝા ધારકોની તપાસ શરૂ કરી
કેન્યાની એક મહિલાને નકલી વિઝા પર ભારતમાં રહેતી ઝડપી
પોલીસે અમદાવાદની હોટલ રેડ એપલમાં દરોડા દરમિયાન કરી કાર્યવાહી
અમદાવાદ ક્રાઈમ બ્રાન્ચે ડુપ્લિકેટ વિઝા સાથે અમદાવાદમાં વસતા શખ્સો સામે કાર્યવાહી હાથ ધરી છે. જે અંતર્ગત કેન્યાની એક મહિલાની ક્રાઇમ બ્રાન્ચની ટીમે ધરપકડ કરી છે. વાડજની હોટલ રેડ એપલમાં કેન્યાની મહિલા છેલ્લા ઘણા સમયથી ડુપ્લીકેટ વિઝાના આધારે અમદાવાદમાં રહેતી હતી.
પોલીસ કસ્ટડીમાં ઉભેલી આ મહિલા મૂળ કેન્યાની રહેવાસી છે. જેનું નામ રોઝ કિમાન્ડો હોવાનું સામે આવ્યું છે. આ મહિલા અમદાવાદ માર્ચ મહિનાથી ડુપ્લીકેટ વિઝાના આધારે હોટલમાં રોકાઇ હતી. જે અંગે અમદાવાદ ક્રાઇમબ્રાન્ચની ચોક્કસ માહિતી મળતા પોલીસે હોટલ રેડ એપલમાં દરોડા કરી કેન્યાની મહિલાના વીઝા ચેક કરતા શંકા ગઈ હતી. ક્રાઇમ બ્રાન્ચની ટીમે FRROમાં લેટર લખતા ડુપ્લિકેટ વિઝા હોવાનું સામે આવ્યું છે.
ક્રાઇમ બ્રાન્ચની ટીમે વધુ પૂછપરછ કરતા સામે આવ્યું કે, રોઝ કમાન્ડો અગાઉ પણ વર્ષ 2017માં ટુરિસ્ટ વિઝાના આધારે ઇન્ડિયા આવી ચૂકેલી છે. જોકે 2017 બાદ માત્ર એક મહિનાના વિઝા પર આવી હોવા છતાં કેન્યા પરત ગઈ નહોતી. માનવામાં આવી રહ્યું છે કે, વર્ષ 2017 બાદ તે કેન્યા પરત ન ગઈ પરંતુ અમદાવાદમાં જ ખોટા વિઝાના સ્ટીકર અને સિક્કા મરાવી ગેરકાયદેસર રીતે અમદાવાદમાં રહેવા લાગી હતી. પોલીસે વધુ પૂછપરછ કરતાં સામે આવ્યું કે દેહવિક્રયના વ્યવસાય સાથે જોડાયેલી મહિલા છેલ્લા ઘણા સમયથી મહિલાઓની હેરાફેરી કરવાનું કામ કરતી હતી. હાલ પોલીસે તેની સાથે અન્ય કોણ કોણ સંડોવાયેલું છે અને છેલ્લા કેટલાક સમયથી અમદાવાદમાં રહી રોઝ કમાન્ડો નામની મહિલા ગેરકાયદેસર વ્યવસાય ચલાવી રહી હતી તે અંગે તપાસ શરૂ કરી છે.