તેરી મિટ્ટી મેં મિલ જાવાં / શહીદની વિદાયમાં સુરેન્દ્રનગર હિબકે ચડ્યું: ફરજ દરમિયાન જ જવાન ગિરીશ રાઠોડને આવ્યો હતો હાર્ટ ઍટેક

• પાટડીના સાવડા ગામના જવાન ફરજ દરમિયાન શહીદ
• આર્મીમાં ફરજ બજાવતાં જવાનને આવ્યો હતો હાર્ટ એટેક
• ગાર્ડ ઓફ ઓનર આપી કરાયા અંતિમ સંસ્કાર

ઇન્ડિયન આર્મીમાં ફરજ બજાવતા સુરેન્દ્રનગરના સાવડા ગામના જવાન શહીદ થતાં આજે તેમના વતનમાં ગાર્ડ ઓફ ઓનર આપી અંતિમવિધિ કરવામા આવી હતી. શહીદની અંતિમયાત્રા સમયે પાટડીનું સાવડા ગામ આખું હિબકે ચડ્યું હતું અને 'શહીદ જવાન તુમ અમર રહો'ના નારા સાથે અંતિમ વિદાય આપવામાં આવી હતી.

જવાનને આવ્યો હતો હાર્ટ એટેક
સુરેન્દ્રનગર જિલ્લાના પાટડી તાલુકાના સાવડા ગામના વતની અને પશ્ચિમ બંગાળમાં ઇન્ડિયન આર્મીમાં ફરજ બજાવતા ગિરીશભાઈ સોમાભાઈ રાઠોડને હાર્ટ એટેક આવ્યો હતો. જેથી તેઓને હોસ્પિટલ ખાતે લઈ જવામાં આવ્યા હતા, જ્યાં તબીબે તેમને મૃત જાહેર કર્યા હતા. આ અંગેના દુઃખદ સમાચાર મળતા જ આખું સાવડા ગામ શોકમગ્ન થયું હતું. 

શહીદ જવાનની અંતિમ યાત્રામાં મોટી સંખ્યામાં ગ્રામજનો જોડાયા
જે બાદ જવાનના પાર્થિવદેહને સાવડા ગામે લાવવામાં આવ્યો હતો. આજે સવારે તેમના નિવાસ સ્થાનેથી શહીદ જવાનની અંતિમ યાત્રા નીકળી હતી. પોતાના ગામના શહીદ જવાનને અંતિમ વિદાય આપવા માટે મોટી સંખ્યામાં ગ્રામજનો જોડાયા હતા. 

ગાર્ડ ઓફ ઓનર અપાયું
અંતિમ સંસ્કાર પહેલા શહીદ જવાનને ગાર્ડ ઓફ ઓનર આપવામાં આવ્યું હતું. જે બાદ જવાન ગિરીશભાઈ રાઠોડના અંતિમ સંસ્કાર કરવામાં આવ્યા હતા. આ વેળાએ ઉપસ્થિત સૌ કોઈની આંખો ભીની થઈ હતી.