સુરતની કડોદરા GIDCની કંપનીમાં આગ લાગી, જીવ બચાવવા પાંચમા માળેથી કૂદનાર કર્મચારી સહિત બેનાં મોત, તો આગમાં 15થી વધુ દાઝી ગયા હોવાનું અનુમાન, ઈજાગ્રસ્તોને સારવાર અર્થે ખસેડાયા, ફાયર વિભાગ દ્વારા કુલિંગની કામગીરી કરવામાં આવી,ભારે જહેમત બાદ આગ કાબૂમાં
સુરત વિવા પેકેજીંગ મીલમાં ભીષણ આગ
આગના કારણે બે કામદારના થયા મોત
અત્યાર સુધીમાં 125 લોકોનું કરાયું રેસ્ક્યૂ
સુરતમાં કડોદરા GIDCમાં વિવા પેકેજિંગ મીલમાં ભીષણ આગની ઘટના સામે આવી, જેમાં બે કામદારના મોત નિપજ્યા હોવાનું સામે આવી રહ્યું છે. જો કે રાજ્યમાં વારંવાર આગની ઘટના સામે આવ્યા બાદ ફાયર સેફ્ટીને લઈને અનેક સવાલો ઉઠી રહ્યા છે. આટલી વિશાળ કંપની હોવા છતા એક એક્સિટ પોઈન્ટ કેમ, તેમજ ફાયર સેફ્ટીના સાધનોનો પણ કંપનીમાં અભાવ હોવાને કારણે આગ વધુ વિકરાળ બની હતી.
આગના કારણે બે કામદારના થયા મોત
આગની ગંભીરતાને જોતા ફાયર વિભાગ દ્વારા તુરંત જ મેજર કોલ જાહેર કરવામાં આવ્યો હતો. જે બાદ આગને કાબેમાં લેવા 10થી વધુ ફાયર ફાયટર ઘટના સ્થળે આવી પહોંચ્યા હતા. જો કે ભારે જહેમત બાદ આગ પર કાબૂ મેળવાયો છે.હાલ તો ફાયર વિભાગ દ્વારા કુલિંગની કામગીરી હાથ ધરવામાં આવી છે. ત્યારે હવે આગ બાદ કંપનીમાં થયેલા નુકસાન અને જાણહાનિ તેમજ આગ કયા કારણથી લાગી તેને લઈને અભ્યાસ કરવામાં આવી રહ્યો છે.
હાઇડ્રોલિક ક્રેન દ્વારા લોકોનું કરાયું રેસ્ક્યૂ
વહેલી સવારે આગ લાગવાની ઘટના બની જે બાદ લોકોમાં અફરાતફરોનો માહોલ સર્જાયો હતો. આગથી બચવા માટે અનેક લોકોએ પોતાના બચાવ માટે દોડાદોડ કરી મુકી હતી. આગની ઘટનાનો સુરત ફાયર બ્રિગેડને વહેલી સવારે 4 વાગ્યેની આસપાસ કોલ મળ્યો હતો. કોલ મળતાંની સાથે તાત્કાલિક રેસ્ક્યૂ ઓપરેશન અને આગને કાબુમાં લેવા માટે ફાયર વિભાગના અધિકારીઓ દોડી ગયાં હતાં. 108 ઈમર્જન્સી એમ્બ્યુલન્સ પણ ઘટના સ્થળે તાત્કાલિક આવી પહોંચી હતી,
અત્યાર સુધીમાં 125 લોકોનું કરાયું રેસ્ક્યૂ
જોકે ઘટનાની જાણ થતા આસપાસના લોકો ઘટના સ્થળે દોડી આવ્યા હતો તો પોલીસ પણ ઘટના સ્થળે દોડી આવી હતી પોલીસે ટોળાને દૂર કરવાની કાર્યવાબી હાથ ધરી હતી. જો કે ફાયર વિભાગ દ્વારા ભારે જહેમત બાદ આગ પર કાબૂ મેળવ્યો હતો. આગમાં ફસાયેલા લોકોને સુરક્ષિત રીતે રેસ્ક્યૂ કરવામાં આવ્યું છે બેઝમેન્ટ અને ગ્રાઉન્ડ ફ્લોર પર આગ લાગી હતી. યાર્ન અને પ્લાસ્ટિકની બેગ બનાવવાના મટીરીયલને લઈ આગ ઉગ્ર બની હતી જે બાદ પાંચમાં માળે કામ કરતા કામદારોને દિવાલ તોડીને હાઈડ્રોલિક ક્રેનની મદદથી 125 કરતા વધુ લોકોનું રેસ્ક્યૂ કરવામાં આવ્યું હતું, જ્યારે કેટલાક કર્મચારીઓએ પાંચમાં માળેથી પડતું મૂકીને પોતાને બચાવવાનો પ્રયત્ન કર્યો હતો.
મીલના બેઝમેન્ટમાં કુલિંગની કામગીરી શરૂ
ઘટનાની જાણ બાદ પ્રાંત અધિકરી, મેયર, સ્ટેન્ડિંગ ચેરમેન, ડેપ્યુટી કમિશનર, એસપી અને ફાયર અધિકારી વીકે પરીખ સહિતના અધિકારીઓ ઘટના સ્થળે દોડી આવ્યા હતા, હાલ ફ્લોર વાઇઝ ચેકીંગ કરી કર્મચારીઓનું રેસ્ક્યૂ કરાઈ રહ્યું છે તેમજ કુલિંગની કામગીરી હાથ ધરવામાં આવી છે, જો કે આગની ઘટનામાં ઈજાગ્રસ્ત લોકોને 108 મારફતે સુરતની સ્વિમેર હોસ્પિટલમાં સારવાર અર્થે ખસેડાયા છે.