વાહ / ગુજરાતની અનોખી ગ્રામ પંચાયત, બાકી વેરો ભરનારને આપે છે મફતમાં હેલમેટ

• ગ્રામ પંચાયતની અનોખી યોજના
• બાકી વેરો ભરનારને આપે છે ફ્રી હેલમેટ 

આમ તો વેરા બાકીદાર માટે વન ટાઈમ સેટલમેન્ટ કે રિબેટ આપવાની આપણે અનેક યોજનો વિશે સાંભળ્યું હશે. પણ મહેસાણાના બહુચરાજીમાં વેરા બાકીદાર માટે ગ્રામ પંચાયત દ્વારા અનોખી યોજના જાહેર કરવામાં આવી છે. બહુચરાજી ગ્રામ પંચાયત દ્વારા 5000 થી વધુ રકમના વેરા બાકીદાર માટે ફ્રીમાં હેલમેટ  આપવાની યોજના બનાવી છે. 

બાકી વેરો ભરનારને ગ્રામ પંચાયત તરફથી આપવામાં આવશે હેલમેટ  

મહેસાણા જિલ્લાની સૌથી મોટી ગ્રામ પંચાયત એવી બહુચરાજી ગ્રામ પંચાયતની વેરાની આવક 1 કરોડ કરતા પણ વધુ છે. ત્યારે હવે આગામી પંદર દિવસ સુધી બાકી વેરો ભરનારને ગ્રામ પંચાયત આઈ એસ આઈ માર્ક વાળું હેલમેટ  ફ્રી માં આપવાની છે. રાજ્યમાં આ પ્રકારની યોજના જાહેર કરનાર બેચરાજી ગ્રામ પંચાયત પ્રથમ છે.

30 સપ્ટેમ્બર થી આગામી 15 ઓક્ટોમ્બર સુધી માન્ય યોજના

જો તમે યાત્રાધામ બેચરાજી ગ્રામ પંચાયત વિસ્તાર ના રહીશ છો. તો આ સમાચાર આપના માટે છે. જી હા બેચરાજી ગ્રામ પંચાયત દ્વારા 5 હજાર કે તેથી મોટી રકમના વેરા બકીદારો માટે હેલમેટ  ફ્રી માં આપવાની યોજના જાહેર કરી છે. 30 સપ્ટેમ્બર થી આગામી 15 ઓક્ટોમ્બર સુધી બેચરાજી ગ્રામ પંચાયતમાં બાકી વેરો ભરપાઈ કરનારને ગ્રામ પંચાયત દ્વારા ISI માર્ક વાળું હેલમેટ  ફ્રીમાં આપવામાં આવશે.જો કે વેરા બાકીદારે વેરો ભર્યા પછી પ્લાસ્ટિકનો ઉપયોગ નહીં કરવાના અને યાત્રાધામ ને સ્વચ્છ રાખવાના શપથ લેવા પડશે. સલામતી,સ્વચ્છતા અને પ્લાસ્ટિક મુક્ત બેચરાજી ના અભિગમ સાથે જાહેર કરાયેલી આ યોજનાનો ઉદેશ્ય બાકી વેરાની વસુલાત સાથે નાગરિકો ને સુરક્ષા માટે જાગૃત કરવાનો છે.

ગ્રામ પંચાયતનું વેરાનું કુલ માગણું 1.32 કરોડ રૂપિયા

બેચરાજી ગ્રામ પંચાયત મહેસાણા જિલ્લાની સૌથી મોટી ગ્રામ પંચાયત છે.આ ગ્રામ પંચાયતનું વેરાનું કુલ માગણું 1.32 કરોડ રૂપિયા છે.મોટી રકમ ની આવક હોવાને કારણે બેચરાજી ગ્રામ પંચાયત દ્વારા  સ્વ ભંડોળ માંથી જ અનેક વિધ વિકાસ ના કામ કરાયા છે. 

અગાઉ બેચરાજીને CCTV થી સજ્જ કરવાનો ખર્ચ પણ ગ્રામ પંચાયત દ્વારા જ ઉપાડવામાં આવ્યો હતો. ત્યારે હવે વેરા બાકીદાર માટે અનોખી યોજના શરૂ કરવામાં આવી છે. બેચરાજી ગ્રામ પંચાયત ની આ અનોખી પહેલ રાજ્યમાં પ્રથમ છે.ત્યારે અન્ય મોટી ગ્રામ પંચાયતો એ પણ બેચરાજી ના સરપંચ પાસેથી શીખ લેવા જેવી ખરી.