લોકડાઉનના કારણે સામાન્ય જનજીવન ઠબ થઈ ગયું છે. ત્યારે નવા નવા પ્રેમમાં પડેલા જુવાનીયાઓને કોણ સમજાવે. એને મન શુ કોરોના અને શુ લોકડાઉન. બસ આવી જ એક સ્થિતિ નિકોલ વિસ્તારમાં ઉભી થઈ હતી. એક 16 વર્ષની કિશોરી તેના પ્રેમીને મળવાની જીદ્દે ચઢી હતી. બીજી તરફ રખિયાલ ફોઈના ઘરે 6 વર્ષની બાળકી ફસાઈ ગઈ અને લાંભા રહેતા માતા પિતાને મળવાની જીદ્દે ચઢી. બન્ને કેસમાં માતા પિતાએ મહિલા હેલ્પલાઈનની મદદ માંગી હતી. જાણો અંતે શું થયું.
હેલ્પલાઈનના કાઉન્સેલરે લોકડાઉનનો મતલબ અને મહત્વ સમજાવ્યું
નિકોલ વિસ્તારમાં રહેલી રેખા 16 વર્ષની છે. ધો-10માં અભ્યાસ કરે છે. જ્યારે મુકેશ નામનો 25 વર્ષીય યુવક રિક્ષા ચલાવે છે. રેખા ટ્યૂશન ક્લાસીસ કે સ્કુલમાં જાય ત્યારે એ જ રસ્તે રિક્ષાના ફેરા મારતા મુકેશ અને રેખાની નજર મળી ગઈ હતી. બન્નેનો પ્રેમ પાંગર્યો.
માતા પિતાને દિકરીના સંબંધો અંગે જાણ થઈ ગઈ હતી. ઓછુ ભણેલા અને રિક્ષા ચલાવનારા યુવક સાથે દિકરીના સંબંધનો સ્વીકાર કરવો માતા પિતા માટે મુશ્કેલ બન્યો હતો. જેથી દીકરીને વારંવાર સમજાવવાનો પ્રયાસ કર્યો. જોકે મુકેશ ઉત્તરાયણમાં રેખાને ભગાડી ગયો. જેને પગલે રેખાના માતા પિતાએ મુકેશ સામે ફરિયાદ નોંધાવી હતી. પોલીસે મુકેશને શોધી જેલ ભેગો પણ કરેલો. એ બાદ તે હાલમાં જ છુટીને બહાર આવ્યો છે.
મુકેશના જેલમાંથી બહાર આવ્યા બાદ રેખા તેને મળે તે પહેલા જ દેશમાં લોકડાઉન જાહેર કરવામાં આવ્યું. રેખા લોકડાઉનનો ભંગ કરી મુકેશને મળવાની જીદ્દે ચઢી. કંટાળેલા માતા પિતાએ મહિલા હેલ્પલાઈન 181ની મદદ માંગતા હેલ્પલાઈલનના કાઉન્સેલર શીતલબહેન ત્યા પહોંચ્યા હતા.
શીતલબહેને તેને લોકડાઉનના નિયમો, રેખાના સગીર હોવાની વાત અને તેના અભ્યાસ પર પડી રહેલા ખોટા પ્રભાવ અંગે કાઉન્સેલિંગ કર્યુ હતુ. અંતે રેખાને સત્યનું ભાન થતા તેણે વાયદો કર્યો હતો કે તે 18 વર્ષની નહીં થાય ત્યાં સુધી કોઈ પણ છોકરા સાથે સંબંધ નહીં રાખે અને લોકડાઉનના નિયમોનું પાલન કરશે.
6 વર્ષની બાળકીનું આ રીતે પરિવાર સાથે મિલન
ત્યારે રખિયાલમાં બનેલી ઘટનાએ લોકોને મુંજવણમાં મુકી દીધા હતા. જેમાં લાંભામાં પરિવાર સાથે રહેલી 6 વર્ષની બાળકીને ફોઈ પોતાના ઘરે લઈ આવ્યા હતા. જોકે લોકડાઉન થતા 6 વર્ષની બાળકી રખિયાલ ફોઈના ઘરે જ રોકાઈ ગઈ, પણ આ તો બાળક હતું એકાદ દિવસ થતા મમ્મી- પપ્પાની યાદમાં ઘરે જવાની જીદ્દ પકડી રડવા લાગ્યું હતું. અંતે પિતાએ બાળકીને ઘરે લાવવા માટે મહિલા હેલ્પલાઈન181ની મદદ માંગતા મહિલા હેલ્પલાઈનના કાઉન્સેલર બાળકીને રખિયાલથી લાંભા મુકી આવ્યા હતા. જ્યાં પરિવાર સાથે મિલન થતા બાળકીનો હરખ સમાતો નહોતો.
(પાત્રોના નામ બદલેલ છે.)
સ્ટોરી : ધર્મિષ્ઠા પટેલ, અમદાવાદ