ચોંકાવનારુ / બોયઝ લોકરરૂમ કેસમાં આવ્યો વધુ એક વળાંક; ગેંગરેપની વાતો કરનાર છોકરો હકીકતમાં તો...

દિલ્હી પોલીસની સાયબર સેલ દ્વારા યુવતીની ઓળખ બાદ પૂછપરછ કરવામાં આવી રહી છે. યુવતીનું કહેવું છે કે જે છોકરા સાથે તે ચેટ કરી રહી હતી તેનું ચારિત્ર્ય અને ગેંગરેપ અંગે તે છોકરાની પ્રતિક્રિયા તે જાણવા માંગતી હતી. તે પોતાની મજા માટે આ કરી રહી હતી. આ ચેટિંગનો બોયઝ લોકર રૂમ સાથે કોઈ સંબંધ નથી.

છોકરાઓના લોકર રૂમ અને સ્નેપચેટના વાયરલ સ્ક્રીનશોટ બે અલગ ઘટનાઓ છે

સાયબર સેલના DCP અન્યેશ રોયે રવિવારે એક સત્તાવાર નિવેદન મોકલીને કહ્યું હતું કે છોકરાઓના લોકર રૂમ અને સ્નેપચેટના વાયરલ સ્ક્રીનશોટ બે અલગ ઘટનાઓ છે. સ્ક્રીનશોટ માર્ચ મહિનાના છે અને એપ્રિલના પહેલા અઠવાડિયામાં બોયઝ લોકર રૂમ ગ્રુપ બનાવવામાં આવ્યું હતું. જ્યારે બોયઝ લોકર રૂમ કેસ સોશિયલ મીડિયામાં સામે આવ્યો ત્યારે તેમાં સ્નેપચેટનો સ્ક્રીનશોટ ઉમેરવામાં આવ્યો હતો. આ પછી સોશિયલ મીડિયા પર એવું કહેવાતું હતું કે બોયઝ લોકર રૂમમાં છોકરીઓને ગેંગરેપની ધમકી આપવામાં આવી રહી છે.

લોકર રૂમ સાથે સંકળાયેલા વિદ્યાર્થીઓની સંખ્યા 24 થી વધુ  

દિલ્હી પોલીસે બોયઝ લોકર રૂમના ગ્રુપ એડમિનની ધરપકડ કરી લીધી છે. એક સગીરને પકડવામાં આવ્યો છે. સાયબર સેલે આ કિસ્સામાં લોકર રૂમના બીજા છોકરાઓની ઓળખ કરી લીધી છે. લોકર રૂમ સાથે સંકળાયેલા વિદ્યાર્થીઓની સંખ્યા 24 થી વધુ થઈ ગઈ છે. બધાની પૂછપરછ કરવામાં આવી છે. આમાંના કેટલાક સગીર છે. તેમાંના મોટાભાગના લોકોનું કહેવું છે કે તેઓ લોકર રૂમ ગ્રુપમાં ન તો ચેટિંગ કરી શકતા, ન ફોટા શેર કરતા હતા. દરેકના મોબાઇલ ફોરેન્સિક તપાસ માટે મોકલાયા છે.

છોકરી પોતે પ્લાન બનાવી રહી હતી

પોલીસ અધિકારીઓના જણાવ્યા અનુસાર સ્નેપચેટના સ્ક્રીન શોટ કેસમાં જાણવા મળ્યું છે કે યુવતી અન્ય છોકરીઓ સાથે ગેંગરેપની વાત કરી રહી હતી. યુવતી જે છોકરા સાથે નકલી ID વડે ગેંગરેપની યોજના બનાવવા માટે ચેટ કરી રહી હતી તે છોકરો પણ સગીર છે. યુવતીએ આવી વાતો કર્યા પછી તે છોકરાએ બનાવટી ID સિદ્ધાર્થ સાથે ચેટિંગ કરવાનું બંધ કરી દીધું હતું. આ છોકરાએ આ ચેટિંગનો સ્ક્રીનશોટ લીધો અને તેને બીજા જૂથમાં શેર કર્યો. પોલીસે હાલમાં આ યુવતી અને છોકરા સામે કોઈ કાર્યવાહી કરી નથી.