લોકોને બ્લેકમેલ કરીને લોન એપ દ્વારા નાણાં પડાવી લેતી આંતરરાષ્ટ્રીય ગેંગે બે વર્ષમાં હવાલા દ્વારા 100 કરોડ રૂપિયા ચીન મોકલ્યા હોવાનો ઘટસ્ફોટ
લોન Appના નામે લોકોની છેતરપિંડી કરતી ગેંગ ઝડપાઇ
પોલીસ તપાસમાં ઘટસ્ફોટ, ચીન મોકલાયા હતા રૂ.100 કરોડ
લોકો પાસેથી છેતરાયેલા નાણાનું ભારતીય કંપનીઓમાં રોકાણ કરાયું
હાલમાં સોશિયલ મીડિયામાં અનેક વાર ફ્રોડની કિસ્સા સામે આવતા હોય છે. તેવામાં ચંદીગઢમાં, લોકોને બ્લેકમેલ કરીને લોન એપ દ્વારા નાણાં પડાવી લેતી આંતરરાષ્ટ્રીય ગેંગે બે વર્ષમાં હવાલા દ્વારા 100 કરોડ રૂપિયા ચીન મોકલ્યા હોવાનો ઘટસ્ફોટ થયો છે. પોલીસ પૂછપરછમાં સામે આવ્યું છે કે, લોકો પાસેથી છેતરાયેલા નાણાનું રોકાણ ભારતીય કંપનીઓમાં પણ કરવામાં આવ્યું છે. પોલીસ હવે આ અંગે પણ તપાસ કરી રહી છે. ચંદીગઢ પોલીસ આ મામલે તપાસ કરવા એન્ફોર્સમેન્ટ ડિરેક્ટોરેટ (ED)ને પણ પત્ર લખશે.
ચંદીગઢ પોલીસ ઉપરાંત અન્ય એજન્સીઓ પણ આરોપીની પૂછપરછ કરી રહી છે. ઈન્ટેલિજન્સ બ્યુરો (IB) એ ગુરુવારે પણ આરોપીઓની પૂછપરછ કરી હતી અને ઘણી મહત્વપૂર્ણ માહિતી મેળવી હતી. જણાવી દઈએ કે, થોડા દિવસો પહેલા ચંદીગઢ સાયબર સેલ પોલીસ સ્ટેશને દેશભરના પાંચ રાજ્યોમાંથી આ ઈન્ટરનેશનલ ગેંગના 21 દુષ્કર્મીઓની ધરપકડ કરી હતી. આ ગેંગનો માસ્ટરમાઇન્ડ ચીની નાગરિક વાન ચેંગુઆ છે. તેની પણ પૂછપરછ કરવામાં આવી રહી છે. આ માટે અનુવાદકનો ઉપયોગ કરવામાં આવી રહ્યો છે.
આ તરફ એસપી કેતન બંસલે જણાવ્યું કે, છેતરપિંડી માટે આરોપીઓએ જે મોબાઈલ નંબર અને લેપટોપનો ઉપયોગ કર્યો હતો તે ઈન્ડિયન સાયબર ક્રાઈમ કોઓર્ડિનેશન સેન્ટર (I4C)ને મોકલવામાં આવ્યા છે. ટૂંક સમયમાં જ ખબર પડશે કે આરોપીઓએ અત્યાર સુધીમાં કેટલા લોકો સાથે છેતરપિંડી કરી છે.
માસ્ટરમાઈન્ડ વાન ચેંગુઆ (34), અંશુલ કુમાર (25) રહે સેક્ટર-49, નોઈડા, પરવાઝ આલમ ઉર્ફે સોનુ ભડાના (32), રાંચી (ઝારખંડ), અર્જુન અને રાજીવના રિમાન્ડ પૂરા થઈ ગયા છે, પોલીસ તમામને શુક્રવારે કોર્ટમાં રજૂ કરશે. એસપી કેતન બંસલે જણાવ્યું કે, કોર્ટને આરોપીની પૂછપરછ માટે રિમાન્ડ વધારવા માટે કહેવામાં આવશે. પરવાઝ આ ગેંગને ચલાવતો હતો જ્યારે રાજસ્થાનના અલવરનો રહેવાસી અર્જુન સૈની અને ઉત્તર પ્રદેશના ગાઝીપુરનો રહેવાસી રાજીવ ટીમ લીડર તરીકે કામ કરતા હતા.
અત્યાર સુધીમાં આરોપીઓની પૂછપરછ દરમ્યાન પોલીસને જાણવા મળ્યું છે કે, આરોપીઓએ બ્લેકમેઇલિંગ અને છેતરપિંડી માટે છ લોન એપનો ઉપયોગ કર્યો હતો. આ સિવાય પણ ઘણી નકલી લોન એપ્સ છે, જે ચીનમાં બનાવવામાં આવી છે. વાન ચેન્ગુઆનો મિત્ર ચીનમાં બેસીને આ એપ્સ તૈયાર કરતો હતો. એસપીએ કહ્યું કે, ચીનમાં બેઠેલો એક વ્યક્તિ અંશુલને પૈસા અહીંથી ત્યાં લઈ જવાની સૂચના આપતો હતો. ચીનમાં રહેતો ઠગ બે વર્ષ પહેલા જ ભારતમાં હતો.
આ સાથે વધુ જાણવા મળ્યું છે કે, આરોપી અંશુલે હવાલા દ્વારા લગભગ 100 કરોડ રૂપિયા ચીન મોકલ્યા છે. ચીનમાં બેઠો બેઠો તેને પૈસા અહીંથી ત્યાં લઈ જવા સૂચના આપતો હતો. શુક્રવારે પાંચેય આરોપીઓને કોર્ટમાં રજૂ કરીને તેમના રિમાન્ડ વધારવાની માંગણી કરશે.