ભેદ ઉકેલાયો / અમદાવાદમાં ભીડની આડમાં મોબાઈલ ચોરતી ટોળકીનો એક સાગરીત ઝબ્બે, મોડસ ઓપરેન્ડી એવી કે પકડાય તો પણ હાથ ઊંચા કરી દેશો

• ફેસ્ટિવલ તેમજ ઈવેન્ટમાં મોબાઈલ ચોરી કરતી ઝારખંડ ગેંગનો એક આરોપી ઝડપાયો
• પોલીસ પૂછપરછ દરમ્યાન 200 થી વધુ મોબાઈલ ચોરી કર્યા હોવાનું ખુલ્યું
• બાળકો સાથે ચોરી કરવા આવતી હતી ઝારખંડની ગેંગ

 ગુજરાતમાં ફ્લાવર શો અને કાઈટ ફેસ્ટિવલમાં ચોરી કરવા આવતી ઝારખંડ ગેંગના એક આરોપીની અમરાઇવાડી પોલીસે કરી ધરપકડ. ચોરીના 70 મોબાઈલ જપ્ત કરીને 200થી વધુ મોબાઈલ ચોરી કરી હોવાનું ખુલ્યું. બાળકો સાથે ચોરી કરવા આવતી ઝારખંડની ગેગની શુ હતી મોડ્સ ઓપરેન્ડી.

પોલીસ આરોપી ઇન્દર મંડળ પાસેથી 70 જેટલા સ્માર્ટ ફોન કબ્જે કર્યા
અમરાઈવાડી પોલીસની ગિફરતમાં રહેલ આરોપી ઇન્દર મંડલ ઝારખંડનો રહેવાસી છે. જે પકડાયેલ આરોપી સહિત પાંચ લોકોની ગેંગ મોબાઇલ ચોરી કરવા ઝારખંડથી ખાસ અમદાવાદ આવતા હતા. અમદાવાદ માં ચાલી રહેલ ઇવેન્ટમાં ભીડ વાળી જગ્યાથી મોબાઇલની ચોરી કરવા ઝારખંડની ગેંગ આવી હતી. જેમાં દોઢ મહિનામાં 200 થી વધુ મોબાઇલ ચોર્યા હોવાની આંશકા પોલીસને છે. પોલીસ આરોપી ઇન્દર મંડળ પાસેથી 70 જેટલા સ્માર્ટ ફોન કબ્જે કર્યા. જેમાં 30 આઈફોન સહિત અલગ અલગ કંપનીના 70 ફોનની 12.50 લાખ કિંમત મુદ્દામાલ કબ્જે લીધા છે.

મોબાઈલ ચોરની મોડસ ઓપરેન્ડી
પકડાયેલ આરોપી ઇન્દર મંડળની પૂછપરછ કરતા સામે આવ્યું કે દોઢ મહિનામાં જ ઝારખંડની ગેંગએ કાંકરિયા કાર્નિવલ, સ્વામિનારાયણ શતાબ્દી મહોત્સવ ,ફ્લાવર શો અને કાઈટ ફેસ્ટિવલમાંથી અસંખ્ય મોબાઇલ ચોર્યા છે. મોબાઇલ ચોરી કરતી ગેંગની મોડ્સ ઓપરેન્ડી વાત કરીએ તો ઝારખંડના સાહેબગંજ જિલ્લાના ચોર ગેંગ અમદાવાદમાં ચાલતા ફેસ્ટિવલ સમયે આવે છે. ટ્રેન મારફતે અમદાવાદ આવીને પુર્વ વિસ્તારમાં ચાલી જેવી જગ્યા પર એક રૂમ રાખીને રહે અને બાદમાં શહેરમાં ચાલતા ઇવેન્ટમાં રીક્ષા મારફતે ત્યાં પહોંચી જાય ત્યાં ભીડભાડ વાળી જગ્યા પર ભેગા મળી મોબાઇલની ચોરી કરતા. જોકે પાંચ જણની ટોળકીમાં બે કે ત્રણ નાની ઉંમરના કિશોર હોય જેથી રંગેહાથ મોબાઇલ ચોરી કરવામાં પકડાય તો તેને નાનો સમજી લોકો છોડી દેતા હોય છે જેથી પોલીસના હાથે પકડતા ન હતા પરંતુ અમરાઇવાડી પોલીસને ચોક્કસ માહિતી મળતા મોબાઇલ ચોરીના રેકેટ પકડાયું. 

ચોરી થયેલ મોબાઈલ માલિકો અમરાઈવાડી પોલીસનો સંપર્ક કરી મોબાઈલ મેળવી શકે છે
ચોરી કરેલા મોબાઇલ ઝારખંડ માં લઈ જઈ વેંચતા હતા.જ્યાં ચોરી થયેલા મોબાઇલથી ઓનલાઇન ચિટિંગ ફ્રોડમાં તેનો ઉપયોગ થતો હોવાનું પોલીસને આંશકા છે. જેથી પોલીસે મોબાઇલ ચોરીના મુખ્ય આરોપી પકડવા ચક્રોગતિમાન હાથ ધર્યા છે. બીજી બાજુ આ કાર્યક્રમમાં લોકોના ચોરી થયેલા મોબાઇલ માલિક અમરાઈવાડી પોલીસ સંપર્ક કરીને પરત મેળવી શકે છે જેવી એક અપીલ કરી છે.