મુસાફરોમાં ભય / VIDEO: દ્વારકાના દરિયામાં જુઓ કેવી ફસાઈ બોટ, પોલીસે તાબડતોબ કરવું પડ્યું રેસ્ક્યૂ

• ઓખા-બેટ દ્વારકા વચ્ચે ચાલતી ફેરી બોટ દરિયામાં ફસાઈ
• અનેક મુસાફરો સાથેની ફેરી બોટ દરિયામાં ફસાઈ 
• સ્થાનિક પોલીસ અને મરીન કમાન્ડોએ કર્યું રેસ્ક્યૂ

યાત્રાધામ દ્વારકાના જગતમંદિરમાં દરરોજ ભગવાન દ્વારકાધીશજીને હજારો ભાવિકો શિશ ઝુકાવે છે, જેઓ ભગવાન દ્વારકાધીશના રાણીવાસ એવા બેટ દ્વારકામાં અચૂક પણે દર્શન કરવા જતા હોય છે. બેટ દ્વારકા જવા માટે ફેરીબોટનો સહારો લેવો પડે છે. ઓખાથી બેટ દ્વારકા સમુદ્રમાં 160 જેટલી પેસેન્જર બોટો ચાલે છે. ત્યારે ગતરોજ દ્વારકામાં મોટી દુર્ઘટના બનતી રહી ગઈ.

યાત્રિકોથી ભરેલી બોટ દરિયામાં ફસાઈ
ગઈકાલે મોડી સાંજે બેટ દ્વારકાથી યાત્રિકોને લઈને ઓખા તરફ જઈ રહેલી બોટ દરિયામાં ફસાઈ ગઈ હતી. દરિયામાં ઓટના કારણે ખૂબ જ ઓછું પાણી થઈ જવાને કારણે બોટ રેતીના ધોવામાં નીચે ફસાઈ જતા બોટમાં સવાર મુસાફરોના જીવ તાળવે ચોંટી ગયા હતા. ગભરાઈ ગયેલા મુસાફરો મદદ માટે રાહ જોઈ રહ્યા હતા. આ અંગેની જાણ થતાં સ્થાનિક પોલીસ અને મરીન કમાન્ડો દરિયામાં પહોંચી ગયા હતા અને રેસ્ક્યૂ ઓપરેશન હાથ ધર્યું હતું.

પોલીસ અને મરીન કમાન્ડોએ હાથ ધર્યું હતું રેસ્ક્યૂ
પોલીસ દ્વારા યાત્રાળુઓને બીજી બોટમાં વારાફરતી સ્થાનાંતર કર્યા બાદ ફસાઈ ગયેલી બોટમાં ઓછા મુસાફરો રહ્યા બાદ અન્ય બોટથી ધક્કો મારીને રેતીમાં ફસાઈ ગયેલ બોટને પાણીમાં તરતી કરી યાત્રિકોને સહી સલામત ઓખાના દરિયા કિનારે પહોંચાડ્યા હતા. પોલીસ અને મરીન કમાન્ડો યોગ્ય સમયે દરિયામાં પહોંચી જતા રેસ્ક્યૂ ઓપરેશન પાર પડ્યું હતું અને મોટી દુર્ઘટના બનતા અટકી હતી.