રાણીપ વિસ્તારમાં શાહીબાગ પોલીસ સ્ટેશનના હેડ ક્વાર્ટરમાં ફરજ બજાવતા મહિલા પોલીસ કર્મીએ આપઘાત કર્યો છે. પતિ-પત્ની વચ્ચેના ઝઘડામાં આપઘાત કર્યો હોવાની શક્યતા પોલીસે વ્યક્ત કરી છે. રાણીપ પોલીસે આપઘાતને લઈને તપાસ શરૂ કરી છે.
મહિલા પોલીસ કોન્સ્ટેબલનો આપઘાત
દોઢ વર્ષના લગ્ન જીવનનો કરુણ અંત
પતિ-પત્ની બંને પોલીસ ખાતામાં બજાવે છે ફરજ
રાણીપ વિસ્તારમાં જૂના સ્વામિનારાયણ વાસમાં રહેતા મહિલા પોલીસ કોન્સ્ટેબલ ભાવનાબેન ડાભીએ પોતાના ઘરમાં ગળેફાંસો ખાઈને આપઘાત કરી લીધો હતો. આપઘાતનું ચોક્કસ કારણ હજુ સુધી સ્પષ્ટ થયું નથી. પરંતુ ગુરુવારની સાંજે ભાવનાબેન અને તેમના પતિ ભદ્રેશભાઈ ઘરમાં હાજર હતા. આ દરમિયાન ભદ્રેશભાઈ મકાનના અંદરના બેડરૂમમાં સૂતા હતા, જ્યારે ભાવનાબેને ડ્રોઈંગ રૂમમાં પંખા સાથે દુપટ્ટો બાંધીને ગળેફાંસો ખાઈને આપઘાત કરી લીધો હતો. લગભગ સાંજે 7:00 વાગે ભદ્રેશભાઈ રૂમમાંથી બહાર આવ્યા ત્યારે ભાવનાબેનને આત્મહત્યા કરેલી હાલતમાં જોયા અને તેમણે રાણીપ પોલીસને જાણ કરી.
મહિલા કોન્સ્ટેબલ શાહીબાગ પો.સ્ટેશનમાં બજાવતા હતા ફરજ
ભાવનાબેન ડાભી 2016માં એલઆરડી તરીકે ભરતી થયા હતા. જ્યારે હાલમાં શાહીબાગ પોલીસ હેડ ક્વાર્ટરમાં ફરજ બજાવતા હતા. દોઢ વર્ષ પહેલા જ ભાવનાબેનના લગ્ન વાડજ પોલીસ સ્ટેશનમાં કોન્સ્ટેબલ તરીકે ફરજ બજાવતા ભદ્રેશભાઈ ડાભી સાથે થયા હતા. દોઢ વર્ષના લગ્ન જીવન દરમિયાન બંને પતિ પત્ની વચ્ચે નાની મોટી બાબતે ઘરકંકાસ ચાલતો હતો. જેનાથી કંટાળીને ભાવનાબેને આત્મહત્યા કરી હોવાની શંકા પોલીસે વ્યક્ત કરી છે, પરંતુ પોલીસને આપઘાતને લઈને કોઈ અંતિમ ચિઠ્ઠી મળી આવી નથી.
પાંચ દિવસથી રજા પર હતા પતિ-પત્ની
મહત્વનું છે કે, પાંચ દિવસ પહેલા જ આ પતિ-પત્ની પાંચ દિવસથી રજા પર હતા અને ત્યાર બાદ ગુરુવારે જ નોકરી પર હાજર થયા હતા. નોકરીથી પરત આવીને ભાવનાબેને આપઘાત કર્યો હતો. જેથી રાણીપ પોલીસે આ બંને પતિ-પત્ની વચ્ચે ક્યાં કારણસર કંકાસ ચાલી રહ્યો હતો તે મુદ્દે વધુ તપાસ હાથ ધરી છે. મહિલા પોલીસ કોન્સ્ટેબલ આપઘાત કેસમાં રાણીપ પોલીસે અકસ્માત મોત નોંધીને તેમના પતિ ભદ્રેશ ડાભીનું નિવેદન લઈને આત્મહત્યાનું કારણ જાણવા તપાસ શરૂ કરી છે.
પોલીસ બેડામાં શોક
અત્રે ઉલ્લેખનીય છે કે, ગોતામાં પણ એક પોલીસ કોન્સ્ટેબલે પરિવાર સાથે સામૂહિક આપઘાત કર્યો હતો અને ફરી વધુ એક પોલીસ કર્મચારીના આપઘાતથી પોલીસ બેડામાં શોક ફેલાયો છે. આ આત્મહત્યા પાછળ પારિવારિક સમસ્યા છે કે અન્ય કોઈ કારણ તેને લઈને પોલીસે તપાસ હાથ ધરી છે.