Bogus oil factory: બ્રાન્ડેડ તેલ કંપનીના નામના ડુપ્લીકેટ સ્ટીકર લગાવી અન્ય તેલ વેચતા વેપારીને અરવલ્લી જિલ્લા SOG પોલીસ દ્વારા મોડાસા જીઆઈડીસીમાંથી ઝડપી લેવામાં આવ્યો.
નકલી કપાસિયા તેલના ડબ્બાના પેકિંગનું કૌભાંડ
લક્ષ્મી પ્રોટીન્સ ફેક્ટરીમાં SOGના દરોડા
અરવલ્લી SOGની ટીમે પર્દાફાશ કર્યો
મોડાસા GIDCમાંથી તિરૂપતિ કપાસિયા તેલના નામે નકલી તેલના ડબ્બાનું પેકિંગ કરતી ફેક્ટરી ઝડપાઈ છે. SOGની ટીમે દરોડો પાડીને 8 ડબ્બા, 36 સ્ટીકર અને ડબ્બાના 38 બૂચ જપ્ત કર્યા છે.
નકલી કપાસિયા તેલના ડબ્બાના પેકિંગનું પર્દાફાશ
મળતી માહિતી અનુસાર, મોડાસા GIDC વિસ્તારમાં આવેલી લક્ષ્મી પ્રોટીન્સ નામની તેલ બનાવતી ફેક્ટરીમાં SOG PI સી.એફ રાઠોડ અને તેમની ટીમે બાતમી આધારે રેડ કરી હતી. આ દરમિયાન જૂના તેલના ડબ્બામાં અન્ય તેલ ભરી 'તિરૂપતિ કપાસિયા તેલ'ના સ્ટીકર તેમજ બૂચનો ઉપયોગ કરી વેચાણ કરતા વેપારીને ઝડપી લેવાયો હતો. આ દરમિયાન SOGની ટીમે તિરૂપતિ કપાસિયા તેલના ડુપ્લીકેટ 36 સ્ટીકર, 38 નંગ બુચ તેમજ 15 કિલો તેલ ભરેલા આઠ ડબ્બા સહિત કુલ રૂપિયા 18,816નો મુદ્દામાલ જપ્ત કર્યો હતો.
મોડાસા ટાઉન પોલીસ મથકે ગુનો દાખલ
આ બનાવમાં SOG પીઆઇ સી.એફ રાઠોડે કોપીરાઈટ એક્ટની કલમ 63, 64 મુજબ મોડાસા ટાઉન પોલીસ મથકે ગુનો દાખલ કર્યો છે, જ્યારે પોલીસે મોડાસા બસ સ્ટેશન નજીકની લક્ષ્મીકુંજ સોસાયટીમાં રહેતા અમિત કુમાર કિશનલાલ શાહની ધરપકડ કરી કાયદેસર કાર્યવાહી હાથ ધરી છે.