અમદાવાદ / પાડોશી યુવકે બળાત્કાર ગુજારીને મૂક-બધિર યુવતીને બનાવી દીધી ગર્ભવતી

યુવતી ઘરમાં એકલી હતી. તેનો લાભ લઇને યુવકે તેના પર ચારથી પાંચ વખત બળાત્કાર ગુજાર્યો હતો અને મારી નાખવાની ધમકી પણ આપી હતી. 

અમરાઇવાડી વિસ્તારમાં આવેલ સંતોષીનગરની એક ચાલીમાં રહેતા ૩૫ વર્ષિય યુવકે તેની જ પડોશમાં રહેતા એક યુવક વિરુદ્ધ બળાત્કારની ફરિયાદ કરી છે. ફરિયાદમાં કરેલા આક્ષેપ પ્રમાણે યુવકની નાની બહેન ૨૦ વર્ષની છે અને તે મૂક બધીર છે. થોડાક સમયે મૂક બધીર યુવતીનાં લગ્ન થયાં હતાં. જોકે તેને ઘરકામ ફાવતું નહીં હોવાના કારણે સાસરીવાળાએ તેને કાઢી મૂકી હતી. યુવતી છેલ્લા થોડાક સમયથી તેના પરિવાર સાથે રહે છે. 

એક મહિના પહેલા યુવતીની બહેન ગર્ભવતી હોવાથી તે તેની મદદ કરવા માટે ધનસુરા ગઇ હતી. બે દિવસ પહેલાં યુવતીની બહેને તેની માતા અને ભાઇને ફોન કરીને ધનસુરા બોલાવ્યાં હતાં. ધનસુરા પહોંચતાની સાથે મૂક બધીર યુવતી ગર્ભવતી હોવાની જાણ થઇ હતી. યુવતીને તેની માતાએ પૂછતાં તેણે જણાવ્યું હતું કે પડોશમાં રહેતો જગદીશ ચાવડા નામનો યુવક ચાર મહિના પહેલા ઘરે આવ્યો હતો અને ચાર થી પાંચ વખત બળાત્કાર ગુજાર્યો હતો. બળાત્કાર ગુજારીને જગદીશે યુવતીને ધમકી આપી હતી કે જો કોઇને કહીશ તો જાનથી મારી નાખીશ. જગદીશે યુવતી પર બળાત્કાર ગુજાર્યા બાદ ગર્ભ રહી જતા સમગ્ર મામલો સામે આવ્યો છે. અમરાઇવાડી પોલીસે જગદીશ વિરુદ્ધમાં ગુનો દાખલ કરીને તપાસ શરૂ કરી છે.