રાજ્યમાં આગજનીને લગતી ગોઝારી ઘટનાઓની સંખ્યા આ વર્ષે ઘણા વધુ પ્રમાણમાં નોંધાઈ છે. અમદાવાદમાં આવી ઘટનાઓથી પ્રજાને બચાવી શકાય તે માટે ખાનગી કંપની દ્વારા મ્યુનિ. ફાયરબ્રિગેડને રૂ. રપ લાખનો કેમેરા ગિફટ અપાશે.
આશરે ૬પ લાખથી વધુની વસતી અને ૪૬૬ સ્કે. કિલોમીટર ક્ષેત્રફળ ધરાવતા અમદાવાદમાં આકાશને આંબતી ગગનચુંબી ઇમારતોનો તોટો નથી હવે તો શહેરનો જગ્યાના અભાવે હોરિઝોન્ટલને બદલે વર્ટિકલ વિકાસ તેજ ગતિથી થઇ રહ્યો છે.
ઝેરી ધુમાડાને કારણે નાગરિકોને બચાવવા મુશ્કેલ બને છે
એક અંદાજ મુજબ શહેરમાં રપ૦૦થી વધુ હાઇરાઇઝ બિલ્ડિંગ છે. આવી હાઇરાઇઝ બિલ્ડિંગમાં શોર્ટ સર્કિટ કે અન્ય કારણોસર ફાટી નીકળતી આગ કે ઝેરી ધુમાડામાં ફસાયેલા નાગરિકોની સંખ્યાનો સાચો અંદાજ મળવો મુશ્કેલ બને છે. પરિણામે રેસ્ક્યુ ઓપરેશનનું ટાઇમિંગ ખોરવાય છે. જોકે હવે મ્યુનિસિપલ ફાયરબ્રિગેડે અતિ આધુનિક ડ્રોન કેમેરાથી સજ્જ થવાનું હોઇ આ કેમેરો હાઇરાઇઝ બિલ્ડિંગની આગ કે ધુમાડામાં ફસાયેલા નાગરિકને શોધી કાઢશે અને નાગરિકોની બહુમૂલ્ય જિંદગીની રક્ષા કરશે.
ડ્રોન કરશે મદદ
જોકે હવે હાઇરાઇઝ બિલ્ડિંગના રહેવાસીઓના જાનમાલની સુરક્ષા માટે અતિ આધુનિક ડ્રોન આવી રહ્યું છે. દેશની ફાયર એન્ડ સિક્યોરિટી એસો. ઓફ ઇન્ડિયા નામની પ્રતિષ્ઠિત ખાનગી સંસ્થાની ગુજરાત શાખા દ્વારા ટૂંક સમયમાં અમદાવાદ ફાયરબ્રિગેડને રૂ.રપ લાખનું આ ડ્રોન ગિફટ અપાશે.
ડ્રોન ધરાવતું અમદાવાદ ફાયરબ્રિગેડ દેશનું સર્વ પ્રથમ કોર્પોરેશન બનશે
ફાયરબ્રિગેડના ચીફ ફાયર ઓફિસર એમ.એફ. દસ્તૂર ડ્રોન કેમેરાની વિગત આપતાં વધુમાં કહે છે આ પ્રકારનું અતિ આધુનિક ડ્રોન ધરાવતું અમદાવાદ ફાયરબ્રિગેડ દેશનું સર્વ પ્રથમ કોર્પોરેશન બનશે. આ ડ્રોનના થર્મલ ઇમેજ કેમેરાથી ભીષણ આગ અને ધુમાડાના ગોટા વચ્ચે પણ સ્પષ્ટ તસવીર તેમજ વીડિયો લઇ શકાશે.
ડ્રોન લગભગ અડધો કલાક ઊંચે આકાશમાં કામગીરી બજાવી શકશે ત્યારબાદ આપોઆપ નીચે ઊતરશે. આ ઉપરાંત ગીચ વિસ્તારમાં આગ બુઝાવવા રોબો તેમજ શેષનાગ પણ આવી રહ્યા છે. શેષનાગ પ હજાર લિટર પાણીની ક્ષમતા ધરાવતી વોટર ટેન્ક છે. જેનાથી ૧પ મિનિટ સુધી પ૦૦ મીટરની રેન્જમાં આગ બુઝાવવા પાણી છોડી શકાશે