બીમારી / ચીનથી આવી રહ્યો છે આ અતિભયંકર વાઇરસ, ચેપી બીમારી વીજળીવેગે ફેલાઈ શકે છે, વૈજ્ઞાનિકોની ચેતવણી

ચીન ના વુહાન શહેરમાં કોરોનાવાયરસને કારણે લોકોને ન્યુમોનિયા થઈ રહ્યો છે. 41 બીમાર લોકોના સંપર્કમાં આવેલા 419 ડોકટરો સહિત 740 જેટલા લોકોને નિરીક્ષણ હેઠળ રાખવામાં આવ્યા છે. વુહાન શહેરના અધિકારીઓએ પુષ્ટિ આપી છે કે શહેર હાલમાં રહસ્યમય ન્યુમોનિયાની ઝપેટમાં છે. 

વર્લ્ડ હેલ્થ ઓર્ગેનાઇઝેશન ( WHO ) એ પણ વિશ્વભરના દેશોને ચેતવણી આપી હતી કે આ વાયરસથી સાવચેત રહેવાની જરૂર છે. નવા વર્ષની શરૂઆતમાં, લોકો ચીનની મુલાકાત લેવા જાય છે. ઘણા લોકો થાઇલેન્ડ પણ ફરવા ગયા છે. 

હવે થાઇલેન્ડમાં પણ એક વ્યક્તિને આ વાયરસનો ચેપ લાગ્યો છે. જેને હોસ્પિટલના અલગ વોર્ડમાં રાખવામાં આવે છે. આ અગાઉ 2003 માં સિવિયર એક્યુટ રેસ્પિરેટરી સિન્ડ્રોમ - SARS નામનો રોગ ચીનથી ફેલાયો હતો. 

આ છે બીમારીના લક્ષણો

કોરોના વાયરસ ન્યુમોનિયાના લક્ષણો આ પ્રમાણે છે - સૂકી ઉધરસ, તાવ અને થાક. ઘણા કેસોમાં લોકોને શ્વાસ લેવામાં પણ મુશ્કેલી તકલીફ પડે છે. તપાસ બાદ જાણવા મળ્યું છે કે સીફૂડ ખાવાના કારણે લોકોમાં આ વાયરસ ફેલાયો છે. હાલમાં, વુહાનમાં સીફૂડ પર પ્રતિબંધ છે.

રજાઓની સિઝનમાં રોગ વધુ ફેલાવવાની ભીતિ 

કોરોના વાયરસ ન્યુમોનિયા લુનાર ન્યુ યરની રજાઓ પહેલા ફેલાયો છે જે 25 જાન્યુઆરીએ આવે છે. આવા સમયે, લગભગ 45 કરોડ લોકો ચીનમાં ટ્રેન અને લગભગ 7.9 કરોડ લોકો વિમાન દ્વારા મુસાફરી કરે છે. આવી સ્થિતિમાં, ચીની અધિકારીઓને ડર છે કે રોગ વિશ્વના અન્ય સ્થળોએ ફેલાઈ શકે છે. 

હવે ઘણા એશિયન દેશો વુહાન અને બેંગકોકમાં આવતા લોકો પર નજર રાખી રહ્યા છે. થાઇલેન્ડ પર પણ નજર રાખવામાં આવી રહી છે કારણ કે ત્યાંથી એક બીમાર વ્યક્તિ પણ મળી આવ્યો છે. જો કે, સમગ્ર વિશ્વના વૈજ્ઞાનિકોએ એ વાતનો ઇનકાર કર્યો છે કે કોરોનાવાયરસ ન્યુમોનિયા અગાઉ ફેલાયેલા સાર્સને મળતો આવે છે.

સઘન ચેકિંગ થઇ રહ્યું છે

આ સમયે, ચાઇનાના તમામ આંતરરાષ્ટ્રીય વિમાનમથકો પર પહોંચતા લોકોનું બોડી સ્કેનિંગ કરવામાં આવી રહ્યું છે. જેથી જાણી શકાય કે કોણ આ રોગથી પીડિત છે કે નહીં. બીમાર વ્યક્તિના ફેફસાંનો એક્સ-રેમાં ચેપ સ્પષ્ટ રીતે જોવા મળે છે.