મહાઠગ કિરણ પટેલ અને તેની પત્ની માલિની સામે અમદાવાદ ક્રાઈમ બ્રાન્ચમાં ફરિયાદ નોંધાઈ છે. ક્રાઈમ બ્રાન્ચ ટ્રાન્સફર વોરન્ટથી કિરણ પટેલની ધરપકડ કરશે.
મહાઠગ કિરણ પટેલની મુશ્કેલીમાં વધારો
કિરણ પટેલ અને તેની પત્ની વિરુદ્ધ અમદાવાદમાં ફરિયાદ
ઉત્તરાખંડ પોલીસ પણ કિરણ પટેલ સામે કાર્યવાહી કરશે
ગુજરાતના મહાઠગ કિરણ પટેલની ધરપકડ બાદ એક પછી એક ચોંકાવનારી વિગતો બહાર આવી રહી છે. ત્યારે કાશ્મીરમાંથી પકડાયા બાદ મહાઠગ કિરણ પટેલ વિરુદ્ધ ગુજરાતમાં પ્રથમ ફરિયાદ નોંધાઈ છે. ઠગ કિરણ પટેલ અને તેની પત્ની માલિની પટેલ વિરુદ્ધ અમદાવાદ ક્રાઇમ બ્રાન્ચમાં ફરિયાદ નોંધાઈ છે. ક્રાઇમ બ્રાન્ચે ગુનો નોંધતા જ ઠગ કિરણની પત્ની માલિની ભૂગર્ભમાં જતી રહી છે. ક્રાઇમ બ્રાન્ચે ગુનો નોંધી તપાસ શરૂ કરી છે. ક્રાઈમ બ્રાન્ચ દ્વારા કિરણ પટેલની ટ્રાન્સફર વોરંટથી ધરપકડ કરવામાં આવશે.
ઠગાઈનો વધુ એક કિસ્સો
આ ફરિયાદ અન્ય કોઈએ નહીં પરંતુ ગુજરાત સરકારના પૂર્વ મંત્રી જવાહર ચાવડાના ભાઈ જગદીશ ચાવડાએ નોંધાવી છે. કિરણ પટેલે અમદાવાદના જગદીશ ચાવડા સાથે છેતરપિંડી આચરી હતી. તેણે PMOમાં અધિકારી હોવાનું કહીને છેતરપિંડી આચરી હતી. જગદીશ ચાવડાના બંગલાના રિનોવેશનના નામે કિરણ પટેલે પોતાનો દાવો મુક્યો હતો. હવન કરાવી કિરણ પટેલે બંગલો પચાવવાનો પ્રયાસ કર્યો હતો. જગદીશ ચાવડાના બંગલામાં કિરણ પટેલે પોતાનું બોર્ડ લગાવી દીધું હતું. એટલું જ નહીં બાદમાં કિરણ પટેલ સિવિલ કોર્ટમાં ખોટો કેસ પણ દાખલ કર્યો હતો. આ કેસના પતાવટ માટે જગદીશ ચાવડાને સમાધાન કરવા ઠગ કિરણ પટેલના માણસો મોકલી લાખો રૂપિયાની માંગણી કરી હતી. ત્યારે હાલ ક્રાઇમ બ્રાન્ચે ગુનો નોંધતા જ ઠગ કિરણની પત્ની માલિની ભૂગર્ભમાં ઉતરી ગઈ છે.
ઉત્તરાખંડ પોલીસ કિરણ પટેલ સામે કરશે કાર્યવાહી
તો ઉત્તરાખંડ પોલીસની એક ટીમ પણ શ્રીનગર પહોંચી છે અને કિરણ પટેલની પૂછપરછ કરી રહી છે. કિરણ પટેલે ઉત્તરાખંડમાં કેદારનાથ-ઋષિકેશના વેપારીઓ સાથે બેઠક યોજી હતી. PMO અધિકારીને નામે જુલાઈ મહિનામાં વેપારીઓ સાથે બેઠક યોજી હતી. બેઠકને લઇ કિરણ પટેલની પૂછપરછ કરવા ઉત્તરાખંડ પોલીસની ટીમ શ્રીનગર પહોંચી છે. શ્રીનગરમાં કિરણ પટેલની પૂછપરછ ચાલી રહી છે. આજે કિરણ પટેલને શ્રીનગર કોર્ટમાં રજૂ કરાશે. ગુરુવારે કિરણ પટેલની જામીન અરજી પર શ્રીનગર કોર્ટ ચુકાદો આપી શકે છે.
અમદાવાદની ક્લબોની ચૂંટણીમાં બન્યો હતો સ્ટ્રેટેજી પ્લાનર
કિરણ પટેલ અમદાવાદમાં પણ અનેક કળા કરી ચૂક્યો છે. મહાઠગ કિરણ પટેલ અમદાવાદના કર્ણાવતી અને રાજપથ ક્લબની ચૂંટણીમાં સ્ટ્રેટેજી પ્લાનર બન્યો હતો. કિરણ પટેલ ખૂદને PM નરેન્દ્ર મોદીના નજીકનો માણસ ગણાવતો હતો. કિરણ પટેલ પેનલની એક વ્યક્તિ મારફતે ક્લબમાં પહોંચ્યો હતો. ઠગ પેનલના સભ્યોને જીત માટે 20 લાખ રૂપિયા ખર્ચની ઓફર કરતો હતો અને ક્લબમાં મોટી મોટી વાતો કરી લોકોને પ્રભાવિત કરતો હતો
મોટી મોટી વાતો કરી લોકોને પ્રભાવિત કરતો
કિરણ પટેલ પોતે એટલી મોટી વાતો કરતો હતો કે તે પોતે ક્લબની ચૂંટણીનો સ્ટેટ્સ પ્લાનર બની ગયો હતો. તે અનેક મોટા લોકોના સંપર્કમાં આવીને સરકારની સાથે સંબંધ છે કહીને લોકોને બાટલીમાં ઉતારતો હતો
કિરણ પટેલે દિનેશ નાવડિયાનો કર્યો હતો સંપર્ક
મહાઠગ કિરણ પટેલ અંગે સુરતના ઉદ્યોગપતિ દિનેશ નાવડિયાએ પણ ચોંકાવનારા ખુલાસા કર્યા હતા. તેમણે કહ્યું હતું કે, અમદાવાદમાં G20 સમિટ માટે કિરણ પટેલે મને આમંત્રણ આપ્યું હતું. અમદાવાદ અને જમ્મુ-કશ્મીરની એક હોટેલમાં કિરણ પટેલ સાથે મારી મુલાકાત થઇ હતી. તેમણે ઉમેર્યું હતું કે, હોટેલ તાજમાં કિરણ પટેલ મળવા આવ્યો હતો અને કિરણ પટેલે કોઈ પણ કામ કરી આપવા ખાતરી આપી હતી. કિરણ પટેલે કેન્દ્ર સરકારના કામ પણ કરી આપવાની ખાતરી આપી હતી તેમજ વારંવાર ફોન પર કશ્મીરની વાત કરતો હતો અને કિરણ પટેલે કશ્મીરમાં સસ્તા ભાવે જમીન અપાવવા માટે વાત કહી હતી. કશ્મીરમાં ઉદ્યોગ સ્થાપવામાં મદદ કરવાની ખાતરી આપી હતી તેમ નાવડિયાએ જણાવ્યું હતું.
ગરબા આયોજક કેતન ગાંધી સાથે પણ કરી હતી ઠગાઇ
કિરણ પટેલે ગરબા આયોજક કેતન ગાંધી સાથે ઠગાઇ કરી હતી. વર્ષ 2018ના વર્ષમાં નવરાત્રીના આયોજનમાં કિરણ ભાગીદાર હતો. કિરણ પટેલે ગોધરાના કેતન ગાંધીને ભાગીદાર બનાવ્યા હતા. મોટી રકમમાંથી 17 લાખની રકમ કિરણે ભાગીદાર કેતનને ન આપી ઠગાઈ કરી હતી. સમગ્ર મામલે કિરણ પટેલ સામે પોલીસ ફરિયાદ નોંધાઈ હતી. ફરિયાદ બાદ રૂપિયા 7.5 લાખથી વધુ રકમ મહાઠગે ચુકવી હતી. મહાઠગે બાકીના નાણા હજુ સુધી ભાગીદારને ચુકવ્યા નથી. વીટીવી સમક્ષ ગોધરાના વેપારી કેતન ગાંધીએ પોતાની વ્યથા ઠાલવી હતી. મારા જેવા અનેક લોકોને કિરણ પટેલે ફસાવ્યા છે તેમ કેતન પટેલે જણાવ્યું હતું.
અનેક જગ્યાએ આચરી ચૂક્યો છે છેતરપિંડી
કિરણ પટેલે વડોદરામાં 2018માં ગરબા મહોત્સવનું આયોજન કર્યું હતું. જેમાં તેણે અમદાવાદના ડેકોરેશનના ધંધાર્થીઓને ચૂનો ચોપડ્યો હતો. કિરણ પટેલે જૈન ડેકોરેટર્સ એન્ડ કેટરર્સ સાથે 1 કરોડથી વધુની છેતરપિંડી આચરી હતી. જેથી કિરણ પટેલ વિરુદ્ધ રાવપુરા પોલીસ સ્ટેશનમાં ફરિયાદ દાખલ કરવામાં આવી હતી.
G 20 અંતર્ગત યોજી હતી કોન્ફરન્સ
મહાઠગ કિરણ પટેલ અને તેની પત્ની રાષ્ટ્રપ્રથમ નામનું સંગઠન ચલાવે છે. તાજેતરમાં જ રાષ્ટ્રપ્રથમના બેનર હેઠળ કિરણ પટેલે અમદાવાદમાં G 20 અંતર્ગત કોન્ફરન્સ યોજી હતી. ગત 29 જાન્યુઆરીના હોટેલ હયાતમાં કોન્ફરન્સ યોજાયેલી G-20 કોન્ફરન્સમાં સચિવો અને રિટાયર્ડ સચિવોને આમંત્રણ અપાયું હોવાનો ખુલાસો થયો હતો.
પોતાને ગણાવતા હતો PMO ઓફિસર
જમ્મુ અને કાશ્મીર પોલીસે શ્રીનગરમાં એક મોટી કાર્યવાહી કરી છે. એક હાઈપ્રોફાઈલ કેસમાં અમદાવાદના કિરણ પટેલની ધરપકડ કરવામાં આવી છે. માહિતી મુજબ ધરપકડ કરાયેલ કિરણ પટેલ નામના વ્યક્તિએ બનાવટી દસ્તાવેજોના આધારે સત્તાવાર પ્રોટોકોલ મેળવ્યો હતો. ધરપકડ કરાયેલ વ્યક્તિ પોતાની ઓળખ વડાપ્રધાન કાર્યાલય, નવી દિલ્હીમાં એડિશનલ ડાયરેક્ટર (સ્ટ્રેટેજી એન્ડ કેમ્પેન્સ) તરીકે આપતો હતો. જમ્મુ-કાશ્મીર પોલીસને મળેલી ગુપ્ત માહિતી બાદ પોલીસે આ કાર્યવાહી કરી હતી. શ્રીનગરની એક સ્થાનિક કોર્ટે ગુરુવારે (16 માર્ચ) કિરણને ન્યાયિક કસ્ટડીમાં મોકલી દીધો. આ વ્યક્તિ પોતાને પીએમઓ ઓફિસર ગણાવતો હતો.
શું હતો સમગ્ર મામલો ?
જમ્મુ-કાશ્મીરમાં પોલીસે એક એવા ઠગની ધરપકડ કરી હતી, જે પોતાને PMO ઓફિસર ગણાવતો હતો. ગુજરાતમાં રહેતા આ વ્યક્તિનું નામ કિરણ પટેલ છે. તે પોતાને PMOના એડિશનલ ડાયરેક્ટર તરીકે ઓળખાવતો હતો. આટલું જ નહીં ઠગ Z પ્લસ સિક્યોરિટી, બુલેટપ્રૂફ એસયુવીની સુવિધાઓ પણ લઈ ગયો હતો. તે હંમેશા ફાઈવ સ્ટાર હોટલમાં રહેતો હતો. પોલીસે શંકાના આધારે તપાસ કરી તો તે નકલી અધિકારી હોવાનું બહાર આવ્યું હતું. તેની 15 દિવસ પહેલા ધરપકડ કરવામાં આવી હતી, પરંતુ તેને ગુપ્ત રાખવામાં આવી હતી. જોકે પોલીસે ગુરુવારે ધરપકડનો ખુલાસો કર્યો હતો.