ખેડામાં શિક્ષક ભરતી કૌભાંડ મામલે અંતે પોલીસે ફરિયાદ નોંધાઈ. નડિયાદ પશ્ચિમ પોલીસે કે.એન. બામણીયા સામે ગુનો નોંધી વધુ તપાસ હાથ ધરી દીધી છે.
ખેડામાં શિક્ષક ભરતી કૌભાંડમાં VTVના અહેવાલની અસર
શિક્ષક ભરતી કૌભાંડમાં ફરિયાદ નોંધાઇ
દિવ્યંગતાના ખોટા સર્ટી આધારે 13 લોકોને અપાઈ હતી નોકરી
ખેડા જિલ્લામાં વિદ્યાસહાયકોની ભરતી કૌભાંડ પ્રકાશમાં આવતાં ચકચાર મચી હતી. જોકે આ કૌભાંડનો રેલો પૂર્વ જિલ્લા પ્રાથમિક શિક્ષણાધિકારી કે.એન. બામણીયાના નીચે આવતાં શિક્ષણ આલમમાં ખળભળાટ મચી જવા પામ્યો હતો. જોકે, લાંબા સમય બાદ અંતે સમગ્ર મામલે આજે આ કૌભાંડ આચરનાર તાત્કાલિન જિલ્લા પ્રાથમિક શિક્ષણાધિકારી કે.એન.બામણીયા સામે નડિયાદ પશ્ચિમ પોલીસમા એફ આઈ આર દાખલ કરવામાં આવી છે. આ અધિકારીએ વર્ષ 2009-10મા કુલ 141 વિદ્યા સહાયકોની ભરતી કરી હતી. સત્તાનો દુરૂપયોગ કરી ખોટા રેકોર્ડ તૈયાર કર્યા હતા. સમગ્ર કૌભાંડમાં 13 જેટલા ઉમેદવારોને ગેરરીતિ આચરી ઉમેદવારોને સરકારી નોકરી અને પગાર ભથ્થાનો લાભ મળે તે હેતુસર નિમણૂંક આપી હોવાનું ખુલ્યું હતું.
શિક્ષણ આલમમાં મચી ગયો હતો ખળભળાટ
વર્ષ 2009-10માં ખેડા જિલ્લામાં જિલ્લા પ્રાથમિક શિક્ષણાધિકારી તરીકે ફરજ બજાવતા કે.એન. બામણીયાએ વિદ્યા સહાયકોની ભરતી કરી હતી. જેમાં પોતે રાજ્ય સેવક તરીકે હતા. આ ભરતીમાં ગેરરીતિ આચરી લગભગ 13 જેટલા ઉમેદવારોને ખોટી રીતે ખોટા દસ્તાવેજો રેકોર્ડ ઊભા કરી સિધી ભરતી કરી દીધી હતી. આ કૌભાંડ થોડા વર્ષો અગાઉ ઉજાગર થતા શિક્ષણ આલમમાં ખળભળાટ મચી જવા પામ્યો હતો. સમગ્ર મામલે તપાસ કરવામાં આવતાં અંતે પૂર્વ જિલ્લા પ્રાથમિક શિક્ષણાધિકારીનો કૌભાંડનો ભાંડો ફૂટ્યો હતો.
21મી ડિસેમ્બર 2009ના રોજ થઈ હતી ભરતીની જાહેરાત
ઉપરોક્ત 2009-10ના વર્ષમાં જિલ્લા શિક્ષણ સમિતિ ખેડા જિલ્લા પંચાયત નડિયાદ દ્વારા વિદ્યા સહાયક ભરતીમાં કુલ 141 વિદ્યા સહાયકોની ભરતી માટેની જાહેરાત 21મી ડિસેમ્બર 2009ના રોજ કરવામાં આવી હતી. જે બાદ નિમણૂંક પામેલા વિદ્યા સહાયકની નિમણૂકને પાંચ વર્ષ પૂર્ણ થતા આ કચેરી દ્વારા નિયમિત પગાર ધોરણમાં સમાવવા અંગેની કાર્યવાહી કરવામાં આવી હતી. જેમાં કુલ 10 વિદ્યાસહકોનો નિમણૂંક આપવામાં આવી હતી. પરંતુ તેઓના નામ મેરીટ યાદી તેમજ પ્રતિક્ષા યાદીમાં નહોતા. 6 ફેબ્રુઆરી 2016ના રોજ તાત્કાલિક જિલ્લા પ્રાથમિક શિક્ષણ અધિકારી દ્વારા વિદ્યા સહાયકોને નિયમિત પગાર ધોરણમાં સમાવ્યા હતા. ઉપરાંત વર્ષ 2018માં પણ વધુ 3 ઉમેદવારોએ આ રીતે લાભ લીધો હોવાનું પ્રકાશમાં આવ્યું હતું.
ભરતી મામલે સમગ્ર કૌભાંડ ઉજાગર થયું
આમ કુલ 13 વિદ્યા સહાયકોની ખોટી ભરતી મામલે સમગ્ર કૌભાંડ ઉજાગર થયું હતું. વર્ષ 2020માં તપાસ અહેવાલોના ધમધમાટ શરૂ થતા તપાસના અંતે કુલ 13 ઉમેદવારોની નિમણૂકમાં ગેરરીતિ થયેલાનું સ્પષ્ટ પણે બહાર આવ્યું હતું અને આ સમગ્ર કૌભાંડનો કરતા હર્તા પૂર્વ જિલ્લા પ્રાથમિક શિક્ષણ અધિકારી કે.એન. બામણીયા હતા. આ અધિકારીએ પોતે રાજ્ય સેવક હોય પોતાની સત્તાનો દુરુપયોગ કરી ખોટા રેકોર્ડ તૈયાર કરી સહીઓ કરી પુરાવા તરીકે કુલ 13 જેટલા ઉમેદવારોને ગેરરીતી આચરી ઉમેદવારોને સરકારી નોકરી તથા પગાર ભથ્થાનો લાભ મળે તે હેતુસર નિમણૂક આપેલ હતી.
પોલીસે ગુનો નોંધી વધુ તપાસ હાથ ધરી
આ બાબતે નાયબ શિક્ષણ નિયામક ગાંધીનગરની કચેરી સૂચના અનુસાર કેસની ગંભીરતાને ધ્યાને લઈ હાલના નાયબ જિલ્લા પ્રાથમિક શિક્ષણાધિકારી ખેડા જિલ્લા પંચાયત નડિયાદના ઉમેશકુમાર માછીએ તે સમયના તત્કાલીન જિલ્લા પ્રાથમિક શિક્ષણાધિકારી અને હાલ નિવૃત કે.એન.બામણીયા સામે નડિયાદ પશ્ચિમ પોલીસમા ફરિયાદ નોંધાવી છે. પોલીસે આરોપી કે.એન. બામણીયા સામે ગુનો નોંધી વધુ તપાસ હાથ ધરી દીધી છે.