ફરિયાદ / ‘મારી પત્નીને મેસેજ કેમ કરે છે?’ કહી હોકી ફટકારી યુવકનું માથું ફોડી નાખ્યું, અમદાવાદની ઘટના

• યુવક પર હોકી વડે હુમલો કરતાં નોંધાઈ ફરિયાદ
• પત્નીને મેસેજ કરતા પતિએ યુવકને ધમાર્યો
• તું મારી પત્નીને મેસેજ કેમ કરે છેઃ ગાળો બોલીને કહ્યું

બે શખ્સો પૈકી એકની પત્નીને યુવક મેસેજ કરતો હતો, જેના કારણે મામલો બીચક્યો હતો. યુવક પાન પાર્લરમાં ગયો હતો ત્યારે બંને શખ્સો આવ્યા હતા અને ગાળો બોલીને કહ્યું હતું કે તું મારી પત્નીને મેસેજ કેમ કરે છે.

એલિસબ્રિજ પોલીસ સ્ટેશનમાં ફરિયાદ
પાલડી વિસ્તારમાં આવેલા સુખીપુરામાં રહેતા અને કુરિયર કંપનીમાં નોકરી કરતા વિજય પરમારે એલિસબ્રિજ પોલીસ સ્ટેશનમાં હર્ષ રાઠોડ અને રાહુલ પરમાર વિરુદ્ધ મારામારીની ફરિયાદ કરી છે. ગઇ કાલે રાતે વિજય પાલડીમાં આવેલા સુગંધ પાન પાર્લરમાં મસાલો ખાવા માટે ગયો હતો ત્યારે હર્ષ રાઠોડ અને રાહુલ નામના બે યુવકો આવ્યા હતા. બંને યુવકો સુખીપુરામાં રહે છે.

ગાળો બોલવાની ના પાડતા હુમલો
બંને શખ્સોએ આવીને ગાળો બોલીને કહ્યું હતું કે તું મારી પત્નીને મેસેજ કેમ કરે છે. વિજયે ગાળો બોલવાની ના પાડતાં બંને શખ્સોએ તેમની પાસે રહેલી હોકી વડે તેના પર હુમલો કરી દીધો હતો. હર્ષે વિજયના માથામાં હોકી મારતાં તેને લોહી નીકળવાનું શરૂ થઇ ગયું હતું, જ્યારે તેનો મોબાઇલ ફોન પર તૂટી ગયો હતો.

ઈજાગ્રસ્તને હોસ્પિટલમાં ખસેડાયો
પાન પાર્લરના મા‌લિક સહિતના લોકોએ વિજયને વધુ માર ખાતાં બચાવી લીધો હતો ત્યારે હર્ષે ધમકી આપી હતી કે જો હવે પછી મારી પત્નીને મેસેજ કરીશ તો તને જાનથી મારી નાખીશ. ઇજાગ્રસ્ત વિજયને સારવાર માટે હોસ્પિટલ ખસેડવામાં આવ્યો હતો.