અમદાવાદની એક આઈટી કંપનીએ પોતાના 13 કર્મનિષ્ઠ કર્મચારીઓને મોંઘીદાટ કાર ગિફ્ટમાં આપી છે, કંપની માટે સારું કામ કરવાથી અને એક જ કંપની સાથે જોડાઈ રહેવાથી કામની કદર કરાઈ.
અમદાવાદમાં એક કંપનીએ કર્મચારીઓને કાર ગિફ્ટ કરી
આઈટી કંપનીએ પોતાના 13 કર્મનિષ્ઠ કર્મચારીઓને કારની ગિફ્ટ આપી
5 વર્ષમાં જે પણ કમાયા છીએ તે કર્મચારીઓની મહેનતથી કમાયા: કંપનીના એમ ડી
એક તરફ દુનિયાની મોટી મોટી કંપનીઓ કર્મચારીઓને નોકરીમાંથી છુટા કરી રહી છે. કોરોનાકાળ પછી કર્મચારીઓને નોકરી અને પ્રમોશનનો પણ પ્રોબ્લેમ જોવા મળી રહ્યો છે ત્યારે અમદાવાદની એક ખાનગી કંપનીના કર્મચારીઓને જાણે લોટરી લાગી હોય તેવા સમાચાર સામે આવ્યા છે. આ કંપનીએ પોતાના 13 કર્મનિષ્ઠ કર્મચારીઓને મોંઘીદાટ કાર ગિફ્ટમાં આપી છે. જાણો શુ છે.
મોંઘીદાટ કાર ગિફ્ટ કરાઈ
એવું કહેવાય છે કે, કર્મનિષ્ઠ કર્મચારીએ કંપનીની મૂડી હોય છે અને આ કર્મચારીઓનાં વિશ્વાસ અને કામને પ્રોત્સાહિત કરવાની અમદાવાદની એક ખાનગી કંપનીની અનોખી પહેલ જોવા મળી છે. અમદાવાદની ત્રિધ્યા ટેક નામની આઇટી કંપની દ્વારા તેના 13 કર્મચારીઓને કાર ભેટ આપવામાં આવી છે. કંપનીના એમ ડી રમેશ મરંડે જણાવ્યું કે કંપનીને 5 વર્ષ પૂર્ણ થયા છે. અને 5 વર્ષમાં જે પણ કમાયા છીએ તે કર્મચારીઓની મહેનતનું પરિણામ છે. 13 કર્મચારીઓને વર્ષોથી કંપનીના મિશન પ્રત્યેની તેમની સખત મહેનત અને સમર્પણ માટે પ્રશંસાના પ્રતિક તરીકે સન્માનિત કર્યા છે. જેના ભાગરૂપે કર્મચારીઓને કાર ગિફ્ટ કરી રહ્યા છીએ. અમે બનાવેલી સંપત્તિ અમારા કર્મચારીઓ સાથે વહેંચવામાં દ્રઢપણે વિશ્વાસ રાખીએ છીએ. તેમણે ઉમેર્યું કે આ માત્ર શરૂઆત છે. કર્મચારીઓ માટે ભવિષ્યમાં આવી વધુ પહેલ કરીશું. આવી પહેલથી કર્મચારીઓને કંપની માટે સારી કામગીરી કરવાની અને કંપની સાથે જોડાઈ રહેવાની પ્રેરણા મળશે.
આ કંપનીએ એક દાખલો બેસાડ્યો છે
બીજીતરફ કંપનીની આ પહેલથી કર્મચારીઓમાં પણ ખુશીનો માહોલ જોવા મળ્યો. સાત વર્ષથી કંપનીમાં કામ કરતા કર્મચારીઓએ જણાવ્યું કે સામાન્ય રીતે આઇટી કંપનીઓમાં કર્મચારીઓ એક બે વર્ષમાં વધુ પગાર મળે તો જોબ ચેન્જ કરી દેતા હોય છે. ત્યારે આ કંપનીએ એક દાખલો બેસાડ્યો છે કે, કંપની માટે સારું કામ કરવાથી અને એક જ કંપની સાથે જોડાઈ રહેવાથી કામની કદર થાય છે. અમારા માટે ખૂબ સારો અનુભવ રહ્યો છે.
મહત્વનુ છે થોડા વર્ષો પહેલા સુરતના ડાયમંડ કિંગ ગણાતા ઉધોગપતિ સવજી ધોળકિયા દ્વારા પણ પોતાના કર્મચારીઓને કાર ગિફ્ટ કરાઈ હતી ત્યારે અમદાવાદની આ કંપનીના માલિકે કર્મચારીઓ માટે કાર ગિફ્ટ આપી અનોખી પહેલ કરી છે.