અમેરિકામાં ગેરકાયદેસર ઘૂસણખોરી દરમિયાન થયેલા યુવકના મૃત્યુની તપાસ CID ક્રાઈમને સોંપવામાં આવી છે. તપાસ દરમિયાન કૈતુર પટેલ નામના એજન્ટનું નામ સામે આવ્યું છે.
અમેરીકામાં ગેરકાયદે ઘૂસણખોરી દરમિયાન મોતનો મામલો
બ્રિજ યાદવના મોત મામલે હવે CID ક્રાઈમને તપાસ સોંપાઈ
કૈતુર પટેલ નામના એજન્ટનું નામ તપાસમાં ખુલ્યું
એજન્ટ ભૂગર્ભમાં ઉતરી જતા પોલીસે શોધખોળ શરૂ કરી
અમેરિકા જવાની ઘેલછામાં વધુ એક પરિવારમાં માતમ છવાયો છે. ડિંગુચાના એક જ પરિવારના ચાર સભ્યોના અમેરિકામાં ગેરકાયદેસર ઘૂસણખોરી કરતા મૃત્યુ થયા હતા, ત્યારે ફરી કલોકનો પરિવાર પણ એજન્ટના ચક્કરમા ફસાયો છે. અમેરિકામાં ગેરકાયદેસર ઘૂસણખોરી દરમિયાન મૃત્યુની તપાસ CID ક્રાઈમને સોંપવામાં આવી છે. તપાસ દરમિયાન કૈતુર પટેલ નામના એજન્ટનું નામ સામે આવ્યું છે. એજન્ટ ભૂગર્ભમાં ઉતરી જતા પોલીસે શોધખોળ શરૂ કરી છે.
'ટ્રમ્પ વોલ' પરથી નીચે પડી જતાં યુવકનું મૃત્યુ
કલોલના છત્રાલમાં રહેતા બ્રિજકુમાર યાદવ, તેમના પત્ની પૂજાબેન અને 3 વર્ષના દીકરા તન્મ્યની સાથે ગેરકાયદેસર રીતે અમેરિકા ગયા હતા. આ દરમિયાન અમેરિકા- મેક્સિકો બોર્ડર પર આવેલી 30 ફૂટ ઊંચી 'ટ્રમ્પ વોલ' પરથી નીચે પડી જતાં બ્રિજકુમાર યાદવનું મૃત્યુ થયું હતું, જ્યારે તેમની પત્ની તેમજ પુત્રને ગંભીર ઈજા પહોંચી છે. મળતી માહિતી પ્રમાણે, બ્રિજકુમારની ઉંમર 36 વર્ષની છે, પત્ની પૂજાની ઉંમર 34 વર્ષની છે અને બાળક તન્મ્યની ઉંમર ત્રણ વર્ષની છે. આ ઘટનાથી બ્રિજ કુમારના પરિવારમા માતમ છવાયો છે. જેઓ પોતાના દિકરાનો મૃતદેહ અને પરિવાર સલામત આવે તેવી માંગ કરી રહ્યા છે.
પોલીસે શરૂ કરી તપાસ
આ સમાચાર સામે આવ્યા બાદ ગુજરાત પોલીસ એક્ટિવ થઈ ગઈ હતી. ઉત્તર ગુજરાતના કેટલાક એજન્ટો અને તેમની ગેંગ આ પ્રકારે મેક્સિકો બોર્ડરથી લોકોને અમેરિકામાં ગેરકાયદે પ્રવેશ કરાવવા માટેનું રેકેટ ચલાવે છે. હવે આ ગેંગના મૂળ સુધી જવા પોલીસ અગાઉના એજન્ટોનું કનેક્શન તેમજ અગાઉ જે ડિંગુચાનો પરિવાર મૃત્યુ પામ્યો હતો તેના એજન્ટ સાથે આ કનેક્શન છે કે નહીં તે શોધવા સક્રિય બની હતી.
કૈતુર પટેલ નામના એજન્ટનું નામ સામે આવ્યું
આ કેસમાં કલોલમાં ઈમિગ્રેશનનું કામ કરતા કૈતુર પટેલ નામના એજન્ટનું નામ સામે આવ્યું છે. કલોલમા એકાઉન્ટન્ટ તરીકે નોકરી કરતા બ્રિજ કુમારે કલોલમાં ઈમિગ્રેશનનું કામ કરતા કૈતુર પટેલ નામના એજન્ટની મદદથી અમેરિકામાં ગેરકાયદે રીતે ઘુસણખોરી કરવા માટે રૂપિયા સવા કરોડમા ડીલ કરી હોવાનું ખુલ્યું છે. જેથી આ સમગ્ર મામલે મામલતદાર કચેરીથી પરિવારનું નિવેદન લઈને તપાસ કરવામાં આવી હતી અને કેસની તપાસ સીઆઈડી ક્રાઈમને સોપાવમાં આવી છે. આ ઘટના બાદ એજન્ટ કૈતુર પટેલ ભુગર્ભમા જતો રહેતા પોલીસે તપાસ શરૂ કરી છે.
એજન્ટને શોધવા CID ક્રાઈમે ટીમની કરી રચના
મહત્વનુ છે કે, કલોલ અને ઉત્તર ગુજરાતમાં ગેરકાયદેસર અમેરિકામાં ઘૂસણકોરીને લઈને એજન્ટનું મોટુ નેટવર્ક ચાલી રહ્યું છે. આ નેટવર્કને લઈને ગૃહવિભાવે તપાસના આદેશ આપ્યા છે. ત્યારે ડિગુચા કાંડના એજન્ટ બાદ હવે કલોલના આ એજન્ટને શોધવા સીઆઈડી ક્રાઈમે ટીમની રચના કરી તપાસ તેજ કરી છે.