સાવધાન / બકરું કાઢતા ઊંટ પેઠું: ભાવનગરના ગારીયાધારમાં હવે આ બીમારીએ માથું ઉંચકતા ચિંતા, જાણી લો લક્ષણો

• ભાવનગરના ગારીયાધારમાં કોંગો ફીવરનો કેસ નોંધાયો
• શિવેન્દ્રનગરમાં કોંગો ફીવરનો કેસ નોંધાતા આરોગ્ય વિભાગમાં ખળભળાટ
• જિલ્લામાં સિઝનમાં કોંગો ફીવરના 5 દર્દી પૈકી 2ના થયા છે મૃત્યુ

અમુક હદે જીવલેણ ગણાતા કોંગો ફીવરે ફરી ભાવનગર જિલ્લામાં દેખા દીધી છે. ગારિયાધાર તાલુકામાં કોંગો ફીવરનો એક કેસ નોંધાયો છે. કોંગોએ દેખા દેતા જિલ્લા આરોગ્ય તંત્ર દોડતું થયું છે.

22 વર્ષીય યુવાનને સારવાર માટે ખસેડાયો

ગારિયાધાર તાલુકાના શિવેન્દ્રનગરમાં રહેતો 22 વર્ષીય યુવાન કોંગો ફીવરમાં સપડાતા તેને સારવાર માટે ભાવનગરની સર તખ્તસિંહજી હોસ્પિટલમાં ખસેડવામાં આવ્યો છે. મહત્વનું છે કે, ભાવનગર જિલ્લામાં આ સિઝનમાં કોંગો ફીવરના કુલ 5 જેટલા કેસ નોંધાય છે. જૈ પૈકી 2 દર્દીઓના મોત થયા છે. જ્યારે 2 દર્દીઓ સાજા થઈને ઘરે પરત ફર્યા છે. એક દર્દીની હજુ હોસ્પિટલમાં સારવાર ચાલી રહી છે. 

નોંધનીય છે કે, ગત 03 ઓક્ટોબરના રોજ સિહોર પંથકના પાંચવડા ગામનો યુવાન કોંગો ફીવરમાં સપડાતા તેને સારવાર માટે હોસ્પિટલમાં ખસેડવામાં આવ્યો હતો. કોંગોનો કેસ નોંધાતા આરોગ્યની ટીમ પાંચવડા ગામે દોડી ગઈ હતી અને તકેદારી પગલાં ભરવા શરૂ કર્યા હતા.

કેવી રીતે પડ્યું કોંગો નામ?

1969માં કોંગો દેશમાં મોટા પ્રમાણમાં આ વાયરસ ફેલાયો. અનેક લોકોને તેના કારણે સખત તાવ આવ્યો. આ કારણે તે કોંગો ફીવરના નામે ઓળખવવા લાગ્યો.

શેનાથી ફેલાય છે?

• પશુઓથી ફેલાય છે આ રોગ
• પશુઓની ચામડી પર ચોંટેલા હનીમોરલ નામના પરજીવી રોગનું વાહક છે.
• ઈતરડીના કરડવાથી તેની અસર થાય છે.
• ઈતરડી ગાય અને ભેંસના પૂછડામાંથી ફેલાય છે. 
• માલધારી અને પશુ પાલકોને આ રોગ થવની શક્યતા વધારે રહે છે.

કોંગો ફીવરના લક્ષણો

• તાવ આવવો
• માંસપેશીમાં દર્દ થવું
• માથાનો દુઃખાવો રહેવો
• ચક્કર આવવા
• પીઠનું દર્દ થવું
• આંખોમાં બળતરા થવી
• ગળું બેસી જવું
• ઝાડા ઉલટી થવા
• શરીરના છિદ્રોમાંથી લોહી આવવું
• શરીર પર લાલ ચકામા થવા
• 3થી 9 દિવસમાં ફેલાય છે વાયરસના લક્ષણો.

ઉપાય

જ્યારે પણ તમને આ પ્રકારના લક્ષણો દેખાય ત્યારે તરત જ તમારા ફેમિલી ડોક્ટરનો કે અન્ય ડોક્ટરનો સંપર્ક કરવો. તરત જ તમામ તપાસ કરાવીને તેની ટ્રીટમેન્ટ શરૂ કરી દેવી જરૂરી છે. જો સમયસર ટ્રીટમેન્ટ ન મળે તો તે જીવલેણ બની શકે છે.