ગુજરાતી ફિલ્મ પ્રોડ્યૂસરની છેતરપિંડી મામલે ચોંકાવનારો ખુલાસો થયો છે. ઈકો સેલની તપાસમાં સામે આવ્યું છે કે, પ્રોડ્યૂસરની ગેંગે મહારાષ્ટ્રમાં પણ 9 હજાર લોકોને 50 કરોડનો ચૂનો લગાવ્યો છે. હાલ તમામ આરોપીઓ ફરાર છે.
સુરતમાં ગુજરાતી ફિલ્મ પ્રોડ્યુસર સામે ઠગાઈનો મામલો
પ્રોડ્યુસરની ગેંગે મહારાષ્ટ્રમાં પણ 9 હજાર લોકોને 50 કરોડમાં નવડાવ્યા
ઇકો સેલની તપાસમાં ચોંકાવનારી વિગતો સામે આવી
સુરત ક્રાઈમ બ્રાન્ચમાં ગુજરાતી, પંજાબી અને મરાઠી ફિલ્મના પ્રોડ્યુસર મુન્ના શુક્લા અને તેના સાગરિતો વિરૂદ્ધ છેતરપિંડીની ફરિયાદ નોંધાવવામાં આવી હતી. ફિલ્મ પ્રોડ્યુસર પ્રદીપ ઉર્ફે મુન્ના સહિત અન્ય 6 લોકોએ પોન્ઝી સ્કીમ બતાવી અનેક લોકો ઠગાઈ કરી છે. ઠગ ટોળકી દ્વારા રોકાણકારોને મહિને 4 ટકા વળતરની લાલચ આપી છેતરપિંડી આચરતા રોકાણકારોએ આ અંગે ક્રાઈમ બ્રાન્ચમાં ફરિયાદ નોંધાવી હતી. બાબતે ઈકો સેલે તપાસ હાથ ધરતા આ ઠગ ટોળકી દ્વારા માત્ર ગુજરાતમાં જ નહીં પરંતુ મહારાષ્ટ્રમાં પણ વિવિધ સ્કીમોના નામે કરોડો રૂપિયાનું કૌભાંડ આચર્યું હોવાનું બહાર આવવા પામ્યું છે. આ મામલે ઈકો સેલની તપાસમાં ચોંકાવનારી હકીકત સામે આવી છે.
ત્રણ સાગરીતોની કરાઈ હતી ધરપકડ
પોલીસે ટોળકીના ત્રણ સાગરીતોની ધરપકડ કરી હતી. વિમલ પંચાલ, મયૂર નાવડિયા અને હેપ્પી કાનાણી પૂછપરછમાં ચોંકાવનારા ખુલાસા થયા છે. પૂછપરછમાં સામે આવ્યું છે કે, પ્રોડ્યૂસરની ગેંગે મહારાષ્ટ્રમાં પણ 9 હજાર લોકો સાથે છેતરપિંડી આચરી છે.
50 કરોડમાંથી 2 કરોડની છેતરપિંડીની ફરિયાદ નોંધાઈ
આ ગેંગે 9 હજાર લોકો સાથે 50 કરોડની છેતરપિંડી આચરી છે. છેતરપિંડીનો ભોગ બનેલા 9 હજાર લોકો પોલીસને મળ્યા હતા. 50 કરોડમાંથી 2 કરોડની છેતરપિંડીની ફરિયાદ આરોપી મુન્ના શુક્લા અને તેના સાગરીતો વિરુદ્ધ નોંધાઈ છે.
મુન્ના શુક્લા ફરાર
મુન્ના શુક્લા સામે CID ક્રાઇમમાં પણ 3.50 લાખની છેતરપિંડીની અરજી કરવામાં આવી છે. હાલ આ આરોપીઓ ફરાર છે. પોલીસે તમામને ઝડપી પાડવા માટે ચક્રો ગતિમાન કર્યા છે.
પોલીસ દ્વારા આરોપીની ધરપકડ કરવા કાર્યવાહી હાથ ધરવામાં આવી છે.
ઠગ ટોળકી વિરૂદ્ધ 25 લોકોએ નોંધાવી હતી ફરિયાદ
અત્રે ઉલ્લેખીય છે કે, સુરતમાં રોકાણકારો સાથે રૂ.65 લાખની છેંતરપિંડી મામલે ક્રાઈમ બ્રાન્ચે ફરિયાદ નોંધી તપાસ હાથ ધરી હતી. જાન્યુઆરી 2019માં ભોગ બનનાર વૃદ્ધાએ કંપનીમાં રોકાણ કર્યું હતું. ત્યારે વૃદ્ધાએ રૂ.3.30 લાખનું કંપનીમાં રોકાણ કર્યું હતું. ત્યારે વૃદ્ધાના સગા સબંધીઓ સહિત કુલ 25 લોકોએ રોકાણ કરતા તે તમામ લોકોના રૂ.65 લાખ સલવાયા હતા. રોકાણકારો દ્વારા શુક્લા વેલ્થ એડવાઈઝરી, શુક્લા વેલ્થ ક્રિએટર LLPના નામે મની ફાઉન્ડર અને ડેઈલી ગેટ સહિતની સ્કીમમાં નાણાનું રોકાણ કરાવવામાં આવ્યું હતું. ત્યારે આ બાબતે રોકાણકારો દ્વારા પોલીસ ફરિયાદ નોંધાવતા પોલીસે તપાસ હાથ ધરી હતી.