તમિલનાડુમાં એક વિચિત્ર બાઇક ડીલ સામે આવી છે. અહીં એક યુવક 1-1નો સિક્કો લઈને તેની ડ્રીમ બાઇક ખરીદવા આવ્યો હતો. આ બાઇકની કિંમત 2.6 લાખ હતી. તેણે આટલી કિંમતના સિક્કા આપ્યા. સિક્કા ગણવા માટે 10 કલાકનો સમય લાગ્યો હતો.
1 રૂપિયાના સિક્કા લઈને બાઈક લેવા પહોંચ્યો શખ્સ
શોરૂમના લોકો સિક્કાથી ભરેલી હાથલારી જોઈ ચોંકી ઉઠ્યા
10 કલાક સુધી 9 લોકોએ કરી ગણતરી
એક જૂની કહેવત છે કે ટીપે ટીપે સરોવર ભરાય, પરંતુ તમને કહીએ કે એક-એક રૂપિયાનો સિક્કો જોડીને એક બાઈક ખરીદાય... તો કદાચ તમને વિચિત્ર પણ લાગશે. પરંતુ તે હકીકત છે અને તે તમિલનાડુના એક યુવકે કરી પણ બતાવ્યું છે. આ છોકરાએ 1-1ના સિક્કા ભેગા કરીને લગભગ 2.6 લાખ રૂપિયા ભેગા કર્યા અને આ સિક્કાઓમાંથી તેણે પોતાની મનપસંદ બાઇક ખરીદી છે.
શોરૂમના લોકો ચોંકી ઉઠ્યા
રિપોર્ટ અનુસાર 29 વર્ષીય વી.બુપથી તમિલનાડુના સાલેમમાં રહે છે. શનિવારે તે બાઇક લેવા માટે બાઇકના શોરૂમ પર પહોંચ્યો હતો. તેને Bajaj Dominar 400 મોડલની બાઇક ખરીદવાની હતી. બાઇક વિશે શોરૂમ સ્ટાફ સાથે વાત કરી, જ્યારે તેઓએ પેમેન્ટ માટે હેન્ડકાર્ટ પર લાવેલી એક મોટી બેગ બહાર કાઢી, તો શોરૂમના લોકો પણ આશ્ચર્યચકિત થઈ ગયા. હકીકતમાં, બુપથી પેમેન્ટ કરવા માટે 1-1 ના સિક્કા લાવ્યા હતા અને આ સિક્કા કુલ 2 લાખ 60 હજાર રૂપિયાના હતા. તે આ સિક્કાઓને પેક કરીને એક નાની હાથગાડીમાં ભરીને વાનમાં લઈને આવ્યો હતો.
સિક્કા ગણવા માટે લાગ્યા 10 કલાક
રિપોર્ટ અનુસાર આ સિક્કાઓની ગણતરી કરવામાં શોરૂમને 10 કલાકનો સમય લાગ્યો હતો. બુપથીએ જણાવ્યું કે તે આ 1 રૂપિયાના સિક્કા 3 વર્ષથી એકત્ર કરી રહ્યો હતો. જ્યારે પણ તેને ચાના સ્ટોલ પર મંદિર પર અથવા અન્ય વસ્તુઓ ખરીદતી વખતે 1 નો સિક્કો મળતો ત્યારે તે તેને ભેગા કરતો હતો.
'છોકરાનું સપનું જોઈને સિક્કા લેવા થયા તૈયાર'
શોરૂમના મેનેજર મહાવિક્રાંતે જણાવ્યું કે પહેલા તો તે આ સિક્કા લેવાની ના પાડી રહ્યા હતા. પરંતુ તે બુપથીને નિરાશ કરવા માંગતા ન હતા. તેથી તે સિક્કાની ડીલ કરવા માટે રાજી થયો. 1 લાખ રૂપિયા જમા કરાવવા માટે બેંક તેમની પાસેથી 140 રૂપિયા ચાર્જ વસૂલશે. પરંતુ તે તેમ છતાં સંમત થયો કારણ કે બુપતિનું આ બાઇક ખરીદવાનું સપનું હતું અને તેના માટે તેણે આ પૈસા એકઠા કર્યા હતા
9 લોકોએ સાથે મળીને કરી સિક્કાની ગણતરી
મહાવિક્રાંતે જણાવ્યું કે સિક્કો મળ્યા બાદ તેણે તેને ગણવાનું કામ શરૂ કર્યું. તેમાં બુપથી, તેના ચાર મિત્રો અને શોરૂમના 5 સ્ટાફે સાથે મળીને કામ શરૂ કર્યું. 10 કલાકની મહેનત બાદ રાત્રે 9 વાગે ગણતરી પૂર્ણ થઈ અને અમે તેને બાઇક આપી. ગાંધી મેદાન અમ્માપેટમાં રહેતા બુપથી એક ખાનગી કંપનીમાં કોમ્પ્યુટર ઓપરેટર તરીકે નોકરી કરે છે. તે યુટ્યુબર પણ છે.
તેણે કહ્યું કે ત્રણ વર્ષ પહેલા તેણે આ બાઇકની કિંમત જાણી લીધી હતી. ત્યારબાદ શોરૂમ દ્વારા તેને કહેવામાં આવ્યું કે તેની કિંમત 2 લાખ રૂપિયા છે. તે સમયે મારી પાસે પૈસા નહોતા, ત્યારબાદ મેં નક્કી કર્યું કે હું એક-એક રૂપિયા જમા કરાવીશ અને આ બાઇક ખરીદીશ. અંતે, જ્યારે મને લાગ્યું કે મેં આટલા પૈસા ભેગા કર્યા છે. ત્યારે મેં ફરીથી બાઈકનો ભાવ કઢાવ્યો. આ વખતે ભાવ વધી ગયો હતો અને શોરૂમના લોકોએ કિંમત 2.6 લાખ જણાવી હતી. પરંતુ મારી પાસે આ વખતે એટલા પૈસા હતા.