બુટલેગરો બેફામ / અમદાવાદમાં પોલીસ સ્ટેશન જ સુરક્ષિત નથી! બુટલેગરોએ કૉન્સ્ટેબલ પર કર્યો હુમલો, જુદી જુદી ટીમો થઈ દોડતી

• અમદાવાદના પોલીસ સ્ટેશનમાં પોલીસ કર્મી અસુરક્ષિત
• વટવા GIDC પોલીસ સ્ટેશનમાં પોલીસ કર્મચારી પર હુમલો
• બુટલેગર બિરબલે હેડ કોન્સ્ટેબલ પોપટભાઈ પર કર્યો હુમલો

રાજ્યમાં દારૂબંધી તો છે પંરતુ ક્યાં તે એક સવાલ છે કારણ કે બુટલેગરો યેનકેન પ્રકારે દારૂનો ધિકતો ધંધો કરતા ખચકાતા નથી. જાણો પોલીસનો કોઇ ડર જ ન હોય તેમ બેફામ બન્યા છે. આવા ગેરકાયદે ગોરખધંધા કરનારાથી જનતા પરેશાન થઇ ગઇ છે. કાયદો અને વ્યવસ્થા હાથમાં લઇને જનતા પર તો રોફ ઝાડે ત્યાં સુધી તો વાત માન્યામાં આવે પરંતુ અહીં તો પોલીસ પર જ બુટલેગર દ્વારા હુમલો કરવામાં આવ્યો. 

બુટલેગરે પોલીસ કર્મી પર કર્યો હુમલો

રાજ્યમાં સેવા શાંતિ અને સુરક્ષા જળવાઇ રહે તે માટે પોલીસ કાર્યરત છે. પરંતુ જ્યારે પોલીસ પર જ હુમલા થતા હોય તો પછી ફરિયાદ કોને કરવી. અમદાવાદમાં બેફામ બનેલા બુટલેગરે પોલીસને પણ ન છોડી.  અમદાવાદના વટવા જીઆઇડીસી પોલીસ સ્ટેશનમાં પોલીસ કર્મી પર હુમલો થયો. ઇજાગ્રસ્ત પોલીસ કર્મીને સારવાર અર્થે ખસેડાયા છે. ઘટનાને પગલે બુટલેગરને શોધવા પોલીસની જુદી જુદી ટીમોએ શોધખોળ શરૂ કરી છે.  મહત્વનું છે કે બુટલેગર અને તેના ભાઇ વચ્ચે ઝઘડો થયો હતો. જેને લઇને બુટલેગરને પોલીસ સ્ટેશનમાં લવાયો હતો. પોલીસે બુટલેગર પર કાર્યવાહી કરતા  પોલીસ પર હુમલો કરવામાં આવ્યો. 

સુરતમાં ફિલ્મી ઢબે બુટલેગરોનો કર્યો પીછો  

સુરતના ઉમરપાડા ટાઉનમાં એક પેટ્રોલપમ્પ પર લાગેલા સી.સી.ટીવીમાં બુટલેગરોએ પોલીસની બાઇકને ટક્કર મારી હોવાનું સામે આવ્યું હતું.  બે પોલીસ કર્મી પોતાની બાઇક નીચે નાખી કાર ઉભી રાખવા પ્રયત્ન કરે છે અને બુટલેગર પોલીસની બાઇકને ટક્કર મારી ભાગી છૂટ્યા હતા. પણ ઉમરપાડા પોલીસે ફિલ્મી ઢબે કારનો પીછો કર્યો . જો  કે બુટલેગરો પોલીસથી બચવા નાસભાગ કરતા રહ્યા પણ ટાઉનમાં પોલીસની નાકાબંધી જોઈ ગભરાયેલા બુટલેગરો શારદા ગામ નજીક કાર મૂકી જંગલમાં ભાગી ગયા.પોલીસે કાર ચેક કરતા કારમાંથી 505 વિદેશી દારૂની બોટલો,બે મોંઘી કાર મળી 13.82 લાખનો મુદ્દામાલ કબ્જે કરી ફરાર બુટલેગરોને પકડવાના ચક્રોગતિમાન કર્યા હતા.