ખંડણી / રડતા સ્વરે મહિલાની આપવીતીઃ બંદૂકના જોરે બુકીએ મકાન લખાવી લીધા બાદ કહ્યું, જો પોલીસ ફરિયાદ કરી તો....

• ભોગ બનનારા પરિવારજનોના આરોપ
• પોલીસ અમારી વાત નથી સાંભળતી-પરિવારજન
• પોલીસ ફરિયાદ કરશો તો માર મારવાની ધમકી-પરિવારજન

અમદાવાદના વાસણામાં એક પરિવારને તેમના જ મકાનમાં બંધી બનાવવાની ઘટના સામે આવી છે. પરિવારના મહિલાને બંદૂકના જોર પર મકાન લખાવી લેવાયું છે. મહિલા અને તેમના બાળકો પર બંદૂક તાકવામાં આવી હતી. સાથે પરિવારને તેમના જ ઘરમાં ગોંધી રાખવામાં આવ્યા હતા. અને ગોળી મારી દેવાની પણ ધમકી આપી હતી. મહિલાએ આપવીતી જણાવતા કહ્યું કે, મારા પતિ સટ્ટામાં 35 લાખ જેવી રકમ હારી ગયા હતા. જે બાદથી અમારા પરિવારને ધમકી આપવામાં આવી રહી છે. ધમકીઓની સાથે હવે પરિવારના સભ્યોને ગોંધી રાખવાની ઘટના સામે આવી છે. 

બુકી શૈલેષે 2018માં બંગલો પડાવી લીધો હતો

ગુજરાતમાં એક એવી ઘટના સામે આવી છે જે જોઈને સલામત ગુજરાતના બધા દાવા પોકળ લાગશે. સટ્ટો એક પરિવારને કેવી રીતે બરબાદ કરી શકે તેનું જીવતું જાગતું ઉદાહણ સામે આવ્યું છે. સુરતના બુકીએ અમદાવાદના વેપારીનું જીવવું હરામ કરી દીધું હતું. પિસ્તોલ બતાવી બુકી શૈલેષના 10 ગુંડાઓએ વાસણાના વેપારી રાજેશ વડેચાના પરિવારને ઘરમાં ગોંધી રાખ્યો હતો. વાસાણાના રાજેશ વડેચા સટ્ટામાં 35 લાખ હાર્યા હતા. અને પૈસા હારી જતા બુકીએ 2018માં બંદુક બતાવી અને બંગલો પડાવી લીધો હતો. 

રાજેશ વડેચાનું 1.5 કરોડનું મકાન પણ પચાવી પાડ્યું

આટલેથી ન અટકતાં 2018માં અવારનવાર પોતાના ગુંડાઓ મોકલતો હતો. અને થોડા દિવસ પહેલા જ વેપારીને અપહરણની ધમકી આપી હતી. જેનો ઓડિયો પણ સામે આવ્યો છે. બુકી શૈલેષ ગાંડાલાલે રાજેશ વડેચાનું 1.5 કરોડનું મકાન પણ પચાવી પાડ્યું. ત્યારે રાજેશ વડેચાએ બુકીના ગુંડાઓથી બચવા પોલીસ બોલાવી પડી. અને ત્યાર બાદ પરિવારનો છૂટકારો થયો. જો કે વાસણા પોલીસે ફરિયાદ લીધા વિના જ ગુંડાઓને જવા દીધા.