અમેરિકામાં ફરી એકવાર ગોળીબારની ઘટના સામે આવી છે. શુક્રવારે વર્જિનિયામાં એક પ્રાઈમરી સ્કૂલમાં વિદ્યાર્થી દ્વારા કરવામાં આવેલા ફાયરિંગમાં એક શિક્ષક ઘાયલ થયા છે. ઉતાવળમાં તે શિક્ષકને હોસ્પિટલમાં દાખલ કરવામાં આવ્યા હતા. જોકે પોલીસે હજુ સુધી આ મામલે વિસ્તૃત માહિતી આપી નથી, પરંતુ પોલીસ અધિકારીઓએ જણાવ્યું કે, આ ઘટના વર્જિનિયાના ન્યૂપોર્ટ શહેરની પ્રાથમિક શાળામાં બની હતી. આ ફાયરિંગમાં કોઈ વિદ્યાર્થીને ઈજા થઈ નથી.
વર્જીનિયાના મેયર ફિલિપ જોન્સે મીડિયાને જણાવ્યું કે, પોલીસે આ મામલામાં એક વિદ્યાર્થીની અટકાયત કરી છે. જોકે અધિકારીઓએ આ વિદ્યાર્થીની ઉંમર કેટલી છે તે જણાવ્યું નથી, પરંતુ મીડિયા રિપોર્ટ્સમાં તે વિદ્યાર્થીની ઉંમર 6 વર્ષ જણાવવામાં આવી રહી છે. ન્યૂપોર્ટ પોલીસ ચીફ સ્ટીવ ડ્રૂનું કહેવું છે કે, અમને ગોળીબારના સંબંધમાં બપોરે 2 વાગ્યે કોલ પર માહિતી મળી હતી. માહિતી મળતા જ અમારી ટીમ ઘટનાસ્થળે પહોંચી ગઈ હતી.
US: Six-year-old boy in custody for shooting teacher at elementary school in Virginia
શિક્ષક અને વિદ્યાર્થી વચ્ચે બોલાચાલી થઈ હતી
અધિકારીએ કહ્યું કે, શિક્ષક અને વિદ્યાર્થી વચ્ચે બોલાચાલી થઈ હતી. વિદ્યાર્થી પાસે બંદૂક હતી અને તેણે શિક્ષક પર એક રાઉન્ડ ફાયરિંગ કર્યું હતું. પોલીસે જણાવ્યું કે, આ ઘટનામાં અન્ય કોઈ વિદ્યાર્થીઓ સામેલ નથી. તેમણે વધુમાં કહ્યું કે, આ મામલાની તપાસ કરવામાં આવી રહી છે. પોલીસ વિભાગ આ કેસમાં મદદ માટે કોમનવેલ્થ એટર્ની અને અન્ય સંખ્યાબંધ એજન્સીઓના સંપર્કમાં છે.
આ સાથે પોલીસે જણાવ્યું હતું કે, શાળા અને પોલીસ અધિકારીઓ વિદ્યાર્થીઓ અને પરિવારોને ફરીથી જોડવા માટે કામ કરી રહ્યા છે અને વધુ તપાસ પછી વધુ માહિતી આપવામાં આવશે. હાલ પોલીસ શકમંદ વિશે કોઈ માહિતી આપી શકતી નથી. ન્યૂપોર્ટ શહેરમાં જ્યાં આ ફાયરિંગની ઘટના બની છે, તેની વસ્તી 1 લાખ 85 હજારથી વધુ છે. આ શહેર ચેસાપીક અને વર્જિનિયા બીચથી લગભગ 40 માઈલ દૂર છે. આ શહેર યુએસ નેવી માટે શિપબિલ્ડીંગ માટે પણ જાણીતું છે.
ગુરુવારે પણ બની હતી ફાયરિંગની ઘટના
અમેરિકાના ફ્લોરિડાના મિયામી ગાર્ડનમાં એક રેસ્ટોરન્ટની બહાર ગુરુવારે સાંજે અનેક લોકો પર અંધાધૂંધ ગોળીબાર કરવામાં આવ્યો હતો. આ ગોળીબારમાં હુમલાખોરે અત્યાર સુધીમાં 10 લોકોને ગોળી મારી છે. મીડિયા રિપોર્ટ્સ અનુસાર, આ ઘટના ધ લિકિંગ રેસ્ટોરન્ટમાં બની હતી. તેણે પુષ્ટિ કરી કે ઘણા લોકોને ગોળી વાગી હતી. એક સાક્ષીએ જણાવ્યું કે, રેસ્ટોરન્ટના પાર્કિંગમાં જ્યારે રેપર ફ્રેન્ચ મોન્ટાના માટે એક મ્યુઝિક વીડિયો શૂટ ચાલી રહ્યું હતું ત્યારે ગોળીબાર થયો હતો. પ્રત્યક્ષદર્શીએ જણાવ્યું કે, ઓછામાં ઓછા 10 થી 15 ગોળીબાર સંભળાયો અને લોકો અહીં-ત્યાં દોડવા લાગ્યા
અમેરિકામાં ગોળીબારની ઘટનાઓ સતત વધારો
અમેરિકામાં ગોળીબારની ઘટનામાં સતત વધારો થઈ રહ્યો છે. ગયા વર્ષે એટલે કે 2022માં આવા ફાયરિંગમાં સેંકડો લોકોના મોત થયા છે. ફાયરિંગની આ ઘટનાઓ હોસ્પિટલ, પબ, મેટ્રો સ્ટેશન અને અન્ય જાહેર સ્થળો પર બની છે. અમેરિકા માટે આ એટલી મોટી સમસ્યા છે કે તેના વિશે ખુદ રાષ્ટ્રપતિ જો બિડેને કહ્યું છે કે દેશમાં હથિયારોને લઈને કડક નિર્ણય લેવાની જરૂર છે.