ચેતવણીરૂપ કિસ્સો / અમદાવાદના વસ્ત્રાપુરમાં પાર્કમાં રમવા ગયેલ 5 વર્ષીય બાળક ગુમ, મોડે સુધી ઘરે ન આવતા પરિવારનો જીવ અદ્ધર

• અમદાવાદના વસ્ત્રાપુરમાં પાર્કમાં રમવા ગયેલો બાળક ગુમ
• પાંચ વર્ષનો બાળક ઘર પાસેના પાર્કમાં ગયો હતો રમવા
• પરિવારે વસ્ત્રાપુર પોલીસ સ્ટેશનમાં નોંધાવી ફરિયાદ

અમદાવાદના વસ્ત્રાપુરમાંથી માતા-પિતા માટે ચેતવણીરૂપ કિસ્સો સામે આવ્યો છે. વસ્ત્રાપુરમાં પાર્કમાં રમવા ગયેલો 5 વર્ષનો બાળક ગુમ થઈ ગયો છે. બાળક મોડે સુધી ઘરે ન આવતા પરીવારે શોધખોળ શરૂ કરી હતી. જોકે,  ગુમ બાળકની કોઈ ભાળ ન મળતા તેના પરિવારજનોએ પોલીસ સ્ટેશનમાં ફરિયાદ નોંધાવી છે.

ઘર પાસેના પાર્કમાં રમવા ગયો હતો બાળક
મળતી માહિતી અનુસાર, શહેરના વસ્ત્રાપુર વિસ્તારમાં આવેલા વિરતા પબ્લિક પાર્ક પાસે રહેતો સોનું શાહ (ઉં.વ 5) નામનો બાળક ગત શનિવારે સાંજે ઘર પાસે આવેલા પાર્કમાં રમવા માટે ગયો હતો. સોનું મોડે સુધી ઘરે પરત ન આવતા પરિવારજનો પાર્કમાં પહોંચ્યા હતા.

પરિવારે વસ્ત્રાપુર પોલીસ સ્ટેશનમાં નોંધાવી ફરિયાદ
પરિવારે પાર્ક અને આજુબાજુમાં તેની શોધખોળ કરી હતી. પરંતુ સોનું મળી આવ્યો નહોતો. મોડી રાત સુધી તેનો કોઈ અત્તોપત્તો ન લગાતા પરિવારજનો વસ્ત્રાપુર પોલીસ સ્ટેશન ખાતે પહોંચ્યા હતા. પરિવારે આ વસ્ત્રાપુર પોલીસ સ્ટેશનમાં ફરિયાદ નોંધાવતા પોલીસે બાળકને શોધવાની તજવીજ હાથ ધરી છે. 

રઘુવીર સ્કૂલમાંથી ગુમ થઈ ગયો હતો ધોરણ-9નો વિદ્યાર્થી 
અત્રે ઉલ્લેખનીય છે કે, ગયા મહિને અમદાવાદના ઠક્કરબાપા નગર વિસ્તારમાં આવેલી એક શાળામાંથી ધોરણ-9નો વિદ્યાર્થી ગુમ થઈ જતાં પરિવારજનોએ હોબાળો મચાવ્યો હતો. વિદ્યાર્થીના પરિવારે શિક્ષકના ઠપકા બાદ વિદ્યાર્થી ગુમ થયાનો આક્ષેપ લગાવ્યો હતો. જોકે, ઠક્કરબાપાની સ્કૂલમાંથી ગાયબ થયેલો વિદ્યાર્થી આખરે શનિવારે મોડી રાત્રે કાલુપુર રેલવે સ્ટેશન પરથી હેમખેમ મળી આવતા પરિવારે રાહનો શ્વાસ અનુભવ્યો હતો.