સૈયદ મુશ્તાક અલી ટ્રોફીની મેચમાં મુંબઈ અને કેરળ હતા આમને સામને
મુંબઈના ઓપનર 19 વર્ષીય યશસ્વી જયસ્વાલે કેરળના અનુભવી બોલર શ્રીસંત ની ઓવરમાં ચોગ્ગા અને છગ્ગા ફટકાર્યા હતા. સૈયદ મુશ્તાક અલી ટ્રોફી ટૂર્નામેન્ટમાં બુધવારે મુંબઇ અને કેરળ વચ્ચે રમાયેલી મેચમાં ટોસ જીતીને મુંબઈએ પ્રથમ બેટિંગ કરવાનો નિર્ણય કર્યો હતો. ઓપનિંગ બેટ્સમેન યશસ્વી જયસ્વાલ અને આદિત્ય તારે વચ્ચે 88 રનની ભાગીદારી થઈ હતી અને મુંબઈએ શાનદાર શરૂઆત કરી હતી. યુવા બેટ્સમેન યશસ્વીએ શ્રીસંતની ધોલાઈ કરીને 32 બોલ્ડ પર 4 ચોક્કા અને 2 છગ્ગાની મદદથી 40 રન બનાવ્યા હતા.
શ્રીસંતની બોલિંગ પર મચાવ્યો તરખાટ
છઠ્ઠી ઓવરમાં યશસ્વીએ શ્રીસંત ની બોલિંગ પર તરખાટ મચાવ્યો. તેણે ત્રણ બોલમાં 16 રન લીધા. જેમાં પ્રથમ બોલ ડોટ હતો. શ્રીસંત ની ઓવરના બીજા બોલ પર યશસ્વીએ સિક્સર ફટકારી હતી. ત્રીજી બોલ પર સતત બીજી સિક્સર ફટકારી હતી. જેના પછીના બોલ પર એક ચોકકો, આમ આ ઓવરમાં શ્રીસંતે કુલ 18 રન આપ્યા હતા.
સાત વર્ષ પછી મેદાન પર પાછો ફર્યો શ્રીસંત
શ્રીસંત સાત વર્ષ બાદ પુડુચેરી સામે 11 જાન્યુઆરીએ ક્રિકેટ મેદાન પર પાછો ફર્યો હતો. તેણે ચાર ઓવરમાં 29 રન આપીને એક વિકેટ લીધી હતી. તેણે પુડુચેરીના બેટ્સમેન ફાબિદ અહેમદને આઉટસ્વિંગ બોલ્ડ કર્યો. વિકેટ લીધા બાદ શ્રીસંત ભાવુક થઈ ગયો હતો. મેચ ફિક્સિંગના આરોપો પછી સાત વર્ષના પ્રતિબંધનો સામનો કરીને શ્રીસંતની આ પહેલી ટૂર્નામેન્ટ છે.
શ્રીસંત પર મૂકાયો હતો પ્રતિબંધ
શ્રીસંત પર IPL માં સ્પોટ ફિક્સિંગમાં સામેલ થવા બદલ ભારતીય ક્રિકેટ બોર્ડ BCCI દ્વારા પ્રતિબંધ મૂકાયો હતો. મેચ સમાપ્ત થયા પછી, તેમણે ટ્વિટર પર ચાહકોનો પ્રેમ આપવા બદલ આભાર માન્યો. 2007 અને 2011 માં વર્લ્ડ કપ જીતનાર ભારતીય ટીમનો ભાગ રહેલા શ્રીસંતે કહ્યું હતું કે આ તો શરૂઆત છે. શ્રીસંતે આંતરરાષ્ટ્રીય ક્રિકેટમાં પ્રતિબંધ મુકતા પહેલા 27 ટેસ્ટમાં 87 વિકેટ ઝડપી છે અને 53 વનડેમાં 75 વિકેટ ઝડપી છે.