7 દિવસથી ગુમ બાળકીનું ફરી માતા સાથે મિલન થયું ત્યારે સૌ કોઈની આંખોમાં કરૂણતા જોવા મળી હતી.
અમદાવાદમાંથી 10 વર્ષની ગૂમ બાળકીનું ફરી માતા સાથે મિલન
સોશિયલ મીડિયા થકી પોલીસને મળી સફળતા
એક રીક્ષાચાલકે બાળકીને પોલીસ સુધી પહોંચાડી
અમદાવાદમાંથી 10 વર્ષની ગુમ થયેલી બાળકીનું ફરી માતા સાથે મિલન થતાં કરૂણ દુશ્યો સર્જાયા હતા. અમદાવાદના સોલા વિસ્તારમાં રહેતી 10 વર્ષની બાળકીની ગુમ થવાની ઘટનાનો કિસ્સામાં એક સામાન્ય રિક્ષા ચાલકે પોતાની માનવતાનું શ્રેષ્ઠ ઉદાહરણ રજૂ કર્યું છે. તો આ કિસ્સામાં પોલીસે પણ સોશિયલ મીડિયા અને ડ્રોન જેવી ટેક્નિકની મદદથી બાળકીને શોધવાની તમામ કોશિશ શરૂ કરી દીધી હતી. અને અંતે જ્યારે બાળકીનું માતા સાથે મિલન થયું ત્યારે સૌ કોઈની આંખોમાં કરૂણતા જોવા મળી હતી.
અમદાવાદના એક વિસ્તાર હેબતપુર ફાટક નજીકના મેદાનમાં સામાન્ય ઘરમાં રહેતી 10 વર્ષની બાળકી કોઈ રીતે ગુમ થઈ હતી. પોલીસે આજુબાજુના 10 જેટલા પોલીસ મથકમાં પણ બાળકીના ફોટો મોકલ્યા હતા. સાથે રેલવે સ્ટેશન અને બસ સ્ટેશન પર પણ બાળકીના ફોટોનું પોસ્ટર લગાવ્યું હતું. ગુમ થયેલી બાળકીના માતા-પિતા પાટણમાં વસવાટ કરે છે. જેના કારણે એક ટીમ ત્યાં પણ પહોંચી હતી. છતાં કોઈ ભાળ મળી નહોતી.
સાત દિવસથી ગુમ બાળકીને શોધવા પોલીસે 8 કિમી સુધી ડ્રોનની મદદ પણ લીધી હતી. સાથે 70 સભ્યોની ટીમ પણ સર્ચ ઓપરેશન કરી રહી હતી. પરંતુ બાળકીને કોઈ રીતે શોધી શકાતી નહોતી. પરંતુ ઈશ્વરે પોતાના દૂતની જેમ એક દિવ્યાંગ રિક્ષા ચાલકને બાળકીને ઘર સુધી પહોંચાડવાની જવાબદારી આપી હોઈ તેવી ઘટના છે. છત્રાલ ગામ નજીક બાળકી કોઈની શોધમાં હોય તેવું જાણીને રિક્ષા ચાલકે બાળકીને પોલીસ સુધી પહોંચાડી હતી. જે બાદ પોલીસે તેમના માતા-પિતા સાથે બાળકીનું ફરી મિલન કરાવ્યું હતું. પોલીસે તમામ પ્રક્રિયા અને મેડિકલ રિપોર્ટની કામગીરી પણ પૂરી કરી હતી. બાળકી જ્યારે માતાને મળી તો કરૂણ દુશ્યો સર્જાયા હતા.