અમદાવાદમાં એક વિદ્યાર્થીને એવી ઊંઘ આવી ગઇ કે તેને જગાડવા માટે ફાયરબ્રિગેડની ટીમને બોલાવવી પડી. પરિવારના સભ્યનો શ્વાસ અધ્ધર ચડ્યા હતા.
શહેરના ખોખરા વિસ્તારમાં આવેલ મેથેડિસ્ટ ચર્ચ પાસે રાજકમલ ફ્લેટમાં ગઇકાલે સાંજે ઘસઘસાટ સૂઈ ગયેલા વિદ્યાર્થીએ પોતાના ઘરનો દરવાજો નહીં ખોલતાં માતા પિતા સહિત અડોશ પડોશના રહીશોના જીવ તાળવે ચોટી જતાં ફાયરબ્રિગેડને બોલાવવી પડી હતી. ફાયરબ્રિગેડની ટીમે ઘરનો દરવાજો તેમજ રૂમનો દરવાજો તોડીને જોતાં વિદ્યાર્થી પોતાના પલંગ પર શાંતિથી સૂતો હોવાથી માતા પિતા સહિતના લોકોએ હાશકરો અનુભવ્યો હતો.
ખોખરા વિસ્તારમાં આવેલ મેથેડિસ્ટ ચર્ચ પાસે રાજકમલ ફ્લેટમાં ભાવેશભાઇ મેકવાન પત્ની અને ૧૩ વર્ષના પુત્ર જોય સાથે રહે છે. ભાવેશભાઇ અને પત્ની નોકરી કરે છે. જ્યારે જોય જય સોમનાથ સ્કૂલમાં નવમા ધોરણમાં અભ્યાસ કરે છે.
ગઇ કાલે જોય સ્કૂલથી છૂટીને આવ્યો હતો અને તે પોતાના રૂમમાં સૂઇ ગયો હતો. ચાર કલાક સુધી ઘરનો મુખ્ય દરવાજો બંધ રહેતાં અડોશ પડોશના લોકો દરવાજો ખખડાવ્યો હતો. જોયે દરવાજો નહીં ખોલતાં પડોશીએ ભાવેશભાઇને ફોન કરીને જાણ કરી હતી. ભાવેશભાઇ પત્ની સાથે તરત જ ઘરે પહોંચી ગયા હતા અને તેમણે પણ દરવાજો ખખડાવ્યો હતો.
ફાયરબ્રિગેડ અને ખોખરા પોલીસની ટીમ રાજકમલ ફ્લેટ પર પહોંચી ગઇ હતી ફ્લેટનો મુખ્ય દરવાજો તોડી નાખ્યો હતો. જોયના રૂમનો દરવાજો ખખડાવ્યો હતો પરંતુ તેણે દરવાજો ખોલ્યો નહીં જેથી તે પણ તોડવો પડ્યો હતો.
દરવાજો તોડીને ફાયરબ્રિગેડ તેમજ પોલીસની ટીમ રૂમમાં ગઇ ત્યારે જોય ઘસઘટાસ સૂતો હતો. ફાયરબ્રિગેડની ટીમે જોયને ઉઠાડ્યો હતો અને ત્યારબાદ લોકોએ રાહતનો શ્વાસ લીધો હતો.