ભારતમાં કોરોના વાયરસની બીજી લહેરમાં યુવાનો અને બાળકોમાં પણ ભારે સંક્રમણ જોવા મળી રહ્યું છે.
IIT રુડકી કોરોના વાયરસની ઝપેટમાં
90 વિદ્યાર્થીઓ કોરોના સંક્રમિત
હોસ્ટેલમાં શરૂ કરવામાં આવ્યું કોવિડ કેસ સેન્ટર
કોરોનાનું હોટસ્પોટ બની ગઈ IIT રુડકી
ઉત્તરાખંડમાં કોરોના વાયરસના કેસમાં વધારો થઈ રહ્યો છે. IIT રુડકીમાં વિદ્યાર્થીઓમાં કોરોના વાયરસ તેજીથી ફેલાઈ રહ્યો છે. અત્યાર સુધીમાં 90 વિદ્યાર્થીઓ સંક્રમિત થઈ ગયા છે જેની જાણકારી કૉલેજના મીડિયા સેલ પ્રભારી સોનિકા શ્રીવાસ્તવે ટ્વિટ કરીને આપી છે. ગુરુવાર સુધીમાં 80 વિદ્યાર્થીઓ સંક્રમિત થયા હતા જેની સંખ્યામાં વધારો થયો છે.
હોસ્ટેલમાં કોવિડ કેસ સેન્ટર શરૂ કરવામાં આવ્યું
તંત્રએ ગુરુવારે 5 હોસ્ટેલોને સીલ કરીને આખા વિસ્તારને કન્ટેઈન્મેન્ટ ઝોન જાહેર કર્યું છે. IIT રુડકીની એક હોસ્ટેલમાં કોવિડ કેર સેન્ટર શરૂ કરી દેવામાં આવ્યું છે અને વિદ્યાર્થીઓને જુદા જુદા રૂમમાં આઇસોલેટ કરવાના આદેશ આપવામાં આવ્યા છે. જે સ્તરે કોરોના વાયરસના કેસ વધી રહ્યા છે તેમ IIT રુડકી નવો હોસ્ટસપોટ વિસ્તાર બની ગયો છે.
કુંભ મેળામાં ભારે ધસારો
નોંધનીય છે કે આખા ઉત્તરાખંડ રાજ્યમાં કોરોના વાયરસના કેસ તેજીથી વધી રહ્યા છે. ઉત્તરાખંડમાં અત્યારે મહાકુંભ ચાલી રહ્યો છે જેમાં દેશના જુદા જુદા વિસ્તારોમાંથી હજારો- લાખોની સંખ્યામાં લોકો પહોંચી રહ્યા છે ત્યારે આ ભીડના કારણે પણ કોરોના વાયરસનું સંક્રમણ ફેલાય તેવી ભીતિ છે. કુંભમાં ધસારાને જોતાં શાળાઓને બંધ કરી દેવાના આદેશ આપી દેવામાં આવ્યા છે. ઉત્તરાખંડની જુદી જુદી શાળાઓમાંથી પણ કોરોના વાયરસ સંક્રમણના અહેવાલ સામે આવી રહ્યા છે.
ભારતમાં કોરોના વાયરસ કેસ અપડેટ (9મી એપ્રિલ)
ભારતમાં એક જ દિવસમાં કોરોના વાયરસના 1,31,968 કેસ આવતા હડકંપ મચી ગયો છે. પહેલીવાર આટલા બધા કેસ સામે આવ્યા છે જ્યારે 24 જ કલાકમાં 780 લોકોના મોત કોરોના વાયરસના કારણે થયા છે. ભારતમાં એક્ટિવ કેસની સંખ્યા વધીને 9,79,608 થઈ ગઈ છે.