અકસ્માત / મધ્યપ્રદેશના રિવામાં બસ-ટ્રક વચ્ચે ભીષણ ટક્કરઃ 9નાંં મોત, 30થી વધુ ઘાયલ

• મધ્યપ્રદેશના રિવામાં બસ-ટ્રક વચ્ચે અકસ્માત
• અકસ્માતમાં 9 ના મોત, 30થી વધુ ઘાયલ
• બસમાં 60થી વધુ પ્રવાસી સવાર હતા

આ ભીષણ અકસ્માત સવારે ૬-૦૦ વાગ્યે થયો હતો. આ અકસ્માતની વિગત એવી છે કે રિવાથી ૩૦ કિ.મી. દૂર ગુડ બાયપાસ નજીક સીધી જઇ રહેલી એક ખાનગી બસ સામેથી આવી રહેલા ટ્રક સાથે ટકરાઇ જતાં આ ગમખ્વાર અકસ્માત સર્જાયો હતો.

આ અકસ્માતની જાણ થતાં પોલીસ અને પ્રશાસનની ટીમ તાબડતોબ સ્થળ પર પહોંચી ગઇ હતી. હજુ પણ બસની અંદર આ લખાઇ રહ્યું છે ત્યારે કેટલાક લોકો ફસાયેલા છે અને પોલીસ-પ્રશાસન દ્વારા રાહત અને બચાવની કામગીરી જારી છે. ગંભીર રીતે ઘાયલ થયેલા લોકોને નજીકની હોસ્પિટલમાં સારવાર માટે ખસેડવામાં આવ્યા છે. 

અકસ્માતનો ભોગ બનેલ ખાનગી બસમાં ૬૦થી વધુ પ્રવાસી સવાર હતા. ઘાયલ પ્રવાસીઓના જણાવ્યા અનુસાર ડ્રાઇવર બસને ખૂબ ઝડપે ચલાવી રહ્યો હતો. આ દરમિયાન ગુડ બાયપાસ પર તેણે સ્ટીયરિંગ પર કાબૂ ગુમાવતાં સામેથી આવી રહેલી ટ્રક સાથે બસ ભયાનક રીતે ટકરાઇ ગઇ હતી.

આ અકસ્માત એટલો ભયાનક હતો બસના આગળના ભાગના ફૂરચે ફૂરચા ઊડી ગયા હતા. ડ્રાઇવર સહિત 9 યાત્રીઓનાં સ્થળ પર જ મોત થયાં હતાં. અકસ્માત બાદ પ્રવાસીઓની ચિચિયારીઓ સાંભળીને ત્યાંથી પસાર થઇ રહેલા લોકોએ ઘટનાની જાણ પોલીસ અને એમ્બ્યુલન્સને કરી હતી.

પોલીસ અને પ્રશાસનની ટીમે બસની પાછળનો દરવાજો ખોલીને પ્રવાસીઓને બહાર કાઢયા હતા. આ અગાઉ ૧ નવેમ્બરે મધ્યપ્રદેશમાં એક મોટો અકસ્માત થયો હતો. રાજ્યના બડવાણી જિલ્લા મથકથી ર૬ કિ.મી. દૂર એક ભીષણ સડક દુર્ઘટનામાં એક જ પરિવારનાં પાંચનાં મોત થયાં હતાં.