ધોધમાર / માઉન્ટ આબુને મેઘરાજાએ ઘમરોળ્યું, 9 ઇંચ વરસાદ ખાબકતા ચોમેર પાણી જ પાણી !

• માઉન્ટ આબુમાં વરસાદી માહોલ
• આબુમાં 9 ઈંચ જેટલો વરસાદ ખાબક્યો 
• ભારે વરસાદથી આબુમાં પાણી ભરાયા

ગુજરાતીઓનું ફેવરિટ હિલ સ્ટેશન એટલે માઉન્ટ આબુ. અત્યારે ચોમાસામાં હિલ સ્ટેશનનો નજારો કંઇક અલગ જ જોવા મળે. ત્યારે માઉન્ટ આબુમાં પણ અત્યારે બરાબરનો વરસાદી માહોલ જામ્યો છે.  બનાસકાંઠામાં મેઘરાજાએ ધડબડાટી બોલાવી રહ્યા છે.  ત્યારે  રાજસ્થાનના માઉન્ટ આબુમાં વરસાદી મોસમ જામી છે. 

આબુમાં વરસાદી માહોલ, 9ઇંચ ખાબક્યો

રાજસ્થાનના માઉન્ટ આબુમાં 9 ઇંચ જેટલો વરસાદ ખાબક્યો છે. ભારે વરસાદથી આબુમાં પાણી ભરાયા છે. અહીંની હોટલ તથા તમામ ટુરિસ્ટ પ્લેસ બંધ કરી દેવામાં આવ્યા છે. માઉન્ટ આબુ તરફ જવાનો રસ્તો બંધ કરવાની ફરજ પડી છે. ડુંગરાળ વિસ્તાર હોવાથી ભારે વરસાદને કારણે ધોધ સક્રિય થયા છે. નજર પહોંચે ત્યાં માત્રને માત્ર ધુમ્મસ છવાયેલુ છે આવા માહોલ વચ્ચે વરસાદ મન મૂકીને પડી રહ્યો છે. 

પાલનપુર-આબુરોડ હાઇવે 9 કલાકથી બંધ

તો આ તરફ બનાસકાંઠામાં ધોધમાર વરસાદને કારણે પાલનપુર-આબુરોડ હાઈ-વે છેલ્લા 9 કલાકથી બંધ છે.  કલેક્ટરે નેશનલ હાઈ-વે ઓથોરિટીને પાણીના નિકાલની સૂચના આપી છે પરંતુ  વરસાદી પાણીનો નિકાલ હજી સુધી થઇ રહ્યો નથી. પરિણામે રાહદારીઓ અને વાહનચાલકો હાલાકી વેઠવા મજબૂર બન્યા છે. જો પાણીનો નિકાલ નહીં થાય પોલીસ ફરિયાદ પણ થઇ શકે છે. 

દાંતીવાડાથી પાંથાવાડાથી જતો હાઈ-વે તૂટ્યો

મહત્વનું છે કે બનાસકાંઠામાં વરસાદની તોફાની બેટિંગ શરૂ થઇ છે. પાલનપુર હાઇવે, ડીસા, અમીરગઢ, ઇકબાલગઢ સહિતના ગામો જાણે બેટમાં ફેરવાયા હોય તેવા દ્રશ્યો જોવા મળી રહ્યા છે. તો બીજી તરફ  દાંતીવાડામાં ભારે વરસાદથી રોડ રસ્તા પાણીમાં ગરકાવ થયા છે. બનાસ નદીના પુલ નજીક આવેલો હાઈ-વે ધોવાઇ ગયો.  દાંતીવાડાથી પાંથાવાડાથી જતો હાઈ-વે તૂટ્યો. પાણીના વહેણને કારણે એક તરફથી હાઇવે ધોવાઇ ગયો.