વલસાડ જિલ્લામાં 24 કલાકમાં ખાબક્યો 9 ઈંચ વરસાદ મધુબન ડેમના દરવાજા ખોલાયા...

વલસાડઃ જિલ્લામાં છેલ્લા 10 દિવસથી સતત વરસાદ વરસી રહ્યો છે. જેના કારણે જનજીવન ઘણું પ્રભાવીત થયું છે. જિલ્લાના તમામ તાલુકાઓમાં નોંધપાત્ર વરસાદ વરસ્યો છે. ત્યારે સૌથી વધુ વલસાડ અને ધરમપુર તાલુકામાં વરસ્યો છે. ધરમપુરમાં છેલ્લા 24 કલાકમાં 9 ઈંચ વરસાદ નોંધાયો છે.

તો વલસાડમાં 8.5 ઈંચ પારડીમાં 8 ઈંચ કપરાડામાં 5 ઈંચ વરસાદ નોંધાયો છે. જ્યારે મધુબન ડેમમાં પાણીની આવક યથાવત્ છે. ઉપરવાસમાં થયેલા ભારે વરસાદના કારણે તમામ નદી નાળાઓ છલકાઈ ગયા છે. બે કાંઠે નદીઓ વહી રહી છે. ત્યારે જિલ્લાના જીવાદોરી સમાન મધુબન ડેમમાં પાણીની આવક યથાવત્ છે. અત્યારે ડેમમાં 73 હજાર 585 ક્યુસેક પાણીની આવક થઈ રહી છે.

ત્યારે ડેમની સપાટી 72.05 મીટરે પહોંચી છે. જ્યારે ડેમના 9 દરવાજા 3.8 મીટર જેટલા ખોલી દેવામાં આવ્યા છે. ડેમમાંથી 1 લાખ 17 હજાર 788 ક્યુસેક પાણી છોડાઈ રહ્યું છે. ડેમમાંથી પાણી છોડતા દમણગંગા નદી બે કાંઠે વહી રહી છે. જેના કારણે નીચાણવાળા ગામડાઓને એલર્ટ કરી દેવામાં આવ્યા છે. જોકે હવામાન વિભાગ દ્વારા હજુ પણ ભારે વરસાદની આગાહી કરવામાં આવી છે. જેથી વલસાડમાં તંત્ર એલર્ટ પર મુકવામાં આવ્યું છે.