મહિલા દિવસ... સાંભળવામાં સારું લાગે પણ આ દિવસ મનાવવા કોઈ ખાસ દિવસની જરૂર હોતી નથી. મહિલાઓ રોજની લાઈફમાં જે કામ કરે છે તેને માટે તેને કોઈ મહેનતાણું કે અન્ય કોઈ ખાસ શબ્દો પણ સાંભળવા મળતા નથી. ત્યારે જિંદગીમાં એકવખત મળવા જેવાં માણસ છે અમદાવાદમાં રહેતાં 85 વર્ષીય મહિલા બિમલાબેન હુર્રા. 80 વર્ષની ઉંમરે બ્રેસ્ટ કેન્સરને હરાવી હિંમત જીત્યા તો આજે હજારો દર્દીઓ અને વૃદ્ધોની સેવા પાછળ વર્ષમાં લાખો રૂપિયા ખર્ચી નાંખે છે.
યુવાનો 8 કલાકમાં થાકી જાય પણ બિમલાબા 85 વર્ષે પણ 8 કલાક કામ કરે છે
13 વર્ષની ઉંમરે પોકેટમનીના રૂપિયામાંથી 100 પુસ્તકની લાઈબ્રેરી શરૂ કરીને સેવાનો ભેખ જગાડ્યો
સ્ત્રીઓ સમજથી કામે લે તો પુરૂષ સમોવડી થવાની કોઈ જરૂર નથીઃ બિમલાબેન
મંદિરોમાં ક્યારેય ભેટ ન આપવી પણ દર્દીઓ પાછળ લાખો ખર્ચી નાંખવા
ક્યારેય મંદિરોમાં ભેટ ન ચઢાવનારા, ભીખારીને એકપણ રૂપિયાનું દાન ન આપવામાં માનનારા બિમલાબેન અંબામાતાના ભક્ત છે. ફક્ત 13 વર્ષની ઉંમરેથી જ જેમના લોહીમાં સેવા અને દાનની પ્રવૃત્તિ વણાઈ ચૂકી છે તેવા બિમલાબેન પોળમાં રહેતા ત્યારથી જ જરા સારી સ્થિતિ ધરાવતા અને આસપાસના લોકોને મદદ કરતા. તેઓએ અંદાજે 1948માં સ્વખર્ચે 100 પુસ્તકોની લાયબ્રેરી ખોલી અને સાથે લોકોને ફ્રીમાં વાંચવા આપતા. 85 વર્ષે પણ બિમલાબેન અંગ્રેજી તો જાણે એવું બોલે કે બ્રિટીશર ધોળિયો બોલતો હોય.
પોતાના જીવનની મહત્વના સમય વિષે વાત કરતાં બિમલાબેન કહે છે કે હું 79 વર્ષની હતી ત્યારે મને બ્રેસ્ટ કેન્સર થયું હતું. હું કસરત કરવા જતી અને અહીં થેરાબેલ્ટની કસરત કરતી. જેનાથી મને ચેસ્ટમાં થોડું અલગ ફિલ થયું, હું ડોક્ટરને બતાવવા એકલી જ ગઈ અને મેમો કરાવ્યો. જાણવા મળ્યું તો બ્રેસ્ટ કેન્સર હતું. જાતે જ પાછી આવી અને પરિવારને જાણ કરી. ઓપરેશન કરાવ્યુંને હું સ્વસ્થ થઈ ગઈ. હું સંપૂર્ણ રીતે પોઝિટિવ હતી અને સાથે જ મને દવાઓથી પણ ઝડપથી ફરક પડી ગયો હતો. સારવારમાં પણ મેં ઘણું ડાયટનું ધ્યાન રાખ્યું અને સાથે અંબેમાની ભક્ત હોવાથી માનતા પણ રાખી હતી. તેમની કૃપાથી હું 10 જ દિવસમાં ફરીથી હરતી ફરતી થઈ ગઈ હતી.
વુમન્સ ડેનો સંદેશ આપતાં બિમલાબેન કહે છે...
આજની દરેક મહિલા પોતાને પુરુષ સમોવડી માને છે. આ ખૂબ જ સારી વાત છે. હવે પુરુષ પ્રધાન સમાજ રહ્યો નથી. મહિલાઓએ પુરુષોની સાથે ખભે ખભો મિલાવીને ચાલવું જોઈએ. પોતાની આવડતનું અભિમાન ન કરવું. સમજૂતિથી તાલ મિલાવીને જો તમે તમારા પતિ સાથે ચાલશો તો તમારા માટે તેમનાથી સારા મિત્ર નહીં મેળવી શકો. મારું મારું ને બદલે આપણું સહિયારુંની ભાવના રાખીને જો તમારા પરિવારને આગળ વધારશો તો તમે સુખી જીવન જીવી શકશો. અભિમાન ક્યારેય ન રાખો અને સાથે જ સમજી લો કે પહેલેથી ચાલતી આવતી પુરુષ પ્રધાન સમાજની માન્યતાનો અંત નહીં આવે પણ સમજથી કામ લેશો અને તમારા બાળકોને પણ સમાનતા શીખવશો તો તમે સારી લાઈફ જીવી શકશો.
આ રીતે વર્ષે આટલી રકમ દાન પાછળ ખર્ચ કરે છે
જિંદગીના અડધા પડાવે પહોંચ્યા ત્યારે અંદાજે 1972માં ગુજરાત સારવાર મંડળમાં જોડાયા અને અહીંથી તેમની સેવા પ્રવૃત્તિને વેગ મળ્યો. અહીં તેઓ મેડિકલ એડ માટે લોકોને મદદ કરતા. અહીંથી તેઓ 9 હોસ્પિટલો સુધી પહોંચ્યા. મંડળના મેમ્બર્સ હોસ્પિટલ જતાં અને ડોનેશન પણ આપતાં. સાથે સાથે તેઓએ અલગથી અમદાવાદ સારવાર મંડળમાં કામ શરૂ કર્યું. અહીં તેઓ દર્દીઓ સાથે કુદરતી આફતોથી પીડિત લોકોની મદદ કરવાની શરૂઆત કરી. આજે તેઓ દિવ્યાંગ, રક્તપીડિત, ઘરડાંઘર અને સેરેબલ પાલ્સીના બાળકોને મદદ કરે છે.
85 વર્ષ સુધી અડિખમ રહેવા બિમલાબેન ફોલો કરે છે આ ડાયટ પ્લાન
બિમલાબેન પોતાને ફિટ રાખવા માટે રોજ 25 મિનિટ યોગમાં કરે છે. ઓમકાર કરે છે આ સિવાય 20 મિનિટ સાયકલિંગ અને અડધો કલાક વોકિંગ કરે છે. જો તેમના ડાયટની વાત કરીએ તો તેઓ ફ્રૂટ્સ પર ભાર આપવામાં માને છે. આ સિવાય તેઓ સવારે ભૂખ્યા પેટે પાણી અને ચા લે છે. પછી 7 વાગે કેળું અને પપૈયું ખાય છે. 10 વાગે ફૂલ થાળી જમે છે. (દાળ કે રોટલીમાંથી કોઈ એક લે છે) 1 વાગે પરિવાર સાથે બેસીને ફરીથી 2 ફ્રૂટ ખાય છે. 4 વાગે ફ્રૂટ કે ખાખરો કે લીંબું પાણી પીએ છે. સાંજે 7 વાગે ખીચડી કે કઢી અથવા સાદું ભોજન લે છે.