રાજ્યમાં ગરમીનું સંકટઃ ધ્રાંગધ્રામાં 8 વર્ષની બાળકીનું લૂં લાગવાથી મોત

સુરેન્દ્રનગરઃ રાજ્યભરમાં ઉનાળો આકરો બની રહ્યો છે. ગરમીનો પારો ઉંચકાતા જનજીવનને માઠી અસર પહોંચી રહી છે. રાજ્યભરમાં ગરમીનો પ્રકોપ યથાવત્ છે. ત્યારે છેલ્લા કેટલાક દિવસોથી સુરેન્દ્રનગર જીલ્લામાં પણ ગરમીનું સંકટ સર્જાયું છે.

હવે સુરેન્દ્રનગરમાં ગરમીના પારામાં વધારો થયો છે. સુરેન્દ્રનગરમાં ગરમીનો પારો 45 ડિગ્રીએ પહોંચ્યો છે. ગરમી વધુ હોવાના કારણે સુરેન્દ્રનગર જિલ્લાના ધ્રાંગધ્રામાં લૂ લાગવાથી 8 વર્ષની બાળકીનુ મોત થયુ છે.

અમદાવાદમાં પણ તાપમાનનો પારો 42 ડિગ્રી નોંધાયો હતો. એકાએક અસહ્ય ગરમી અને લૂના કારણે 40થી વધુ લોકો બેભાન થઇ ગયા હતા. જ્યારે છોટા ઉદેપુરમાં પણ હિટવેવની અસરથી 100 લોકો સનસ્ટ્રોકનો શિકાર બન્યા હતા.

હવામાન વિભાગ મુજબ આગામી દિવસમાં ગરમીના પારામાં વધારો થઈ શકે છે. હવામાન વિભાગે લોકોને ઘરની બહાન ન નિકળવાની સલાહ પણ આપી છે. અમદાવાદમાં 42 ડીગ્રી તાપમાન પહોંચ્યો છે. પાટનગર ગાંધીનગરમાં 42 ડિગ્રી વડોદરામાં તાપમાન 42 ડીગ્રી અને રાજકોટના 41 ડીગ્રી તાપમાન નોંધાયું છે. સાથે જ આગામી દિવસમાં ગરમીમાં વધારો થઇ શકે છે.

સૌરાષ્ટ્રના વિસ્તારો પણ ગરમીથી ત્રાસી ગયા છે. અમરેલી ૪૨ ડિગ્રી નોંધાયું હતું. આવનારા દિવસોમાં હજુ ગરમીનો પારો ઊંચકાશે તેવી શક્યતાને જણાવાય રહી છે.