2022માં યોજાનાર બર્મિંગહમ કોમનવેલ્થ ગેમ્સમાં મહિલા T-20 ક્રિકેટ ટૂર્નામેન્ટ માટે યજમાન ઈંગ્લેન્ડને ડાયરેક્ટ એન્ટ્રી મળી છે, જ્યારે આઠ ટીમ વચ્ચે યોજાનારા આ ટૂર્નામેન્ટમાં ટોચની છ ટીમને સીધી એન્ટ્રી મળશે.
હાલ ભારતની મહિલા ક્રિકેટ ટીમ T-20 રેન્કિંગમાં ત્રીજા સ્થાન પર છે. ગત વર્ષે જ મહિલા T-20 ક્રિકેટને કોમનવેલ્થ ગેમ્સમાં સામેલ કરવાનો નિર્ણય લેવામાં આવ્યો હતો. ICC અને કોમનવેલ્થ ગેમ્સ ફેડરેશને આ અંગેની જાણકારી આપી.
ICCએ જારી કરેલી યાદીમાં જણાવાયું છે કે યજમાન ટીમના રૂપમાં ઈંગ્લેન્ડની મહિલા ક્રિકેટ ટીમે સીધું આ ટૂર્નામેન્ટ માટે ક્વોલિફાય કરી લીધું છે. આ ઉપરાંત આગામી તા. 1 એપ્રિલના રોજ T-20 ઇન્ટરનેશનલની ટોચની છ ટીમને કોમનવેલ્થ ગેમ્સમાં યોજાનાર મહિલા T-20 ટૂર્નામેન્ટ માટે સીધો પ્રવેશ મળશે. બાકીના એક સ્થાન માટે ક્વોલિફાય રાઉન્ડ રમાશે, જેની જાણકારી આગામી દિવસોમાં અપાશે. જોકે ક્વોલિફાયર રાઉન્ડ યોજવાની અંતિમ તારીખ 31 જાન્યુઆરી 2022 છે.
ક્રિકેટની રમતને પહેલીવાર 1998ની કોમનવેલ્થ ગેમ્સમાં સામેલ કરવામાં આવી હતી. એ સમયે 50-50 ઓવરની પુરુષોની મેચ રમાઈ હતી. એ કોમનવેલ્થ ગેમ્સમાં દક્ષિણ આફ્રિકાની પુરુષ ટીમે ગોલ્ડ મેડલ જીત્યો હતો. આગામી ઓલિમ્પિક ઈંગ્લેન્ડના બર્મિંગહામમાં 28 જુલાઈથી 8 ઓગસ્ટ 2022 દરમિયાન યોજાશે.
ભારતીય કેપ્ટન હરમનપ્રીત કૌર સહિત દુનિયાની ટોચની વુમન્સ ટીમની ટીમની કેપ્ટનોએ ICC અને કોમનવેલ્થ ગેમ્સના આયોજકોના નિર્ણયનું સ્વાગત કર્યું છે. હરમનપ્રીતે કહ્યું, ''કોમનવેલ્થ ગેમ્સમાં મહિલા ક્રિકેટનું સામેલ થવું એ બહુ મોટી વાત છે. મને આશા છે કે અમે બધા આ ટૂર્નામેન્ટનો હિસ્સો બનીશું.''
ઓસ્ટ્રેલિયાની કેપ્ટન મેગ લેનિન્ગે જણાવ્યું, ''છેલ્લાં કેટલાંક વર્ષોમાં મહિલા ઘણું બધું બદલાઈ ગયું છે. મહિલા ક્રિકેટ ઘણું આગળ વધી ચૂક્યું છે. મને આશા છે કે કોમનવેલ્થ દ્વારા તે વધુ આગળ વધશે.