ઇન્ટરનેટ હવે ઇમેઇલ અને સોશિયલ મીડિયા સુધી મર્યાદિત નથી. તેનો ઉપયોગ ઓનલાઇન શોપિંગ,બુકિંગ અને ટ્રાન્ઝેકશન માટે થઇ રહ્યો છે. જેના પગલે ઓનલાઇન ફ્રોડ પણ વધી રહ્યા છે. તેથી સાવચેત ન રહેનાર લોકો તેનો આસાનીથી ભોગ બની શકે છે. ગૂગલે ડિજિટલ વર્લ્ડમાં સુરક્ષિત રહેવાની આઠ રીતો સૂચવી છે.
ગુગલના જણાવ્યા મુજબ તમારો મોબાઇલ નંબર અથવા ઇમેઇલ એડ્રેસ તમારા એકાઉન્ટ સાથે જોડાયેલો હોવો જોઇએ. આ એટલા માટે કે કોઈ શંકાસ્પદ એકટિવિટીના કિસ્સામાં તમને તમારા મોબાઇલ નંબર પર ચેતવણી મળશે. આવી સ્થિતિમાં, જીમેલ અથવા અન્ય કોઈપણ એકાઉન્ટ સાથે મોબાઇલ નંબર અચુક જોડવો જોઇએ.
ગૂગલના જણાવ્યા મુજબ, એકથી વધુ પાસવર્ડ યાદ રાખવાનું કામ અઘરું છે. કેટલીકવાર તેને પાસવર્ડ ફરીથી સેટ કરવો પડે છે. આવી સ્થિતિમાં પાસવર્ડ મેનેજર તમારી સહાય કરી શકે છે. મજબૂત પાસવર્ડ બનાવવા ઉપરાંત, પાસવર્ડ મેનેજર તમને પાસવર્ડ યાદ રાખવામાં પણ મદદ કરે છે. મોબાઇલ અથવા લેપટોપના સોફ્ટવેરને અપડેટ કરવામાં ઘણા આળસ કરે છે. સમય સમય પર સોફટવેર અપડેટ કરવું અત્યત જરુરી છે. આ ઉપરાંત એપ્લિકેશન્સ, બ્રાઉઝર્સ પણ સતત અપડેટ કરતાં રહેવું જોઇએ. આઉટડેટેડ સોફટવેરના કારણે તમારા મોબાઇલ કે પીસને હેકર્સ આસાનીથી નિશાન બનાવી શકે છે.
ડિજિટલ દુનિયામા ટુ ફેકટર ઓથેન્ટિકેશન ઘણું મહત્વનું છે. જ્યારે પણ તમે નવા ડિવાઇસ પર લોગ ઇન કરો, તમારા મોબાઇલ નંબર પર એક કોડ આવે છે. આ કોડ નાખ્યા બાદ જ તમે લોગ ઇન થઇ શકો છો. ગૂગલ પાસે સિકયોરિટી ચેકઅપ ટૂલ છે. તમારા કોઈ પાસવર્ડ હેક થયા છે કે કેમ તે જાણવા માટે તમે તેનો ઉપયોગ કરી શકો છો. તે તમારા સાઇન ઇન કરેલા ડિવાઇસ, તમારા રિપીટ પાસવર્ડ્સ સહિત ઘણી મહત્વની બાબતો બતાવે છે. એક ભય છે ઘણીવાર આપણે લાંબા સમય સુધી એકાઉન્ટ લોગ આઉટ કરવાનું ભૂલી જઇએ છીએ. આવી સ્થિતિમાં જોખમ વધે છે. બને ત્યાં સુધી ગુગલ પ્લે સ્ટોર કે એપલ એપ સ્ટોરમાંથી જ એપ ડાઉનલોડ કરવી જોઇએ. થર્ડ પાર્ટી એપથી સિકયોરિટી માટે ખતરો થઇ શકે છે.