ગોઝારો રવિવાર / ગુજરાતમાં અલગ-અલગ 4 અકસ્માતમાં કુલ 8 લોકોએ જીવ ખોયો, જુઓ ક્યાં કેવી રીતે કાળ ભરખી ગયો

• અમદાવાદમાં સોલા બ્રિજ ઉપર ગંભીર અકસ્માત સર્જાતા દંપતિનું મોત
• વડોદરાના ગવાસદ ગામ નજીક બે ટ્રકો સામસામે અથડાતા એકનું મોત
• લુણાવાડા પાસેના કોસિયા ખાતે ટ્રક-બાઇક વચ્ચેના અકસ્માતમાં 4ના મોત

અમદાવાદના સોલા બ્રિજ ઉપર ગંભીર અકસ્માત સર્જાયાની ઘટના સામે આવી છે. શહેરના સોલા બ્રિજ પર એક કાર અને એક્ટિવા વચ્ચે ટક્કર થતા એક દંપતિનું ઘટનાસ્થળે જ મોત નિપજ્યું છે.

દંપતિ બ્રિજ પરથી નીચે પટકાતા ઘટનાસ્થળે જ મોત

કારની જોરદાર ટક્કરના કારણે એક્ટિવા પર સવાર દંપતિ ધડામ દઇને બ્રિજ પરથી નીચે પટકાતા તેઓનું ઘટનાસ્થળે જ મોત નિપજ્યું હતું. જો કે, આ ઘટના બનતાની સાથે આસપાસના સ્થાનિકો ઘટનાસ્થળે એકત્ર થઇ ગયા હતાં. બાદમાં પોલીસને આ મામલે જાણ કરાતા પોલીસ પણ આ સમગ્ર ઘટનાને લઇને વધુ તપાસ હાથ ધરી રહી છે.

વડોદરાના ગવાસદ ગામ નજીક બે ટ્રકો સામસામે અથડાતા એકનું મોત

બીજી બાજુ વડોદરાના ગવાસદ ગામ નજીક પણ ગંભીર અકસ્માત સર્જાયો છે. પાદરા જંબુસર રોડ પર બે ટ્રકો સામસામે ધડાકાભેર ટકરાતા બંન્ને ટ્રકોનું કચ્ચરઘાણ નીકળી ગયો. આ અકસ્માતમાં 1 વ્યક્તિનું મૃત્યુ પણ થયું છે. હાલમાં વડુ પોલીસ ઘટનાસ્થળે પહોંચી સમગ્ર મામલે વધુ તપાસ હાથ ધરી રહી છે.

લુણાવાડા પાસેના કોસિયા ખાતે ટ્રક-બાઇક વચ્ચેના અકસ્માતમાં 4ના મોત

આ સાથે ત્રીજી દુર્ઘટનામાં મહીસાગરના લુણાવાડા પાસેના કોસિયા ખાતે ટ્રક અને બાઇક વચ્ચે ગંભીર અકસ્માત સર્જાતા 4 લોકોના ઘટનાસ્થળે જ મોત નિપજ્યાં છે. મહીસાગરના લુણાવાડા પાસેના કોસિયા વિસ્તારમાં ગંભીર અકસ્માત સર્જાયો છે. ટ્રક અને બાઈક વચ્ચે લુણાવાડા નજીક ગંભીર અકસ્માત સર્જાયો છે. જેમાં 4 લોકોએ ઘટનાસ્થળે જ પોતાના જીવ ગુમાવ્યા છે. મળતી માહિતી અનુસાર, આ અકસ્માતમાં બાઈક સવાર પતિ-પત્ની અને 2 બાળકોના મૃત્યુ થયા છે. જેથી પોલીસે અકસ્માતનો ગુનો નોંધી ટ્રક ચાલકને પકડવા કવાયત હાથ ધરી છે. પરંતુ આ અક્માત બાદ ટ્રક ચાલક ઘટનાસ્થળેથી ફરાર થઇ ગયો હતો. જેથી ડ્રાઈવરની ધરપકડ કરવા પોલીસે વધુ તજવીજ હાથ ધરી છે.

લિમડી પાસે 2 બાઇક વચ્ચે અકસ્માત સર્જાતા એકનું મોત

ચોથા અકસ્માતમાં લિમડીથી ચાકલીયા જતાં મેઈન રોડ પર રણીયા૨ ઈનામી ગામે બે બાઇક વચ્ચે સર્જાયેલા અકસ્માતમાં પટકાયેલા બંનેને ઈજા થતાં તેઓને હોસ્પિટલ ખસેડવામાં આ‌વ્યા હતા. જેમાંથી એકનું મોત નિપજ્યું હતું. તા. 26મીએ કરંબાના અશ્વિનભાઇ તથા ધર્મેન્દ્રભાઇ બંન્ને બાઇક લઇને રોજ લિમડીથી પસાર થઇ રહ્યાં હતા. એ દરમિયાન રણીયાર ઈનામી ગામે બાઇકના ચાલકે વાહન પુરઝડપે હંકારી લાવી અશ્વિનની બાઇક સાથે અકસ્માત કરતા બંન્ને જણા નીચે પટકાતા તેઓ ઘાયલ થયા હતા.