તેહરાનઃ ઈરાનમાં સેનાની પરેડ દરમિયાન મોટો હુમલો થયો છે. હુમલામાં અનેક લોકો માર્યા ગયા હોવાનું સામે આવ્યું છે. સૈન્ય પરેડ દરમિયાન અજાણ્યા શખ્સોએ હુમલો કર્યો અને ત્યાંથી ફરાર થઈ ગયા હતા. અજાણ્યા શખ્સોએ સૈન્ય પરેડ દરમિયાન અંધાધુધ ફાયરિંગ કર્યું હતું.
મીડિયા રિપોર્ટ્સ અનુસાર અંધાધૂધ ફાયરિંગ થતા 8 લોકો મોતનો કોળિયો બન્યા અને 20થી વધુ લોકો ઈજાગ્રસ્ત થતા તેઓને સારવાર માટે ખસેડવામાં આવ્યા છે. આ ઘટનામાં કેટલીક મહિલાઓ અને બાળકો પણ ઇજાગ્રસ્ત થયા છે. જો કે આ ઘટનાને લઇને વધુ માહિતી હજુ સુધી મળી નથી.
મીડિયા દ્વારા જાહેર કરાયેલ નિવેદનમાં 'તકફિરી ગનમેન'નો પ્રયોગ કરવામાં આવ્યો છે. પૂર્વમાં આ શબ્દ પ્રયોગ ઇસ્લામિક સ્ટેટ સમૂહો માટે કરવામાં આવતો હતો. અહવાઝ ઇરાનના તેલ ભંડારવાળા ધનિક કુઝિસ્તાન ક્ષેત્રની રાજધાની છે. અહીં સેના પરેટ પર હુમલો એ બહુ સંવેદનશીલ મામલો છે કારણ કે પૂર્વમાં અરબ અલગાવવાદિઓ દ્વારા વિસ્તારની તેલ પાઇપલાનને નુકસાન પહોંચાડવાની ઘટનાઓ પણ થઇ ચૂકી છે.