આખા વિશ્વમાં WHOના ‘The Lancet Child & Adolescent Health’ રિપોર્ટ મુજબ 10 માંથી 8 ટીનએજર્સ શારીરિક રીતે એક્ટિવ રહેતા નથી. ભારતમાં આ આંકડો 100 માંથી 73.9% જેટલો છે.
તરુણોનો બહાર મેદાનમાં જઈને રમવાનો સમય હવે બેઠા બેઠા મોબાઈલ મચેડવામાં જઈ રહ્યો છે જેના આ વરવા પરિણામો હવે સામે આવી રહ્યા છે તેવું મુંબઈની લીલાવતી હોસ્પિટલના એક નિષ્ણાત ડોકટરનું માનવું છે.
છોકરાઓ કરતા છોકરીઓ વધુ ઇનએક્ટિવ
આખી દુનિયામાં છોકરાઓ કરતા છોકરીઓ વધુ શારીરિક રીતે ઇનએક્ટિવ એટલે કે નિષ્ક્રિય રહે છે. 16 લાખ તરુણોના પરીક્ષણમાં 78% નિષ્ક્રિય છોકરાઓ સામે 85% છોકરીઓને ઇનએક્ટિવ નોંધવામાં આવી.
ભારતમાં પણ આ હાલત છે. છોકરાઓ સૌથી વધુ ગલી ક્રિકેટ રમવાના કારણે શારીરિક કસરત મેળવે છે જયારે છોકરીઓ મુખ્યત્વે ઘરકામ કરવામાં વ્યસ્ત રહેતી હોવાથી શારીરિક પ્રવૃત્તિમાં ભાગ લઇ શકતી નથી.
ભારતમાં મોટા ભાગની શારીરિક એક્ટિવિટી માટે ક્રિકેટનું ગાંડપણ જવાબદાર છે જે શહેરો અને નાના નગરોમાં અલગ અલગ નિયમો પ્રમાણે રમાય છે. જયારે સમાજના વણલખેલા નિયમો મુજબ છોકરીઓએ ઘરકામ કરવું પડે છે. આમ એટલું ચોક્કસ કહી શકાય કે ભારત એક શારીરિક પ્રવૃત્તિની રીતે નિષ્ક્રિય રહેતો દેશ છે.
ઇનએક્ટિવની વ્યાખ્યા શું છે?
આખા દિવસના એક કલાક પણ શારીરિક પરિશ્રમની પ્રવૃત્તિ ન કરતા હોય તેને ફિઝીકલી ઇનએક્ટિવ કહે છે.
ભારતમાં ઇનએક્ટિવ તરુણોની સંખ્યા ઘટી
ભારતમાં 2001માં 76.6% છોકરાઓ શારીરિક પ્રવૃત્તિમાં ઈનએક્ટિવ હતા જયારે 2016માં 71.8% છોકરાઓ શારીરિક પ્રવૃત્તિમાં ઈનએક્ટિવ છે. જો કે છોકરીઓમાં આ આંકડો 76.6% થી ઘટીને ફક્ત 76.3% થયો છે. આમ છોકરીઓમાં આ આંકડામાં મોટો ઘટાડો નોંધાયો નથી.
ભારતના આંકડા સામે ઉભા થયા સવાલો
જો કે નિષ્ણાતોએ ભારતના આંકડાઓના તથ્ય પર સવાલો ઉભા કર્યા છે. ભારતમાં ગામડાના વિસ્તારોમાં તરુણો શાળાએ જવા માટે માઈલોનું અંતર પગે ચાલીને કાપે છે જયારે શહેરી વિસ્તારોમાં ટીનએજર્સ સ્કૂલ અને ક્લાસીસમાં રીક્ષામાં ફરે છે. આમ 73.9% માંથી કેટલાક તરુણોએ રોજ સખત પરિશ્રમ કરવો પડે છે જયારે કેટલાક તરુણો બિલકુલ કસરતમાં ભાગ લેતા નથી.