જસદણ પેટાચૂંટણીમાં 71.27 ટકા મતદાન નોંધાયું વાયરલ ઓડિયો અને ફોટો મુદ્દે થશે તપાસઃ ચૂંટણીપંચ

રાજકોટઃ જસદણ પેટાચૂંટણીને લઈને ચૂંટણીપંચની પ્રેસ કોન્ફરન્સ યોજી હતી. જેમાં જસદણમાં મતદાનના સત્તાવાર આંકડા જાહેર કર્યા છે. જસદણ પેટાચૂંટણીમાં ઉંચુ મતદાન થયાનું અનુમાન લગાવાયું છે. કોંગ્રેસ અને ભાજપ વચ્ચે સીધા જંગમાં મતદાનના રજૂ કરવામાં આવ્યા છે. ભાજપના કુંવરજી બાવળીયા અને કોંગ્રેસના અવસર નાકિયા મેદાનમાં છે. 23મી તારીખે જસદણ પેટાચૂંટણીની મતગણતરી થવાની છે.

જસદણની ચૂંટણી બાદ ચૂંટણીપંચે આંકડો જાહેર કર્યો છે. જસદણ પેટાચૂંટણીમાં 71.27 ટકા મતદાન નોંધાયું છે. ચૂંટણીપંચના દાવા પ્રમાણે બુથ કેપ્ચરિંગ કે મારામારીની કોઈ ઘટના સામે આવી નથી. જસદણમાં શાંતિપૂર્ણ રીતે મતદાન પૂર્ણ થયું છે.



તો કુંવરજી બાવળિયાના વાયરલ થયેલા ઓડિયો મામલે ચૂંટણીપંચે જણાવ્યું હતું કે ઓડિયો ક્લીપ અંગે તપાસ કરવામાં આવી રહી છે. ત્યારે મતદાન સાથેના વાયરલ ફોટો મુદ્દે પણ તપાસ ચાલી રહી છે. ચૂંટણીપંચના જણાવ્યા પ્રમાણે પોલીસ સમગ્ર મુદ્દે તપાસ કરી રહી છે. પોલીસના રિપોર્ટ બાદ તથ્ય સામે આવશે.